ರೈಲ್ವೆ: 2ನೇ ಹಂತದ ಪರೀಕ್ಷೆ ಮಾಹಿತಿ ಪ್ರಕಟ, ಜ.21-23ರ ವರೆಗೆ ಸಿಬಿಟಿ

ಭಾರತೀಯ ರೈಲ್ವೆಯು ಗ್ರೂಪ್‌ 'ಸಿ'ಯ ಅಸಿಸ್ಟೆಂಟ್‌ ಲೋಕೋ ಪೈಲಟ್‌ ಮತ್ತು ಟೆಕ್ನಿಷಿಯನ್‌ ಹುದ್ದೆಗಳ ನೇಮಕಕ್ಕೆ ನಡೆಸಲಿರುವ ಎರಡನೇ ಹಂತದ ಕಂಪ್ಯೂಟರ್‌ ಆಧರಿತ ಪರೀಕ್ಷೆಯ (ಸಿಬಿಟಿ) ಮಾಹಿತಿಯನ್ನು ವೆಬ್‌ನಲ್ಲಿ ಒದಗಿಸಿದೆ.

ಈಗಾಗಲೇ ಪ್ರಕಟಿಸಿರುವಂತೆ ಜನವರಿ 21ರಿಂದ 23ರ ವರೆಗೆ ಈ ಪರೀಕ್ಷೆ ನಡೆಯಲಿದ್ದು, ಮೊದಲ ಹಂತದ ಪರೀಕ್ಷೆಯಲ್ಲಿ ಅರ್ಹತೆ ಪಡೆದವರು ಮಾತ್ರ ಈ ಪರೀಕ್ಷೆ ಬರೆಯಬಹುದಾಗಿದೆ ಎಂದು ರೈಲ್ವೆಯು ಹೇಳಿದೆ. ಬೆಂಗಳೂರು ಆರ್‌ಆರ್‌ಬಿಯ ಮೂಲಕ ಪರೀಕ್ಷೆ ಬರೆದಿದ್ದ ಅಭ್ಯರ್ಥಿಗಳಲ್ಲಿ 73,302 ಅಭ್ಯರ್ಥಿಗಳು ಎರಡನೇ ಹಂತದ ಪರೀಕ್ಷೆಗೆ ಅರ್ಹತೆ ಪಡೆದಿದ್ದಾರೆ.

ಅಭ್ಯರ್ಥಿಗಳು ರಿಜಿಸ್ಟೇಷನ್‌ ನಂಬರ್‌ ಮತ್ತು ಜನ್ಮದಿನಾಂಕವನ್ನು ನಮೂದಿಸಿ ಲಾಗಿನ್‌ ಆಗಿ ತಾವು ಪರೀಕ್ಷೆ ಬರೆಯಬೇಕಾಗಿರುವ ದಿನಾಂಕ, ಪರೀಕ್ಷೆಯ ಸಮಯ ಮತ್ತು ಸ್ಥಳದ ಬಗ್ಗೆ ಮಾಹಿತಿ ಪಡೆಯಬಹುದಾಗಿದೆ. ಪ್ರವೇಶ ಪತ್ರವನ್ನು ಪರೀಕ್ಷೆಗಿಂತ ನಾಲ್ಕು ದಿನ ಮೊದಲು ವೆಬ್‌ನಲ್ಲಿ ಒದಗಿಸಲಾಗುತ್ತದೆ ಎಂದು ರೈಲ್ವೆಯ ಪ್ರಕಟಣೆಯು ತಿಳಿಸಿದೆ. ಜನವರಿ 23ರ ವರೆಗೆ ಮಾತ್ರ ಈ ಲಿಂಕ್‌ ಲಭ್ಯವಿರಲಿದೆ. ಎಸ್‌ಸಿ/ಎಸ್‌ಟಿ ಅಭ್ಯರ್ಥಿಗಳು ಪ್ರಯಾಣದ ಪಾಸ್‌ ಅನ್ನು ಕೂಡ ಈ ಲಿಂಕ್‌ನಿಂದಲೇ ಡೌನ್‌ಲೋಡ್‌ ಮಾಡಿಕೊಳ್ಳಬಹುದಾಗಿದೆ.

ಪರೀಕ್ಷೆ ಹೇಗೆ?: ಎರಡನೇ ಹಂತದ ಪರೀಕ್ಷೆಯು ಸಿಬಿಟಿಯಾಗಿರುವುದರಿಂದ ಈ ಪರೀಕ್ಷೆ ಹೇಗೆ ನಡೆಯಲಿದೆ ಎಂಬ ಮಾಕ್‌ ಟೆಸ್ಟ್‌ ಲಿಂಕ್‌ ಅನ್ನು ರೈಲ್ವೆಯು ಒದಗಿಸಲಿದ್ದು, ಜನವರಿ 12ರಿಂದ ಈ ಲಿಂಕ್‌ ಆರ್‌ಆರ್‌ಬಿಗಳ ವೆಬ್‌ನಲ್ಲಿ ಲಭ್ಯವಾಗಲಿದೆ. ಹೆಚ್ಚಿನ ಮಾಹಿತಿಗೆ ವೆಬ್‌:www.rrbbnc.gov.in