ಸರಳ ವಿಜ್ಞಾನ: ವಾತಾವರಣವಿರುವ ಏಕೈಕ ಚಂದ್ರ

ನಮ್ಮ ಚಂದ್ರನಲ್ಲಿ ವಾತಾವರಣವಿಲ್ಲ ಎಂದು ಎಲ್ಲರಿಗೂ ತಿಳಿದಿದೆ. ಸೌರವ್ಯೂಹದಲ್ಲಿ ವಾತಾವರಣವಿರುವ ಯಾವುದಾದರೂ ಉಪಗ್ರಹವಿದೆಯೇ?

ವಾತಾವರಣವಿರುವ ಏಕೈಕ ಚಂದ್ರನ ಹೆಸರು ಟೈಟಾನ್‌. ಇದು ಶನಿ ಗ್ರಹದ ಉಪಗ್ರಹವಾಗಿದೆ. 1655 ರಲ್ಲಿ ಕಂಡು ಹಿಡಿಯಲಾದ ಈ ಉಪಗ್ರಹ ಬುಧ ಗ್ರಹದಷ್ಟು ದೊಡ್ಡದಾಗಿದೆ. ಇದರ ದಟ್ಟ ವಾತಾವರಣವು ಬಹುತೇಕ ನೈಟ್ರೋಜನ್‌ನಿಂದ ಮಾಡಲ್ಪಟ್ಟಿದೆ. ಇಲ್ಲಿ ಮಿಥೇನ್‌ ಮತ್ತು ಇಥೇನ್‌ ಕೂಡಾ ಕಂಡು ಬಂದಿವೆ. ಟೈಟಾನ್‌ನ ಮೇಲ್ಮೈಯಲ್ಲಿರುವ ವಾತಾವರಣದ ಒತ್ತಡವು ಭೂಮಿಯ ಒತ್ತಡಕ್ಕಿಂತ 1.6 ಪಟ್ಟು ಹೆಚ್ಚಿದೆ.

ನಾಸಾ ಸಂಸ್ಥೆ 1997 ರಲ್ಲಿ ಕ್ಯಾಸಿನಿ ಎಂಬ ಬಾಹ್ಯಾಕಾಶ ನೌಕೆಯನ್ನು ಉಡಾವಣೆ ಮಾಡಿದ್ದು, ಇದು 2004, ಜುಲೈ 1 ರಂದು ಶನಿ ಗ್ರಹಕ್ಕೆ ತಲುಪಿತು. 2004, ಡಿಸೆಂಬರ್‌ ತಿಂಗಳಿಗೆ ಇದರಲ್ಲಿರುವ ಹುಜೆನ್ಸ್‌ ಎಂಬ ಪತ್ತೆ ಯಂತ್ರ ಪ್ರತ್ಯೇಕಗೊಂಡು, 2005 ರ ಜನವರಿ ತಿಂಗಳಿಗೆ ಟೈಟಾನ್‌ ಉಪಗ್ರಹಕ್ಕೆ ಬಂದಿಳಿಯಿತು. ಈ ಯಂತ್ರ ಟೈಟಾನ್‌ ಉಪಗ್ರಹದ ವೈಜ್ಞಾನಿಕ ಮಾಹಿತಿಗಳನ್ನು ಮತ್ತು ಅದರ 350 ಕ್ಕೂ ಹೆಚ್ಚಿನ ಚಿತ್ರಗಳನ್ನು ಭೂಮಿಗೆ ಕಳುಹಿಸಿದೆ.