ಸರಳ ವಿಜ್ಞಾನ: ಕಪ್ಪು ಕನ್ನಡಕ

ನನ್ನ ಸ್ನೇಹಿತನೊಬ್ಬ ಫೋಟೊಕ್ರೋಮಿಕ್‌ ಗಾಜಿನಿಂದ ಮಾಡಿದ ಸನ್‌ಗ್ಲಾಸ್‌ ಬಳಸುತ್ತಾನೆ. ಇದನ್ನು ಮನೆಯೊಳಗೆ ಧರಿಸಿದಾಗ ಸ್ಪಷ್ಟವಾಗಿ ಕಾಣುತ್ತದೆ. ಆದರೆ ಹೊರಗಡೆ ಸೂರ್ಯನ ಬೆಳಕಿನಲ್ಲಿ ಧರಿಸಿದಾಗ ಕಣ್ಣು ಕತ್ತಲೆಯಾಗುತ್ತದೆ. ಇದಕ್ಕೆ ಕಾರಣವೇನು? ಕನ್ನಡಕ ಸ್ಪಷ್ಟವಾಗಿ ಕಾಣಲು ಏನು ಮಾಡಬೇಕು?

ಫೋಟೊಕ್ರೋಮಿಕ್‌ ಗಾಜಿನಲ್ಲಿರುವ ಸಿಲ್ವರ್‌ ಅಯೋಡೈಡ್‌ ಅಥವಾ ಬ್ರೊಮೈಡ್‌ ಹರಳುಗಳು ಸೂರ್ಯನ ಬೆಳಕಿನಲ್ಲಿ ವಿಭಜನೆಯಾಗಿ ಬೆಳ್ಳಿಯ ಕಣಗಳಾಗಿ ರೂಪುಗೊಳ್ಳುತ್ತವೆ. ಈ ಬೆಳ್ಳಿ ಲೋಹ ಕತ್ತಲೆ ಉಂಟು ಮಾಡುತ್ತದೆ. ಸೂರ್ಯನ ಬೆಳಕಿನಿಂದ ಆಚೆ ಹೋದಾಗ ಬೆಳ್ಳಿ ಕಣಗಳು ಹ್ಯಾಲೊಜೆನ್‌ನ ಸಹಾಯದಿಂದ ಮರು ಸಂಯೋಜನೆಗೊಂಡು ಬಣ್ಣರಹಿತ ಹಾಲೈಡ್‌ ಆಗಿ ರೂಪುಗೊಳ್ಳುತ್ತವೆ.

ಫೋಟೊಗ್ರಾಫಿಕ್‌ ಫಿಲ್ಮ್‌ನ ಚಿತ್ರ ರೂಪುಗೊಳ್ಳುವಂತೆ ಈ ಪ್ರಕ್ರಿಯೆ ನಡೆಯುತ್ತದೆ. ಒಂದೇ ಒಂದು ವ್ಯತ್ಯಾಸವೆಂದರೆ, ಫೋಟೊಗ್ರಾಫಿಕ್‌ ಫಿಲ್ಮ್‌ನಲ್ಲಿ ಬೆಳ್ಳಿ ಕಣಗಳು ಅದರ ಹರಳುಗಳಿಂದ ಶಾಶ್ವತವಾಗಿ ಪ್ರತ್ಯೇಕವಾಗುತ್ತವೆ.