ಸೂಪರ್‌ ಮ್ಯಾಜಿಕ್‌: ಬಾಟಲಿಯೊಳಗೆ ಮೊಟ್ಟೆ ಹಾಕಿ

ಸಣ್ಣ ಬಾಯಿಯಿರುವ ಗಾಜಿನ ಬಾಟಲಿಯೊಳಗೆ ಮೊಟ್ಟೆ ಹಾಕಲು ಸಾಧ್ಯವೇ? ಇದನ್ನು ಪರೀಕ್ಷಿಸಲು ಈ ಕೆಳಗಿನ ಪ್ರಯೋಗ ಮಾಡಿ ನೋಡಿ ಫಲಿತಾಂಶ ಕಂಡುಕೊಳ್ಳಿ.

ಬೇಕಾಗುವ ಸಾಮಗ್ರಿ

ಬೇಯಿಸಿದ ಒಂದು ಮೊಟ್ಟೆ, ಮೊಟ್ಟೆಯಷ್ಟು ಅಗಲವಾದ ಬಾಯಿಯಿರುವ ಗಾಜಿನ ಬಾಟಲಿ, ಬೆಂಕಿಪೊಟ್ಟಣ, ಒಂದು ಕಾಗದದ ತುಂಡು, ಎಣ್ಣೆ.

ಮಾಡುವ ವಿಧಾನ

1. ಬೆಂದ ಮೊಟ್ಟೆಯ ಸಿಪ್ಪೆ ತೆಗೆಯಿರಿ. ಗಾಜಿನ ಬಾಟಲಿಯ ಬಾಯಿಗೆ ಸ್ವಲ್ಪ ಎಣ್ಣೆ ಸವರಿ. ಇದರಿಂದ ಮೊಟ್ಟೆ ಬಾಟಲಿಯೊಳಗೆ ಹೋಗಲು ಸುಲಭವಾಗುತ್ತದೆ.

2. ಬೆಂಕಿಕಡ್ಡಿಯನ್ನು ಗೀರಿ ಪೇಪರ್‌ ತುಂಡಿನ ಒಂದು ತುದಿಗೆ ಹಚ್ಚಿ. ಬೆಂಕಿ ಹತ್ತಿದ ಈ ಪೇಪರ್‌ ತುಂಡನ್ನು ಬಾಟಲಿಯೊಳಗೆ ಹಾಕಿ.

3. ತಕ್ಷ ಣವೇ ಮೊಟ್ಟೆಯನ್ನು ಬಾಟಲಿಯ ಬಾಯಿಯಲ್ಲಿ ಇಡಿ. ಈ ರೀತಿ ಮಾಡುವಾಗ ಮೊಟ್ಟೆ ಅತ್ತಿಂದತ್ತ ಅಲ್ಲಾಡಲು ಶುರುವಾಗುತ್ತದೆ.

4. ಬಾಟಲಿಯೊಳಗಿರುವ ಪೇಪರ್‌ ಸಂಪೂರ್ಣ ಉರಿದು ಹೋದ ಮೇಲೆ ಮೊಟ್ಟೆ ಬಾಟಲಿಯೊಳಗೆ ಹೋಗಿ ಬೀಳುತ್ತದೆ!

ಕಾರಣ ಇಲ್ಲಿದೆ

ಉರಿಯುವ ಪೇಪರನ್ನು ಬಾಟಲಿಯೊಳಗೆ ಹಾಕಿದಾಗ ಅದು ಒಳಗಿರುವ ಗಾಳಿಯನ್ನು ಬಿಸಿ ಮಾಡುತ್ತದೆ. ಬಿಸಿ ಗಾಳಿ ವಿಸ್ತರಿಸಿ ಬಾಟಲಿಯೊಳಗೆ ಹೆಚ್ಚಿನ ಜಾಗ ಆಕ್ರಮಿಸಿಕೊಳ್ಳುತ್ತದೆ. ಇದರಿಂದ ಬಾಟಲಿಯೊಳಗೆ ಗಾಳಿಯ ಒತ್ತಡ ಹೆಚ್ಚಾಗುತ್ತದೆ. ಸ್ವಲ್ಪ ಗಾಳಿ ಹಿಗ್ಗಿ ಬಾಟಲಿಯ ಬಾಯಿಯ ಮೂಲಕ ಹೊರಗೆ ಹೋಗಲು ಯತ್ನಿಸುತ್ತದೆ. ಆದರೆ ಆ ಜಾಗದಲ್ಲಿ ಮೊಟ್ಟೆ ಇರುವುದರಿಂದ ಗಾಳಿಗೆ ಹೊರಗೆ ಆಗುವುದಿಲ್ಲ. ಈ ಕಾರಣ ಮೊಟ್ಟೆ ಅಲ್ಲಾಡುತ್ತದೆ.

ಪೇಪರ್‌ ಸಂಪೂರ್ಣ ಉರಿದು ಹೋದ ಮೇಲೆ ಬಾಟಲಿ ತಣ್ಣಗಾಗುತ್ತದೆ. ಈ ಕಾರಣ ಒಳಗಿನ ಗಾಳಿಯೂ ತಣ್ಣಗಾಗಿ, ಕುಗ್ಗಿ ಹೋಗುತ್ತದೆ ಮತ್ತು ಕನಿಷ್ಠ ಜಾಗವನ್ನು ಆಕ್ರಮಿಸಿಕೊಳ್ಳುತ್ತದೆ. ಇದರಿಂದ ಬಾಟಲಿಯ ಹೊರಗಿನ ಗಾಳಿ ಒಳಗೆ ನುಗ್ಗಿ ಖಾಲಿ ಜಾಗವನ್ನು ತುಂಬಿಕೊಳ್ಳುತ್ತದೆ. ಆದರೆ ಅದರ ಬಾಯಿಯಲ್ಲಿ ಮೊಟ್ಟೆಯಿರುವವರೆಗೆ ಗಾಳಿಗೆ ಒಳಗೆ ಹೋಗಲು ಆಗುವುದಿಲ್ಲ.

ಬಾಟಲಿಯೊಳಗಿನ ಗಾಳಿ ಕುಗ್ಗುವ ಕಾರಣ ಒಳಗಿನ ಗಾಳಿಯ ಒತ್ತಡವೂ ಕಡಿಮೆಯಾಗುತ್ತದೆ. ಇದು ಬಾಟಲಿಯ ಒಳಗೆ ಮತ್ತು ಹೊರಗಿನ ಗಾಳಿಯ ಒತ್ತಡಗಳ ನಡುವೆ ಅಸಮತೋಲನ ಉಂಟು ಮಾಡುತ್ತದೆ. ಬಾಟಲಿಯ ಹೊರಗಿನ ಗಾಳಿಯ ಅಧಿಕ ಒತ್ತಡದಿಂದ ಮೊಟ್ಟೆಯು ಬಾಟಲಿಯೊಳಗೆ ತಳ್ಳಲ್ಪಡುತ್ತದೆ.