ಪಿಯುಸಿಯಲ್ಲಿ ಯಾವ ಕಾಂಬೀನೇಷನ್‌ ಆಯ್ದುಕೊಂಡರೆ ಉದ್ಯೋಗಾವಕಾಶಗಳು ಹೆಚ್ಚಿವೆ ಮತ್ತು ಟಿಇಟಿ ಪ್ರಶ್ನೆಪತ್ರಿಕೆ ಮಾದರಿ ಹೇಗಿರುತ್ತದೆ ಎಂಬುದರ ಕುರಿತಾದ ಸಂಪೂರ್ಣ ವಿವರ ಇಲ್ಲಿದೆ.
1. ಎಸ್‌ಎಸ್‌ಎಲ್‌ಸಿ ನಂತರ ಪಿಯುಸಿಯಲ್ಲಿ ವಿಜ್ಞ್ಞಾನ ಅಥವಾ ವಾಣಿಜ್ಯ ಕೋರ್ಸ್‌-ಇವೆರಡರಲ್ಲಿ ಯಾವುದು ಉತ್ತಮ? ವಿಜ್ಞಾನ, ವಾಣಿಜ್ಯ ಮತ್ತು ಕಲಾ ವಿಭಾಗಗಳಲ್ಲಿ ಯಾವ ಯಾವ ವಿಷಯದ ಕಾಂಬಿನೇಷನ್‌ಗಳು ಸೂಕ್ತವಾಗಿರುತ್ತವೆ ಮತ್ತು ಯಾವುದರಲ್ಲಿ ಉದ್ಯೋಗಾವಕಾಶಗಳು ಹೆಚ್ಚಿವೆ?
-10ನೇ ತರಗತಿಯ ವಿದ್ಯಾರ್ಥಿಗಳು, ಜನಸೇವಾ ವಿದ್ಯಾಕೇಂದ್ರ, ಚನ್ನೇನಹಳ್ಳಿ
10ನೇ ತರಗತಿಯ ನಂತರ ವಿಜ್ಞಾನ, ವಾಣಿಜ್ಯ ಮತ್ತು ಕಲಾ ಭಾಗಗಳಲ್ಲಿ ಹಲವು ಕಾಂಬೀನೇಷನ್‌ಗಳಿವೆ. ಪ್ರತಿಯೊಂದು ವಿಷಯವು ಕೂಡ ಅಷ್ಟೇ ಆಸಕ್ತಿದಾಯಕವಾಗಿವೆ. ನಿಮಗೆ ಯಾವ ವಿಷಯದಲ್ಲಿ ಹೆಚ್ಚಿನ ಒಲವಿದೆಯೋ ಆ ವಿಷಯದ ಕಾಂಬಿನೇಷನ್‌ ಅನ್ನು ಆಯ್ಕೆಮಾಡಿಕೊಳ್ಳಬಹುದು. ಕೆಲವು ಕಾಲೇಜುಗಳಲ್ಲಿ ಎಲ್ಲಾ ವಿಷಯದ ಕಾಂಬಿನೇಷನ್‌ಗಳು ಲಭ್ಯವಿರುವುದಿಲ್ಲ. ಹಾಗಾಗಿ ನೀವು ಅರ್ಜಿಯನ್ನು ಸಲ್ಲಿಸುತ್ತಿರುವ ಕಾಲೇಜಿನಲ್ಲಿ ಒಮ್ಮೆ ವಿಚಾರಿಸಿ ನಂತರ ನಿರ್ಧಾರವನ್ನು ತೆಗೆದುಕೊಂಡರೆ ಒಳ್ಳೆಯದು.
*ವಿಜ್ಞಾನ ವಿಭಾಗದಲ್ಲಿ ಲಭ್ಯವಿರುವ ಕೆಲವು ಪ್ರತಿಷ್ಠಿತ ವಿಷಯದ ಕಾಂಬಿನೇಷನ್‌ಗಳು ಇಂತಿವೆ; ಕೆಲವು ಮುಖ್ಯವಾದ ವಿಷಯಗಳೆಂದರೆ ಭೌತಶಾಸ್ತ್ರ, ರಸಾಯನಶಾಸ್ತ್ರ, ಗಣಿತ, ಜೀವಶಾಸ್ತ್ರ, ಎಲೆಕ್ಟ್ರಾನಿಕ್ಸ್‌, ಕಂಪ್ಯೂಟರ್‌ ಸೈನ್ಸ್‌, ಸ್ಟ್ಯಾಟಿಸ್ಟಿಕ್ಸ್‌ ಇತ್ಯಾದಿ.
