ಒಬ್ಬೊಬ್ಬರಿಗೆ ಒಂದೊಂದು ರೀತಿಯ ಪ್ರತಿಭೆಗಳು ಒಲಿದಿರುತ್ತವೆ. ಕೆಲವರು ನೃತ್ಯದಲ್ಲಿ ನಿಪುಣರಾಗಿದ್ದರೆ, ಇನ್ನು ಕೆಲವರು ಅಭಿನಯ, ಸಂಗೀತ, ಚಿತ್ರಕಲೆ, ಕ್ರೀಡೆ ಇತ್ಯಾದಿಗಳಲ್ಲಿ ಚತುರರಾಗಿರುತ್ತಾರೆ. ತಮಗೆ ಒಲಿದಿರುವ ಪ್ರತಿಭೆಯಲ್ಲಿಯೇ ಉನ್ನತ ಸಾಧನೆಗಳನ್ನು ಮಾಡುತ್ತಾರೆ. ಇಂತಹ ಓರ್ವ ಪ್ರತಿಭಾವಂತ ಬಾಲಕಿಯೇ ಅರ್ಚನಾ ಎಂ. ಬೆಂಗಳೂರಿನ ಈ ಬಾಲೆಗೆ ಚಿತ್ರಕಲೆ ಮುಂತಾದ ಕಲಾ ಪ್ರಕಾರಗಳಲ್ಲಿ ವಿಪರೀತ ಆಸಕ್ತಿ. ಅದರಲ್ಲಿಯೇ ಆಕೆ ವಿವಿಧ ಪ್ರಯೋಗಗಳನ್ನು ಮಾಡಿ ಗಮನ ಸೆಳೆದಿದ್ದಾಳೆ.
ಎನ್‌.ಮುಕುಂದ ಮತ್ತು ಬಿ.ಆರ್‌ ಶಾಂತ ದಂಪತಿಯ ಪುತ್ರಿಯಾಗಿರುವ ಅರ್ಚನಾ, ಚಿತ್ರಕಲೆ, ರಂಗೋಲಿ ಮತ್ತು ಆರ್ಟ್‌ ವರ್ಕ್‌ನಲ್ಲಿ ತೋರಿಸಿರುವ ಕ್ರಿಯಾಶೀಲತೆ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ. ಹೊಸ ವಸ್ತು, ಸಮಕಾಲೀನ ಆಗುಹೋಗುಗಳಿಗೆ ಸ್ಪಂದಿಸುವ ಮನೋಭಾವ ಮತ್ತು ಪ್ರಯೋಗಶೀಲತೆಗಳು ಈಕೆಯ ಚಿತ್ರಕಲೆಯ ವಿಶೇಷಗಳು. ಈ ಕಾರಣಕ್ಕೆ ಈಕೆ ಬಿಡಿಸಿದ ಚಿತ್ರ ಮತ್ತು ಇನ್ನಿತರ ಕಲಾ ಪ್ರಕಾರಗಳು ಸದಾಕಾಲ ನೆನಪಿನಲ್ಲಿ ಉಳಿಯುತ್ತವೆ.
ಬೆಂಗಳೂರಿನ ಜ್ಯೋತಿ ಕೇಂದ್ರಿಯ ವಿದ್ಯಾಲಯದಲ್ಲಿ 7ನೇ ತರಗತಿಯಲ್ಲಿ ಓದುತ್ತಿರುವ ಅರ್ಚನಾ ಹಲವಾರು ಸಂಘ, ಸಂಸ್ಥೆಗಳು ನಡೆಸಿದ ಚಿತ್ರಕಲೆ ಸ್ಪರ್ಧೆಗಳಲ್ಲಿ ಭಾಗವಹಿಸಿ ಬಹುಮಾನ ಗೆದ್ದಿದ್ದಾಳೆ. ಡೈಲಾಗ್‌ ರೈಟಿಂಗ್‌ನಲ್ಲೂ ಈಕೆಗೆ ವಿಶೇಷ ಆಸಕ್ತಿಯಿದೆ. ಈ ಕುರಿತಾದ ಸ್ಪರ್ಧೆಯಲ್ಲೂ ಪಾಲ್ಗೊಂಡು ಬಹುಮಾನ ಪಡೆದ ಹೆಗ್ಗಳಿಕೆ ಈಕೆಯದ್ದು. ಕನ್ನಡ ಭಾಷೆಯನ್ನು ತುಂಬಾ ಇಷ್ಟಪಡುವ ಈಕೆಗೆ ಅದರಲ್ಲೂ ಏನಾದರೂ ವಿಶೇಷವಾದ ಕೆಲಸವನ್ನು ಮಾಡುವ ಹಂಬಲವಿದೆ.
ಚಿತ್ರಕಲೆ ಮುಂತಾದ ಹವ್ಯಾಸಗಳ ಜೊತೆಗೆ ಓದಿನಲ್ಲೂ ಮುಂದಿರುವ ಈಕೆಗೆ ಮುಂದಿನ ದಿನಗಳಲ್ಲಿ ತನ್ನಿಷ್ಟದ ಕ್ಷೇತ್ರದಲ್ಲಿ ಅತ್ಯುತ್ತಮವಾದ ಸಾಧನೆ ಮಾಡಬೇಕೆಂಬ ಆಸೆಯಿದೆ. ಇದಕ್ಕೆ ಆಕೆಯ ಹೆತ್ತವರ ಬೆಂಬಲವೂ ಇದೆ. ಬೆಳೆಯುವ ಪೈರು ಮೊಳಕೆಯಲ್ಲಿ ಎಂಬಂತೆ ಭವಿಷ್ಯದಲ್ಲಿ ಈಕೆ ಉದಯೋನ್ಮುಖ ಚಿತ್ರ ಕಲಾವಿದೆಯಾಗಿ ಬೆಳೆಯುವ ಎಲ್ಲಾ ಲಕ್ಷ ಣಗಳು ಈಗಲೇ ಗೋಚರಿಸುತ್ತಿವೆ.