ಸರಳ ವಿಜ್ಞಾನ: ಅಧಿಕ ಉಷ್ಣತೆಗೆ ಹಾಳಾಗುವ ಬಲ್ಬ್ ತಂತು

ನಾನೊಮ್ಮೆ ಲೈಟ್‌ ಆನ್‌ ಮಾಡಿದಾಗ ಬಲ್ಬ್ ಬೆಳಗಲೇ ಇಲ್ಲ. ಆ ಬಲ್ಬ್ ತೆಗೆದು ನೋಡಿದಾಗ ಅದರೊಳಗಿನ ತಂತು ಮುರಿದು ಹೋಗಿತ್ತು. ಇದಕ್ಕೆ ಕಾರಣವೇನು?

ಬಲ್ಬ್ನೊಳಗಿರುವ ತಂತುವಿನಲ್ಲಿ ವಿದ್ಯುತ್‌ ಹರಿದಾಗ ಅದು ತುಂಬಾ ಬಿಸಿಯಾಗಿ ಶುಭ್ರ ಮತ್ತು ಬಿಸಿ ಬೆಳಕನ್ನು ಹೊರಹೊಮ್ಮಿಸುತ್ತದೆ. ಶಾಖದಿಂದ ತಂತುವಿನಲ್ಲಿ ಸಣ್ಣ ಬಿರುಕುಗಳು ಮೂಡುತ್ತವೆ. ಶಾಖ ಹೆಚ್ಚಿದಂತೆ ಈ ಬಿರುಕುಗಳು ಅಗಲವಾಗುತ್ತವೆ. ಬಲ್ಬನ್ನು ವಾರಗಳು ಮತ್ತು ತಿಂಗಳುಗಳ ಕಾಲ ಬಳಸಿದಂತೆ ಈ ಬಿರುಕುಗಳಲ್ಲಿ ಒಂದು ಬಿರುಕು ತಂತುವಿನ ಎಲ್ಲಾ ಕಡೆಗೂ ಲಂಬವಾಗಿ ಎಳೆಯಲ್ಪಟ್ಟು ಅದನ್ನು ಇಬ್ಭಾಗ ಮಾಡುತ್ತದೆ. ಇಬ್ಭಾಗವಾದ ತಂತುವಿನಲ್ಲಿ ವಿದ್ಯುತ್‌ ಹರಿಯುವುದಿಲ್ಲ. ಇದನ್ನೇ ನಾವು ಬಲ್ಬ್ ಫ್ಯೂಸ್‌ ಆಗಿದೆ ಎನ್ನುತ್ತೇವೆ. ಆದ್ದರಿಂದ ಬಲ್ಬ್ ಬೆಳಗಲು ಅಗತ್ಯವಿರುವ ಶಾಖ ಅದು ಹಾನಿಗೊಳಗಾಗಲೂ ಕಾರಣವಾಗುತ್ತದೆ.