ಸರಳ ವಿಜ್ಞಾನ: ನಿರಂತರ ತರಂಗ

ಧ್ವನಿಯ ತರಂಗಗಳು ನಶಿಸುತ್ತವೆಯೇ ಅಥವಾ ಒಮ್ಮೆ ಬಂದ ಶಬ್ದ ಹಾಗೆಯೇ ಮುಂದುವರಿಯುತ್ತದೆಯೇ? ಇದೇ ರೀತಿ ಬೆಳಕಿನ ತರಂಗಗಳು ಏನಾಗುತ್ತವೆ?

ಧ್ವನಿಯ ತರಂಗಗಳು ನೀರಿನ ಕೊಳಕ್ಕೆ ಕಲ್ಲು ಬಿಸಾಡಿದ ನಂತರ ಕಾಣಿಸಿಕೊಳ್ಳುವ ಅಲೆಗಳಂತೆ ಕೆಲಸ ಮಾಡುತ್ತವೆ. ಈ ಅಲೆಗಳು ನೀರಿನ ಘರ್ಷಣೆಯಿಂದಾಗಿ ಕ್ರಮೇಣ ದುರ್ಬಲವಾಗುತ್ತ ಹೋಗುತ್ತವೆ. ಕೊನೆಗೆ ಅವು ತಮ್ಮ ಶಕ್ತಿ ಕಳೆದುಕೊಂಡು ಅದೃಶ್ಯವಾಗುತ್ತವೆ. ಧ್ವನಿಯ ಅಲೆಗಳು ಅಂದರೆ ತರಂಗಗಳು ಕೂಡಾ ಇದೇ ಕಾರಣಕ್ಕೆ ಅದೃಶ್ಯವಾಗುತ್ತವೆ. ಅವು ಗಾಳಿಯ ಘರ್ಷಣೆಯಿಂದಾಗಿ ತಮ್ಮ ಶಕ್ತಿ ಕಳೆದುಕೊಳ್ಳುತ್ತವೆ.

ಬೆಳಕಿನ ತರಂಗಗಳ ಮೇಲೆ ಯಾವುದೇ ಘರ್ಷಣೆಗಳು ಪರಿಣಾಮ ಬೀರದ ಕಾರಣ ಅವು ನಶಿಸಿ ಹೋಗುವುದಿಲ್ಲ. ನಾವು ಬೆಳಕನ್ನು ಹಿಂದಿಕ್ಕಿ ವೇಗವಾಗಿ ಚಲಿಸಿದರೆ ನಾವು ಭೂತಕಾಲದಲ್ಲಿ ನಡೆದ ಘಟನೆಗಳನ್ನು ನೋಡಬಹುದು. ಆದರೆ ಇದು ಅಸಾಧ್ಯದ ಮಾತು. ಯಾಕೆಂದರೆ ಈ ವಿಶ್ವದಲ್ಲಿ ಬೆಳಕಿನ ವೇಗಕ್ಕಿಂತಲೂ ವೇಗವಾಗಿ ಚಲಿಸುವುದು ಯಾರಿಂದಲೂ ಸಾಧ್ಯವಿಲ್ಲ!