ಶಿಶುಗೀತೆ: ಸಂಜೆಯ ಮಳೆ

ಹೊರಾ.ಪರಮೇಶ್‌

ತೊಳೆಯಿತು ಹಳ್ಳಿಯ ಕಸ ಕಡ್ಡಿ ಕೊಳೆ

ಹೊಲ ಗದ್ದೆಗಳಿಗೆ ಬಂತು ಜೀವ ಕಳೆ

ಹರುಷದಿ ಜಳಕವ ಮಾಡಿತು ಇಳೆ

ತುಂಟ ಮಕ್ಕಳು ಛತ್ರಿಯ ಹಿಡಿದು

ಸಂಗ್ರಹಿಸಿದರು ಆಲಿಕಲ್ಲುಗಳ

ಹಾರಿ ಹೋಯಿತು ಛತ್ರಿಯು ದೂರ

ಗಾಳಿಯ ಆರ್ಭಟವಿತ್ತು ಬಹಳ

ಬಾಲವ ಎತ್ತಿದ ಹಸು ಎಮ್ಮೆಗಳು

ಏದುಸಿರಿಡುತ ಓಡಿದವು ಮನೆಗೆ

ರೆಕ್ಕೆಯ ಬಡಿಯುತ ಪಕ್ಷಿಗಳೆಲ್ಲ

ಹಾರಿದವು ತಮ್ಮ ಗೂಡಿನ ಕಡೆಗೆ

ಗಂಟೆಗಟ್ಟಲೆ ಸುರಿದ ಮಳೆಗೆ

ತುಂಬಿಕೊಂಡವು ಕೆರೆಕಟ್ಟೆಗಳು

ವಟಗುಟ್ಟುತಲಿ ಹಾಡತೊಡಗಿದವು

ಕಲ್ಲು ಸಂದಿಯ ಕಪ್ಪೆಗಳು

ಜೋರು ಗಾಳಿ ಮಳೆ ಆರ್ಭಟಕೆ

ಧರೆಗುರುಳಿದವು ರಸ್ತೆ ಮರಗಳು

ವಿದ್ಯುತ್‌ ತಂತಿಯು ತುಂಡಾಗಲು

ಕತ್ತಲಲಿ ಕಳೆವಂತಾಯಿತು ಇರುಳು

ಮಳೆ ಸುರಿವಾಗ ಆಗುವ ತೊಂದರೆ

ಸಹಿಸಬೇಕಾದುದು ಅನಿವಾರ್ಯ

ನಲಿವಿನ ಹಿಂದೆ ನೋವು ಇರುವುದು

ಜೀವನ ಸಾರದಲ್ಲಿರುವ ಸ್ವಾರಸ್ಯ.