*ವಾಣಿಜ್ಯ ವಿಭಾಗದಲ್ಲಿ ಅರ್ಥಶಾಸ್ತ್ರ, ಅಕೌಂಟೆನ್ಸಿ, ಬಿಸಿನೆಸ್‌ ಮ್ಯಾಥ್ಸ್‌, ಬಿಸಿನೆಸ್‌ ಸ್ಟಡೀಸ್‌, ಸ್ಟ್ಯಾಟಿಸ್ಟಿಕ್ಸ್‌ , ಇತಿಹಾಸ, ಭೂಗೋಳಶಾಸ್ತ್ರ ಇತ್ಯಾದಿ ವಿಷಯಗಳು ಲಭ್ಯವಿರುತ್ತವೆ.
*ಕಲಾ ವಿಭಾಗದಲ್ಲಿ ಸಮಾಜಶಾಸ್ತ್ರ, ಇತಿಹಾಸ, ಅರ್ಥಶಾಸ್ತ್ರ, ಮನೋಜ್ಞಾನ, ರಾಜ್ಯಶಾಸ್ತ್ರ, ಸಮೂಹ ಮಾಧ್ಯಮ, ಕನ್ನಡ ಭಾಷೆ, ಇಂಗ್ಲಿಷ್‌ ಭಾಷೆ, ಭೂಗೋಳಶಾಸ್ತ್ರ ಇತ್ಯಾದಿ ವಿಷಯಗಳ ಕಾಂಬಿನೇಷನ್‌ ಲಭ್ಯವಿರುತ್ತವೆ.
ಇಂದಿನ ಉದ್ಯೋಗ ಮಾರುಕಟ್ಟೆಯಲ್ಲಿ ಕೆಲಸ ಪಡೆಯಲು ಬೇಕಾಗಿರುವುದು ನಿಮ್ಮಲ್ಲಿರುವ ಕೌಶಲ. ನೀವು ಯಾವುದೇ ವಿಷಯವನ್ನು ಓದಿದರೂ ಆ ಕೆಲಸಕ್ಕೆ ಬೇಕಾಗಿರುವ ಕೌಶಲ ನಿಮ್ಮಲ್ಲಿದ್ದರೆ ಕೆಲಸ ಗ್ಯಾರಂಟಿ. ಪ್ರತಿಭಾವಂತ ಅಭ್ಯರ್ಥಿಗಳಿಗೆ ಅವಕಾಶಗಳು ಸದಾ ಕಾಯುತ್ತಿರುತ್ತವೆ. ಹಾಗಾಗಿ ನಿಮಗೆ ಇಷ್ಟರುವ ವಿಷಯವನ್ನು ಆಯ್ದುಕೊಂಡು ಅದರಲ್ಲಿ ಉತ್ತಮ ಸಾಧನೆಯನ್ನು ಮಾಡಿ.
2. ನಾನು 2007ರಲ್ಲಿ ಡಿಎಡ್‌ ಪೂರ್ಣಗೊಳಿಸಿದ್ದೇನೆ. ಈಗ ಟಿಇಟಿ ಬರೆಯಲು ನಿರ್ಧರಿಸಿದ್ದೇನೆ. ಈ ಪರೀಕ್ಷೆಗೆ ಹೇಗೆ ತಯಾರಿ ನಡೆಸಬೇಕು ಎಂಬುದರ ಕುರಿತು ಸಲಹೆ ನೀಡಿ.
-ಶ್ರೀಹರ್ಷ.ಡಿ., ಗೌರಿಬಿದನೂರು
ಕೇಂದ್ರ ಅಥವಾ ರಾಜ್ಯ ಸರ್ಕಾರದ ಸ್ವಾಮ್ಯದಲ್ಲಿರುವ 1 ರಿಂದ 8ನೇ ತರಗತಿಯ ಶಾಲೆಗಳಲ್ಲಿ ಶಿಕ್ಷಕರಾಗಿ ಕೆಲಸ ಮಾಡಲು ಶಿಕ್ಷಕರ ಅರ್ಹತಾ ಪರೀಕ್ಷೆಯಲ್ಲಿ (ಟಿಇಟಿ) ಅರ್ಹತೆ ಪಡೆದಿರಬೇಕು. ನ್ಯಾಷನಲ್‌ ಕೌನ್ಸಿಲ್‌ ಫಾರ್‌ ಟೀಚರ್‌ ಎಜುಕೇಶನ್‌ ಮಾರ್ಗಸೂಚಿಯ ಪ್ರಕಾರ, ಈ ಪರೀಕ್ಷೆ ನಡೆಸಲಾಗುತ್ತದೆ. ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳೆರಡು ಬೇರೆಬೇರೆಯಾಗಿ ಈ ಪರೀಕ್ಷೆ ನಡೆಸುತ್ತವೆ.
