ಕಿಡ್ಸ್‌ಕ್ರಾಫ್ಟ್‌: ಕಾರಿಗಳ ಗೊಂಬೆ

ಅಡುಗೆ ಮನೆಯಲ್ಲಿ ಸಿಗುವ ತರಕಾರಿಗಳಿಗೆ ಒಂದೊಂದು ಬಣ್ಣ, ಒಂದೊಂದು ಆಕಾರವಿರುತ್ತದೆ. ಇವುಗಳನ್ನು ಬಳಸಿಕೊಂಡು ಸುಂದರವಾದ ಅಲಂಕಾರಿಕ ವಸ್ತುಗಳನ್ನು ಮಾಡಲು ಸಾಧ್ಯವಿದೆ. ಇಲ್ಲಿ ನಿಮಗೆ ವಿವಿಧ ತರಕಾರಿಗಳಿಂದ ಗೊಂಬೆ ಮಾಡುವ ವಿಧಾನವನ್ನು ವಿವರಿಸಲಾಗಿದೆ.

ಬೇಕಾಗುವ ಸಾಮಗ್ರಿ

ದೊಡ್ಡ ಕ್ಯಾಪ್ಸಿಕಂ-1, ದೊಡ್ಡ ಟೊಮ್ಯಾಟೋ-1, ನಸು ಹಣ್ಣಾಗಿರುವ ಚಿಕ್ಕ ಟೊಮ್ಯಾಟೋ-1, ಮೊಳಕೆ ಬಂದಿರುವ ಬಿಳಿ ಈರುಳ್ಳಿ-1(ಟೋಪಿಗೆ), ಬಟಾಣಿ ಕಾಳು-ಸ್ವಲ್ಪ, ಸಣ್ಣಗೆ ಕತ್ತರಿಸಿದ ಕ್ಯಾರೆಟ್‌-ಸ್ವಲ್ಪ(ಸರಕ್ಕೆ), ಕಾಲಿನ ಆಕಾರದಂತೆ ಕತ್ತರಿಸಿದ ಕ್ಯಾರೆಟ್‌ ತುಂಡುಗಳು-2, ಸಣ್ಣ ಕ್ಯಾರೆಟ್‌ ತುಂಡು-1 (ಮೂಗಿಗೆ), ಬೀನ್ಸ್‌-2, ಚಿಕ್ಕ ರಬ್ಬರ್‌ ಬ್ಯಾಂಡ್‌-2 (ಕೈಗಳಿಗೆ ಮತ್ತು ಬಳೆಗಳಿಗೆ), ಲವಂಗ-3 (ಕಣ್ಣುಗಳು ಮತ್ತು ಬಾಯಿಗೆ), ಗುಂಡು ಪಿನ್‌ ಮತ್ತು ಮರದ ಟೂತ್‌ ಪಿಕ್‌-ಸ್ವಲ್ಪ, ಸ್ಟಾರ್‌ ಸ್ಟಿಕ್ಕರ್‌-1 (ಹಣೆಗೆ), ದುಂಡನೆಯ ಸ್ಟಿಕ್ಕರ್‌-1 (ಕತ್ತಿನ ಕೆಳಗಿನ ಬಟನ್‌ಗೆ).

ಮಾಡುವ ವಿಧಾನ

1. ಮೊದಲು ತರಕಾರಿಗಳನ್ನು ತೊಳೆದು ಒರೆಸಿಡಿ. ಬಳಿಕ ಕ್ಯಾಪ್ಸಿಕಂನ ಮೇಲಿನ ತೊಟ್ಟನ್ನು ನಿಧಾನವಾಗಿ ತೆಗೆಯಿರಿ.

