ಸರಳ ವಿಜ್ಞಾನ: ಅಪೂರ್ಣ ಚಿತ್ರಗಳು

ಒಮ್ಮೆ ನನ್ನ ಸಹೋದರ ಟೀವಿಯಲ್ಲಿ ವನ್ಯಜೀವಿ ಕುರಿತಾದ ಕಾರ್ಯಕ್ರಮ ನೋಡುತ್ತಿದ್ದನು. ಆಗ ಟೀವಿ ಪರದೆ ಮೇಲೆ ದಿಢೀರನೇ ಪ್ರತ್ಯಕ್ಷ ವಾದ ಅದ್ಭುತವಾದ ಹುಲಿಯ ಚಿತ್ರವನ್ನು ನಾನು ಕ್ಯಾಮರಾದಲ್ಲಿ ಸೆರೆ ಹಿಡಿದೆ. ನಂತರ ಅದರ ಫಿಲ್ಮನ್ನು ಡೆವಲಪ್‌ ಮಾಡಿ ನೋಡಿದಾಗ ಹುಲಿಯ ಚಿತ್ರ ಟೀವಿ ಪರದೆಯಲ್ಲಿ ಕಂಡಷ್ಟು ಸ್ಪಷ್ಟವಾಗಿ ಬಂದಿರಲಿಲ್ಲ. ಇದಕ್ಕೆ ಕಾರಣವೇನು?

ನಾವು ಟೀವಿ ಪರದೆಯಲ್ಲಿ ಒಂದು ಕ್ಷಿಪ್ರ ಅವಧಿಯಲ್ಲಿ ನೋಡುವ ಚಿತ್ರಗಳು ಮೂಲತಃ ಪರಿಪೂರ್ಣ ಚಿತ್ರವಾಗಿರುವುದಿಲ್ಲ. ಈ ಚಿತ್ರಗಳನ್ನು ಪರದೆಯಿಡೀ ಮೇಲಿನಿಂದ ಕೆಳಗೆ ಮತ್ತು ಸಾಲು ಸಾಲಾಗಿ ಚಲಿಸುವ ಎಲೆಕ್ಟ್ರಾನ್‌ ಕಿರಣವೊಂದು ಉತ್ಪಾದಿಸುತ್ತದೆ. ಈ ಸ್ಕ್ಯಾ‌ನಿಂಗ್‌ ಪ್ರಕ್ರಿಯೆ ತುಂಬಾ ವೇಗವಾಗಿ ನಡೆಯುತ್ತದೆ ಮತ್ತು ನಮ್ಮ ಕಣ್ಣುಗಳಲ್ಲಿರುವ ದೃಷ್ಟಿ ಸ್ಥಿರತೆಯಿಂದಾಗಿ ನಾವು ಟೀವಿ ಪರದೆಯ ಮೇಲೆ ಸಂಪೂರ್ಣ ಚಿತ್ರ ನೋಡಲು ಸಾಧ್ಯವಾಗುತ್ತದೆ.

ಆದರೆ ಕ್ಯಾಮರಾ ಲೆನ್ಸ್‌ಗಳಲ್ಲಿ ಈ ದೃಷ್ಟಿ ಸ್ಥಿರತೆ ಇರುವುದಿಲ್ಲ. ಅವು ಆ ನಿರ್ದಿಷ್ಟ ಕ್ಷಿಪ್ರ ಅವಧಿಯಲ್ಲಿ ಟೀವಿ ಮೇಲೆ ಮೂಡುವ ಚಿತ್ರದ ಭಾಗವನ್ನು ಮಾತ್ರ ನೋಡುತ್ತವೆ. ಆ ಚಿತ್ರ ಪರಿಪೂರ್ಣವಾಗಿ ಕ್ಯಾಮರಾದಲ್ಲಿ ಸೆರೆಯಾಗುವುದಿಲ್ಲ. ಆದ್ದರಿಂದ ಟೀವಿ ಪರದೆ ಮೇಲೆ ಬರುವ ಚಿತ್ರವನ್ನು ಸಾಮಾನ್ಯ ಕ್ಯಾಮರಾದಿಂದ ಸ್ಪಷ್ಟವಾಗಿ ತೆಗೆಯಲು ಆಗುವುದಿಲ್ಲ.