ನಿಮ್ಮ ಕೈಯನ್ನು ನಿಮ್ಮ ಬಾಯಿಯ ಎದುರಿಗಿಟ್ಟು ತೆರೆದ ಬಾಯಿಯಿಂದ ಗಾಳಿಯೂದಿ. ನಿಮ್ಮ ಅಂಗೈಗೆ ಬರುವ ಗಾಳಿ ಬಿಸಿಯಾಗಿರುತ್ತದೆ. ಈಗ ನಿಮ್ಮ ಬಾಯಿಯನ್ನು ಮುಚ್ಚಿ ಮತ್ತೆ ಅದೇ ಕೈಗೆ ಗಾಳಿಯೂದಿ. ಈ ಗಾಳಿ ತಣ್ಣಗಿರುತ್ತದೆ. ಇದಕ್ಕೆ ಕಾರಣವೇನು?
ನೀವು ತೆರೆದ ಬಾಯಿಂದ ಊದಿದ ಗಾಳಿ ಬಹುತೇಕ ದೇಹದೊಳಗೆ ಇರುವ ಉಷ್ಣತೆಗೆ ಸಮವಾಗಿರುವ ಕಾರಣ ಅದು ಬಿಸಿಯಾಗಿರುತ್ತದೆ. ಮುಚ್ಚಿದ ತುಟಿಗಳಿಂದ ಊದಿದಾಗ ಬರುವ ಗಾಳಿಯು ನಿಮ್ಮ ಬಾಯೊಳಗೆ ಕುಗ್ಗಿರುವ ಗಾಳಿಯಾಗಿರುತ್ತದೆ. ಇದನ್ನು ನೀವು ಬಾಯಿಯಲ್ಲಿ ಹೊರಗೆ ಬಿಟ್ಟಾಗ ಅದು ವಿಸ್ತರಿಸುವ ಕಾರಣ ತಣ್ಣಗಾಗುತ್ತದೆ. ತುಟಿಯೊಳಗಿಂದ ವೇಗವಾಗಿ ಬರುವ ಗಾಳಿಯು ಅಂಗೈಗೆ ಅಪ್ಪಳಿಸುವ ಮುನ್ನ ತನ್ನ ಸುತ್ತಮುತ್ತವಿರುವ ತಣ್ಣನೆಯ ಗಾಳಿಯನ್ನು ಹೀರಿಕೊಳ್ಳುವ ಕಾರಣಕ್ಕೂ ಅದು ತಣ್ಣಗಾಗುತ್ತದೆ.