ಕೇಂದ್ರ ಸರ್ಕಾರದ ಸ್ವಾಮ್ಯದಲ್ಲಿರುವ ಶಾಲೆಗಳಲ್ಲಿ ಶಿಕ್ಷಕರಾಗಲು ಕೇಂದ್ರ ಶಿಕ್ಷಕರ ಅರ್ಹತಾ ಪರೀಕ್ಷೆ ( CTET )ಬರೆಯಬೇಕು. ರಾಜ್ಯ ಸರ್ಕಾರದ ಸ್ವಾಮ್ಯದಲ್ಲಿರುವ ಶಾಲೆಗಳಲ್ಲಿ ಶಿಕ್ಷಕರಾಗಲು ರಾಜ್ಯ ಸರ್ಕಾರವು ನಡೆಸುವ ಟಿಇಯಲ್ಲಿ ಅರ್ಹತೆ ಪಡೆಯಬೇಕು. ಕೆಲವು ಖಾಸಗಿ ಶಾಲೆಗಳು ಕೂಡ ಈ ಪರೀಕ್ಷೆಯ ಅರ್ಹತೆಯನ್ನು ಶಿಕ್ಷಕರ ನಿಯುಕ್ತಿಯ ಸಮಯದಲ್ಲಿ ಪರಿಗಣಿಸುತ್ತವೆ. ಪ್ರಸ್ತುತ, ಕೇಂದ್ರ ಪ್ರೌಢ ಶಿಕ್ಷಣ ಮಂಡಳಿಯು ಇTಉT ನಡೆಸುತ್ತದೆ. ವರ್ಷದಲ್ಲಿ ಎರಡು ಬಾರಿ ಈ ಪರೀಕ್ಷೆ ನಡೆಸಲಾಗುತ್ತದೆ.
CTET ಪರೀಕ್ಷೆಯು ಎರಡು ಪತ್ರಿಕೆಗಳನ್ನು ಒಳಗೊಂಡಿರುತ್ತದೆ. ಪತ್ರಿಕೆ-1 ಕೇವಲ 1 ರಿಂದ 5ನೇ ತರಗತಿಯ ಶಿಕ್ಷಕರಿಗೆ ಹಾಗೂ ಪತ್ರಿಕೆ-2 ಕೇವಲ 6 ರಿಂದ 8ನೇ ತರಗತಿಯ ಶಿಕ್ಷಕರಿಗೆ. ಒಂದು ವೇಳೆ 1 ರಿಂದ 8ನೇ ತರಗತಿಗಳಲ್ಲಿ ಪಾಠಮಾಡಲು ಅರ್ಹತೆಯನ್ನು ಪಡೆಯಬೇಕಾದರೆ ಪತ್ರಿಕೆ-1 ಮತ್ತು ಪತ್ರಿಕೆ-2 ಎರಡನ್ನು ಬರೆಯಬೇಕು. ಎರಡೂ ಪತ್ರಿಕೆಗಳು ವಸ್ತುನಿಷ್ಠ ಮಾದರಿಯ ಬಹುಆಯ್ಕೆ ಪ್ರಶ್ನೆಗಳನ್ನು ಹೊಂದಿರುತ್ತವೆ.
ಕರ್ನಾಟಕ ರಾಜ್ಯ ಸರ್ಕಾರವು ನಡೆಸುವ TಉT ಕೇಂದ್ರದ ಮಾದರಿಯನ್ನೇ ಅನುಸರಿಸುತ್ತದೆ. TET ತೆಗೆದುಕೊಳ್ಳಲು ವಯಸ್ಸಿನ ಮಿತಿಯಿಲ್ಲ.ಎಷ್ಟು ಬಾರಿ ಬೇಕಾದರೂ ಪರೀಕ್ಷೆ ತೆಗೆದುಕೊಳ್ಳಬಹುದು. ಈ ಪರೀಕ್ಷೆಗಾಗಿ ನೀವು ಎನ್‌ಸಿಟಿಇ ಸಂಸ್ಥೆ ಶಿಫಾರಸು ಮಾಡಿರುವ ಪುಸ್ತಕಗಳನ್ನು ಓದಿದರೆ ಹೆಚ್ಚು ಅನುಕೂಲವಾಗುತ್ತದೆ. ಇನ್ನುಳಿದಂತೆ ಆಯಾ ವಿಷಯಕ್ಕೆ ಸಂಬಂಧಿಸಿದ ಪದವಿ ಮಟ್ಟದ ಪುಸ್ತಕಗಳನ್ನು ಅಭ್ಯಾಸಮಾಡಬಹುದು. ಹೆಚ್ಚಿನ ಮಾಹಿತಿ ಬೇಕಿದ್ದಲ್ಲಿ: http://ctet.nic.in ಮತ್ತು http://kartet.caconline.in