ಕಿಡ್ಸ್‌ ಕ್ರಾಫ್ಟ್‌: ಅಲ್ಯೂಮಿನಿಯಂ ತಂತಿಯ ಹೂವಿನ ಬುಟ್ಟಿ

ನಮಗೆ ನಿರುಪಯುಕ್ತವೆಂದೆನಿಸುವ ವಸ್ತುಗಳು ಒಬ್ಬ ಕುಶಲಕರ್ಮಿಯ ಕೈಗೆ ಸಿಕ್ಕರೆ ಒಂದು ಅದ್ಭುತ ಕಲಾಕೃತಿ ಸೃಷ್ಟಿಯಾಗುವುದರಲ್ಲಿ ಎರಡು ಮಾತಿಲ್ಲ. ಹೊಸದಾಗಿ ವಿದ್ಯುತ್‌ ತಂತಿಯನ್ನು ಬದಲಾಯಿಸುವ ವೇಳೆಯಲ್ಲಿ ಅಥವಾ ವಿದ್ಯುತ್‌ ಲೈನ್‌ ದುರಸ್ತಿಗೊಳಿಸುವ ಸಂದರ್ಭದಲ್ಲಿ ಹಳೆಯ ಅಲ್ಯೂಮಿನಿಯಂ ತಂತಿಯ ಚೂರುಗಳು ಬಿದ್ದಿರುತ್ತವೆ. ಅದನ್ನೆಲ್ಲವನ್ನೂ ಸಂಗ್ರಹಿಸಿಟ್ಟುಕೊಂಡು ಒಂದು ರಾಶಿಯಾದ ಬಳಿಕ ಅವುಗಳಿಂದ ಸುಂದರ ವಸ್ತುಗಳನ್ನು ತಯಾರಿಸಬಹುದು. ಇಂತಹ ತಂತಿಗಳನ್ನು ಉಪಯೋಗಿಸಿ ಸುಂದರವಾದ ಬುಟ್ಟಿ ಮಾಡಬಹುದಾದ ಸರಳ ವಿಧಾನ ಇಲ್ಲಿದೆ.

ಬೇಕಾಗುವ ವಸ್ತುಗಳು

ಅಲ್ಯೂಮಿನಿಯಂ ತಂತಿ (ಬುಟ್ಟಿಯ ಗಾತ್ರಕ್ಕನುಗುಣವಾಗಿ), ತಂತಿಯನ್ನು ಕತ್ತರಿಸಲು ಮತ್ತು ಸುರುಳಿ ಮಾಡಲು ಉಪಯೋಗಿಸುವ ಕಟರ್‌ ಅಥವಾ ಪಕ್ಕಡ್‌.

ಮಾಡುವ ವಿಧಾನ

1. ಒಂದೇ ಅಳತೆಯ ಮೂರು ಹಾಗೂ ಇದಕ್ಕಿಂತ ಸ್ವಲ್ಪ ಉದ್ದವಿರುವ ಇನ್ನೆರಡು ಅಂದರೆ ಒಟ್ಟು ಐದು ತಂತಿಗಳನ್ನು ಆಯ್ದುಕೊಳ್ಳಿ.

2. ಎಲ್ಲಾ ತಂತಿಗಳನ್ನು ಒಂದರ ಮೇಲೊಂದರಂತೆ ಕ್ರಾಸ್‌ ಮಾದರಿಯಲ್ಲಿ ಜೋಡಿಸಿ. ಉದ್ದವಿರುವ ತಂತಿಗಳು ಎರಡು ಕಡೆ ಅಕ್ಕಪಕ್ಕದಲ್ಲಿಯೇ ಇರುವಂತೆ ಜೋಡಿಸಬೇಕು.

3. ಈಗ ಇಟ್ಟಿರುವ ಬುಟ್ಟಿಯ ಮಾದರಿ ಕದಲದಂತೆ ತಂತಿಯನ್ನು ಸುತ್ತಿ ಬುಟ್ಟಿಗೆ ಬುಡ ಮಾಡಿ.

4. ಬಳಿಕ ತಂತಿಯನ್ನು ಬುಟ್ಟಿಯ ಆಕೃತಿ ಬರುವಂತೆ ಮೇಲ್ಮುಖವಾಗಿ ನಿಲ್ಲಿಸಿ. ಇದು ಅಲ್ಯೂಮಿನಿಯಂ ತಂತಿಯಾದ್ದರಿಂದ ಸುಲಭವಾಗಿ ಬಾಗುತ್ತದೆ.

5. ಈಗ ಇನ್ನೊಂದು ತಂತಿಯಿಂದ ಜೋಡಿಸಿರುವ ಪ್ರತಿ ಎಳೆಗೂ ಒಂದು ಸುತ್ತು ಸುತ್ತುತ್ತಾ ತಂತಿಯ ತುದಿಯವರೆಗೂ ಸುತ್ತಬೇಕು.

6. ಕೊನೆಗೆ ಗಿಡ್ಡ ತಂತಿಯ ಹೆಚ್ಚುಳಿದ ಭಾಗವನ್ನು ಅದೇ ಸಾಲಿನಲ್ಲಿ ಬಗ್ಗಿಸಬೇಕು. ಉದ್ದ ತಂತಿಯನ್ನು ಬುಟ್ಟಿಯ ಹಿಡಿಕೆಯಂತೆ ಬಾಗಿಸಿ ಬೇರೊಂದು ತಂತಿಯಿಂದ ಸುತ್ತುವ ಮೂಲಕ ನಮಗೆ ಬೇಕಾದ ರೀತಿಯಲ್ಲಿ ಹಿಡಿಕೆ ಮಾಡಿದರಾಯ್ತು.

ಭವ್ಯಾ ನೇರಲಜಡ್ಡಿ