ಸರಳ ವಿಜ್ಞಾನ: ಕಾಂತೀಯ ಸ್ಟೀಲ್‌

ನನ್ನ ಆಂಟಿಯೊಬ್ಬರು ನನ್ನ ಅಮ್ಮನಿಗೆ ಮ್ಯಾಗ್ನೆಟಿಕ್‌ ಸ್ಟೈನ್‌ಲೆಸ್‌ ಸ್ಟೀಲ್‌ ಪಾತ್ರೆಗಳನ್ನು ಖರೀದಿಸುವಂತೆ ಹೇಳುತ್ತಿದ್ದರು. ಹಾಗಾದರೆ ಕಾಂತೀಯೇತರ ಸ್ಟೀಲ್‌ ಪಾತ್ರೆಗಳೂ ಇವೆಯೇ?

ಸ್ಟೈನ್‌ಲೆಸ್‌ ಸ್ಟೀಲ್‌ ಪಾತ್ರೆಗಳು ವಿವಿಧ ಗ್ರೇಡ್‌ಗಳಲ್ಲಿ ಸಿಗುತ್ತವೆ. ಇದರಲ್ಲಿ ಮುಖ್ಯವಾದ ಎರಡು ವಿಧವೆಂದರೆ ಮ್ಯಾಗ್ನೆಟಿಕ್‌ ಮತ್ತು ನಾನ್‌ ಮ್ಯಾಗ್ನೆಟಿಕ್‌. ಕಾಂತೀಯ ಸ್ಟೈನ್‌ಲೆಸ್‌ ಸ್ಟೀಲ್‌ನಲ್ಲಿ ಕಬ್ಬಿಣ ಮತ್ತು ಕ್ರೋಮಿಯಂ ಇರುತ್ತವೆ. ಕಾಂತೀಯೇತರ ಸ್ಟೈನ್‌ಲೆಸ್‌ ಸ್ಟೀಲ್‌ನಲ್ಲಿ ನಿಕ್ಕೆಲ್‌ ಜೊತೆಗೆ ಕಬ್ಬಿಣ ಮತ್ತು ಕ್ರೋಮಿಯಂ ಕೂಡಾ ಇರುತ್ತವೆ. ಸ್ಟೈನ್‌ಲೆಸ್‌ ಸ್ಟೀಲ್‌ಗೆ ನಿಕ್ಕೆಲ್‌ ಕಠಿಣ ಸುರಕ್ಷಾ ಕವಚವನ್ನು ಒದಗಿಸುತ್ತದೆ. ಆದರೆ ಇದು ಅಡುಗೆಗೆ ಬಳಸುವ ಸಾಮಾನ್ಯ ಸ್ಟೈನ್‌ಲೆಸ್‌ ಸ್ಟೀಲ್‌ ಪಾತ್ರೆಗಳಿಗೆ ಅಗತ್ಯವಿರುವುದಿಲ್ಲ. ಸ್ಟೈನ್‌ಲೆಸ್‌ ಪಾತ್ರೆಗಳಿಗೆ ತುಕ್ಕು ಹಿಡಿಯುವ ಗಂಭೀರ ಸಮಸ್ಯೆ ಎದುರಿಸುವ ರಾಸಾಯನಿಕ ಉತ್ಪನ್ನಗಳ ಕಾರ್ಖಾನೆಗಳಿಗೆ ಕಾಂತೀಯೇತರ ಸ್ಟೈನ್‌ಲೆಸ್‌ ಸ್ಟೀಲ್‌ ಪಾತ್ರೆಗಳ ಅಗತ್ಯವಿರುತ್ತದೆ. ಅಡುಗೆ ಮನೆಗೆ ಕಾಂತೀಯ ಸ್ಟೈನ್‌ಲೆಸ್‌ ಸ್ಟೀಲ್‌ನ ಪಾತ್ರೆಗಳು ಸಾಕಾಗುತ್ತವೆ. ಕಾಂತೀಯೇತರ ಸ್ಟೀಲ್‌ ಪಾತ್ರೆಗಳ ಬೆಲೆಯೂ ದುಬಾರಿಯಾಗಿರುವುದರಿಂದ ಅದನ್ನು ಅಡುಗೆ ಮಾಡಲು ಯಾರೂ ಬಳಸುವುದಿಲ್ಲ.