SSLC ಮೌಲ್ಯಮಾಪನ ಡಿಜಿಟಲ್: ಬೇಗನೆ ನಡೆಯಲಿದೆ ಅಂಕಗಳ ಲೆಕ್ಕಾಚಾರ

ಈ ವರ್ಷದ ಎಸ್‌ಎಸ್‌ಎಲ್‌ಸಿ ಮೌಲ್ಯಮಾಪನದ ಎಲ್ಲ ಹಂತಗಳಲ್ಲೂ ಡಿಜಿಟಲೀಕರಣಗೊಳ್ಳಲಿದ್ದು, ಯಾವುದೇ ತಪ್ಪುಗಳಿಲ್ಲದೆ ಮೌಲ್ಯಮಾಪನ ನಡೆಯಲಿದೆ. ಕರ್ನಾಟಕ ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿ(ಕೆಎಸ್‌ಇಇಬಿ) ಮನಸ್ಸು ಮಾಡಿದರೆ ಪರೀಕ್ಷೆ ಮುಗಿದ ಒಂದೇ ವಾರದಲ್ಲಿ ಫಲಿತಾಂಶ ಕೂಡ ಪ್ರಕಟಿಸಬಹುದಾಗಿದೆ.

ಏನೇನು ಬದಲಾವಣೆ: ಎಸ್‌ಎಸ್‌ಎಲ್‌ಸಿ ಮೌಲ್ಯಮಾಪನದ ರೂಪುರೇಷೆಗಳು ಈ ಹಿಂದಿನಂತೆಯೇ ಇರಲಿದೆ. ಮುಖ್ಯವಾಗಿ ಶಾಲೆಯಿಂದ ಮೌಲ್ಯಮಾಪಕರ ಆಯ್ಕೆಯ ಬಳಿಕ ಕೆಎಸ್‌ಇಇಬಿ ಅವರಿಗೆ ಒಂದು ಬಳಕೆಯ ಹೆಸರು ಹಾಗೂ ಪಾಸ್‌ವರ್ಡ್‌ ನೀಡುತ್ತದೆ. ಅದನ್ನು ಅವರು ಮೌಲ್ಯಮಾಪನದ ಎಲ್ಲ ಹಂತಗಳಲ್ಲಿಯೂ ಬಳಸಬೇಕಾಗುತ್ತದೆ. ಹಿಂದೆ ಚಾಲ್ತಿಯಲ್ಲಿದ್ದ ಶೇಡಿಂಗ್‌ ಹಾಗೂ ಪ್ರಶ್ನೆ ಪತ್ರಿಕೆಯ ಸ್ಕ್ಯಾ‌ನಿಂಗ್‌ಗಳಿಗೆ ಅವಕಾಶವಿಲ್ಲ. ಮೌಲ್ಯಮಾಪಕರು 10 ಉತ್ತರ ಪತ್ರಿಕೆಗಳನ್ನು ಮೌಲ್ಯಮಾಪನ ಮಾಡಿದ ಬಳಿಕ ಅವರ ಅಂಕಗಳನ್ನು ಸಂಬಂಧಪಟ್ಟ ವಿದ್ಯಾರ್ಥಿಯ ಸೀರಿಯಲ್‌ ಸಂಖ್ಯೆ ಆಧಾರದಲ್ಲಿ ಅಪ್‌ಲೋಡ್‌ ಮಾಡಲಿದ್ದಾರೆ.

ಬಳಿಕ ಅವರ ಮೇಲಿನ ಉಸ್ತುವಾರಿಗಳು (ಡಿಸಿ)ಅದನ್ನು ಚೆಕ್‌ ಮಾಡುತ್ತಾರೆ. ಕೊನೆಗೆ ಡಿಸಿಗಳು ನಮೂದು ಮಾಡಿದ ಅಂಕ ಹಾಗೂ ವಿವರಗಳನ್ನು ಸರಿಯಾಗಿವೆಯೇ ಎಂದು ಪರೀಕ್ಷೆ ಮಾಡಿದ ಬಳಿಕ ಸೆಂಟರ್‌ನ ಜಂಟಿ ಮುಖ್ಯಸ್ಥರು ಮತ್ತೊಮ್ಮೆ ಪರಿಶೀಲನೆ ನಡೆಸಲಿದ್ದಾರೆ. ಬಳಿಕ ಮೌಲ್ಯಮಾಪನದ ದಿನವೇ ಅಂಕಗಳು ಇಲಾಖೆಗೆ ಆನ್‌ಲೈನ್‌ ಮೂಲಕ ತಲುಪುತ್ತದೆ.

ಮೈಸೂರಿನಲ್ಲಿ ಫೆ.22ರಂದು ವಿಭಾಗದ ಎಲ್ಲ ಡಿಡಿಪಿಐ, ಎಸ್‌ಎಸ್‌ಎಲ್‌ಸಿ ನೋಡಲ್‌ ಆಫೀಸರ್ಸ್‌ ಹಾಗೂ ಬಿಇಒಗಳ ಜತೆಯಲ್ಲಿ ಈ ಕುರಿತು ಚರ್ಚೆ ನಡೆದು ಯೋಜನೆ ರೂಪಿಸಲಾಗಿದೆ. ಮೌಲ್ಯಮಾಪಕರಿಗೂ ಇದು ಸುಲಭ ವಿಧಾನ. ವಿದ್ಯಾರ್ಥಿಗಳಿಗೂ ಇದರಿಂದ ಹೆಚ್ಚಿನ ಲಾಭವಿದೆ.

ಡಿಜಿಟಲ್‌ ಮೌಲ್ಯಮಾಪನದಿಂದಾಗಿ ಈ ಹಿಂದೆ ಕಾಣಿಸುತ್ತಿದ್ದ ತಪ್ಪುಗಳಿಗೆ ಪೂರ್ಣರೂಪದಲ್ಲಿ ಪರಿಹಾರ ಸಿಗುತ್ತದೆ. ಜತೆಗೆ ವಿದ್ಯಾರ್ಥಿಗಳಿಗೆ ಫಲಿತಾಂಶವನ್ನು ಬೇಗನೆ ನೀಡಲು ಸಹಕಾರಿ. ಸ್ಯಾಟ್ಸ್‌ ಜತೆಯಲ್ಲಿ ವಿದ್ಯಾರ್ಥಿ ಆಧಾರ್‌ ಸಂಖ್ಯೆ ಹಾಗೂ ದೂರವಾಣಿ ಸಂಖ್ಯೆಗಳನ್ನು ನೀಡುವುದರಿಂದ ಫಲಿತಾಂಶ ನೇರವಾಗಿ ವಿದ್ಯಾರ್ಥಿ ನೀಡಿದ ದೂರವಾಣಿ ಸಂಖ್ಯೆಗೆ ರವಾನೆಯಾಗುತ್ತದೆ.
-ಸುಮಂಗಲಾ ವಿ.| ನಿರ್ದೇಶಕರು, ಕರ್ನಾಟಕ ಪ್ರೌಢ ಶಿಕ್ಷಣ ಪರೀಕ್ಷಾ ಮಂಡಳಿ