ಸರಳ ವಿಜ್ಞಾನ: ವಿದ್ಯುಚ್ಛಕ್ತಿಗೆ ಹೆಚ್ಚು ಆದ್ಯತೆ

ಈಗ ಎಲ್ಲಾ ಕಡೆ ಹೆಚ್ಚು ಬಳಕೆಯಲ್ಲಿರುವ ಶಕ್ತಿಯೆಂದರೆ ವಿದ್ಯುಚ್ಛಕ್ತಿ. ಶಕ್ತಿಯ ಇತರ ಅನೇಕ ಮೂಲಗಳಿದ್ದರೂ ವಿದ್ಯುಚ್ಛಕ್ತಿಯನ್ನೇ ಹೆಚ್ಚು ಬಳಸಲು ಕಾರಣವೇನು?

ಶಕ್ತಿಯು ವಿವಿಧ ಮೂಲಗಳಿಂದ ಸಿಗುತ್ತದೆ. ಅಂದರೆ ಶಾಖ, ಬೆಳಕು, ಶಬ್ದ, ರಾಸಾಯನಿಕ ಶಕ್ತಿ, ಯಾಂತ್ರಿಕ ಶಕ್ತಿ, ವಿದ್ಯುಚ್ಛಕ್ತಿ ಇತ್ಯಾದಿಗಳು. ಒಂದು ರೂಪದ ಶಕ್ತಿಯನ್ನು ಇನ್ನೊಂದು ರೂಪಕ್ಕೆ ಬದಲಾಯಿಸಲು ಸಾಧ್ಯವಿದೆ. ಆದರೆ ಈ ಪ್ರಕ್ರಿಯೆ ವಿದ್ಯುಚ್ಛಕ್ತಿಯೊಂದನ್ನು ಹೊರತುಪಡಿಸಿದರೆ ಬೇರೆ ಶಕ್ತಿಯ ಮೂಲಗಳಲ್ಲಿ ನಾವಂದುಕೊಂಡಷ್ಟು ಸುಲಭವಲ್ಲ. ಶಕ್ತಿಯ ಮೂಲಗಳಲ್ಲಿ ವಿದ್ಯುತ್ತನ್ನು ಮಾತ್ರ ಸುಲಭವಾಗಿ ಶಾಖ, ಬೆಳಕು, ಶಬ್ದ, ಯಾಂತ್ರಿಕ ಶಕ್ತಿ ಇತ್ಯಾದಿಗಳಿಗೆ ಬದಲಾಯಿಸಬಹುದು.

ವಿದ್ಯುಚ್ಛಕ್ತಿಯ ಇನ್ನೊಂದು ಪ್ರಮುಖ ಗುಣವೆಂದರೆ ಅದು ಉತ್ಪಾದನೆಯಾಗುವ ಸ್ಥಳದಿಂದ ಅದನ್ನು ಬೇರೆ ಬೇರೆ ಪ್ರದೇಶಗಳಿಗೆ ತಂತಿಗಳ ಮೂಲಕ ಸುಲಭವಾಗಿ ಸಾಗಿಸಬಹುದು. ಸುಲಭವಾಗಿ ಬೇರೆ ಶಕ್ತಿ ಮೂಲಕ್ಕೆ ಬದಲಾಯಿಸಬಹುದು ಮತ್ತು ಸಾಗಿಸಲು ಸುಲಭ ಎಂಬೆರಡು ಕಾರಣಗಳಿಂದಾಗಿ ವಿದ್ಯುಚ್ಛಕ್ತಿ ಈಗ ಅತ್ಯಂತ ಮಹತ್ವದ ಶಕ್ತಿಯಾಗಿ ಬಳಕೆಯಾಗುತ್ತಿದೆ.