2. ಈ ಕ್ಯಾಪ್ಸಿಕಂಗೆ ಎರಡು ಟೂತ್‌ಪಿಕ್‌ಗಳನ್ನು ಅಕ್ಕಪಕ್ಕ ಚುಚ್ಚಿ ದೊಡ್ಡ ಟೊಮ್ಯಾಟೋ ಹಣ್ಣನ್ನು ಸಿಕ್ಕಿಸಿ. ಅದರ ಮೇಲೆ ಮತ್ತೆರಡು ಟೂತ್‌ಪಿಕ್‌ಗಳನ್ನು ಚುಚ್ಚಿ ಚಿಕ್ಕ ಟೊಮ್ಯಾಟೋ ಕೂರಿಸಿ.

3. ಚಿಕ್ಕ ಟೊಮ್ಯಾಟೋಗೆ ಎರಡು ಕಣ್ಣುಗಳು, ಬಾಯಿಯಂತೆ ಕಾಣಲು ಮೂರು ಕಡೆ ಲವಂಗ ಚುಚ್ಚಿ.ಮೂಗಿಗೆ ಸಣ್ಣ ಕ್ಯಾರೆಟ್‌ ತುಂಡನ್ನು ಕತ್ತರಿಸಿ ಚುಚ್ಚಿರಿ. ಹಣೆಗೊಂದು ಸ್ಟಾರ್‌ ಸ್ಟಿಕ್ಕರ್‌ ಅಂಟಿಸಿ.

4. ಈಗ ಎರಡೂ ಟೊಮ್ಯಾಟೋಗಳ ಮಧ್ಯದಿಂದ ಹಿಂದಿನಿಂದ ಎರಡೂ ಕಡೆಗೆ ಬೀನ್ಸ್‌ ಇಟ್ಟು ಒಂದೊಂದು ಗುಂಡು ಪಿನ್‌ ಚುಚ್ಚಿರಿ. ಬಳೆಗಳಂತೆ ಕಾಣಲು ಕೆಂಪು ರಬ್ಬರ್‌ ಬ್ಯಾಂಡ್‌ಗಳನ್ನು ಡಬ್ಬಲ್‌ ಮಾಡಿ ಬೀನ್ಸ್‌ಗೆ ಹಾಕಿ.

5. ಬಟಾಣಿ ಮತ್ತು ಕ್ಯಾರೆಟ್‌ ತುಂಡುಗಳನ್ನು ಪೋಣಿಸಿ ಸರ ಮಾಡಿ ಕತ್ತಿಗೆ ಹಾಕಿರಿ. ಬಿಳಿ ಈರುಳ್ಳಿಯ ಮೇಲಿನ ಭಾಗವನ್ನು ಮೊಳಕೆ ಸಹಿತ ಸ್ವಲ್ಪ ಕತ್ತರಿಸಿ ತಲೆಯ ಮೇಲಿಟ್ಟು ಗುಂಡು ಪಿನ್‌ನಿಂದ ಚುಚ್ಚಿ ಕೂರಿಸಿ. ಟೋಪಿಯ ಮುಂದೆ ಮಧ್ಯದಲ್ಲಿ ಒಂದು ಕ್ಯಾರೆಟ್‌ ತುಂಡಿಟ್ಟು ಪಿನ್‌ ಚುಚ್ಚಿರಿ.

6. ಕಾಲಿನಂತೆ ಕಾಣಲು ಕ್ಯಾಪ್ಸಿಕಂ ಕೆಳಗಡೆ ಎರಡೂ ಕಡೆ ಕ್ಯಾರೆಟ್‌ ತುಂಡುಗಳನ್ನು ಗುಂಡು ಸೂಜಿಯ ಸಹಾಯದಿಂದ ನಿಲ್ಲಿಸಿ. ಈಗ ಇದು ಹಸಿರು ಬಣ್ಣದ ದೊಗಲೆ ಪೈಜಾಮ ಹಾಕಿದ ಗೊಂಬೆಯಂತೆ ಸುಂದರವಾಗಿ ಕಾಣುತ್ತದೆ.

ಲೀಲಾ ಚಂದ್ರಶೇಖರ