ಸೂಪರ್‌ ಮ್ಯಾಜಿಕ್‌: ಹಿಗ್ಗುವ ಮತ್ತು ಕುಗ್ಗುವ ಮೊಟ್ಟೆ

ಮಾನವರಂತೆ ಮೊಟ್ಟೆ ಕೂಡಾ ದಪ್ಪ ಅಥವಾ ಸಣ್ಣಗಾಗಲು ಸಾಧ್ಯವೇ? ಇದನ್ನು ಕಂಡುಕೊಳ್ಳಲು ಈ ಕೆಳಗಿನ ಪ್ರಯೋಗ ಮಾಡಿ ಫಲಿತಾಂಶ ತಿಳಿದುಕೊಳ್ಳಿ.

ಬೇಕಾಗುವ ಸಾಮಗ್ರಿ

ಮೊಟ್ಟೆ-2, ಗಾಜಿನ ಲೋಟ-2, ವಿನಿಗರ್‌, ಜೇನುತುಪ್ಪ, ನೀರು.

ಮಾಡುವ ವಿಧಾನ

1. ಎರಡು ಗಾಜಿನ ಲೋಟಗಳಿಗೆ ವಿನಿಗರ್‌ ತುಂಬಿಸಿ. ಇವೆರಡೂ ಗ್ಲಾಸ್‌ಗಳಿಗೂ ತಲಾ ಒಂದು ಮೊಟ್ಟೆ ಹಾಕಿ ಒಂದು ದಿನ ಹಾಗೆಯೇ ಬಿಡಿ.

2. ಬಳಿಕ ಮೊಟ್ಟೆಗಳನ್ನು ತೆಗೆದು ನೀರಿನಲ್ಲಿ ಚೆನ್ನಾಗಿ ತೊಳೆಯಿರಿ. ಗ್ಲಾಸ್‌ನಿಂದ ವಿನಿಗರ್‌ ತೆಗೆದು ಚೆನ್ನಾಗಿ ತೊಳೆಯಿರಿ. ವಿನಿಗರ್‌ನ ಆಮ್ಲ ಮೊಟ್ಟೆಯ ಕವಚದಲ್ಲಿ ಕರಗಿ ಮೊಟ್ಟೆಯ ಸುತ್ತು ತೆಳ್ಳನೆಯ ಪೊರೆ ರೂಪುಗೊಳ್ಳುತ್ತದೆ.

3. ಈಗ ಒಂದು ಗ್ಲಾಸ್‌ಗೆ ನೀರು, ಇನ್ನೊಂದಕ್ಕೆ ಜೇನುತುಪ್ಪ ಹಾಕಿ. ಈ ಗ್ಲಾಸ್‌ಗಳಿಗೆ ಒಂದೊಂದು ಮೊಟ್ಟೆ ಹಾಕಿ. ಈ ಮೊಟ್ಟೆ ನೀರಿನೊಳಗೆ ಸಂಪೂರ್ಣ ಮುಳುಗುವಂತಾಗಲು ಸಣ್ಣ ವೇಯ್ಟ್‌ ಇಟ್ಟು ಒಂದು ದಿನ ಹಾಗೆಯೇ ಬಿಡಿ.

4. ಒಂದು ಬಳಿಕ ನೀರಿನಲ್ಲಿ ಮುಳುಗಿಸಿದ ಮೊಟ್ಟೆಯನ್ನು ತೆಗೆದು ನೋಡಿದರೆ ಅದು ಸ್ವಲ್ಪ ಉಬ್ಬಿರುತ್ತದೆ. ಜೇನುತುಪ್ಪದಲ್ಲಿ ಮುಳುಗಿಸಿದ ಮೊಟ್ಟೆ ತನ್ನ ಮೂಲ ಗಾತ್ರಕ್ಕಿಂತ ಕೊಂಚ ಸಣ್ಣದಾಗಿರುತ್ತದೆ!

ಕಾರಣ ಇಲ್ಲಿದೆ

ವಿನಿಗರ್‌ನಲ್ಲಿ ಮುಳುಗಿಸಿದ ಮೊಟ್ಟೆಗಳಲ್ಲಿ ರೂಪುಗೊಂಡಿರುವ ತೆಳು ಪೊರೆ ತುಂಬಾ ಮೃದು ಮತ್ತು ರಂಧ್ರಗಳನ್ನು ಹೊಂದಿರುತ್ತವೆ. ಇದರಲ್ಲಿ ಒಂದು ಮೊಟ್ಟೆಯನ್ನು ನೀರಿನಲ್ಲಿ ಮುಳುಗಿಸಿದಾಗ ನೀರಿನ ಅಣುಗಳು ಈ ಪೊರೆಯ ಮೂಲಕ ಸುಲಭವಾಗಿ ಹಾದು ಹೋಗುತ್ತವೆ. ಆದ್ದರಿಂದ ನೀರಿನ ಗ್ಲಾಸ್‌ನಲ್ಲಿರುವ ಮೊಟ್ಟೆ ನೀರಿನಲ್ಲಿ ಚೆನ್ನಾಗಿ ನೆನೆಯುತ್ತದೆ. ಆದರೆ ಜೇನುತುಪ್ಪದಲ್ಲಿ ಮುಳುಗಿದ ಮೊಟ್ಟೆ ಹೀಗಾಗುವುದಿಲ್ಲ. ಜೇನುತುಪ್ಪದಲ್ಲಿ ಅಧಿಕ ಸಾಂದ್ರತೆಯ ಸಕ್ಕರೆ ಕಣಗಳಿರುತ್ತವೆ. ಈ ದೊಡ್ಡ ಕಣ್ಣಗಳಿಗೆ ಮೊಟ್ಟೆಯ ಹೊರ ಪೊರೆಯ ಮೂಲಕ ಹಾದು ಹೋಗಲು ಆಗುವುದಿಲ್ಲ. ಆದರೆ ಮೊಟ್ಟೆಯಲ್ಲಿ ಸ್ವಲ್ಪ ಪ್ರಮಾಣದ ನೀರು ಇರುತ್ತದೆ. ಈ ನೀರಿನ ಅಣುಗಳು ಸಣ್ಣದಾಗಿದ್ದು, ಪೊರೆಯ ಮೂಲಕ ಹಾದು ಹೋಗುತ್ತವೆ. ಆದ್ದರಿಂದ ಮೊಟ್ಟೆಯಲ್ಲಿರುವ ನೀರು ಜೇನುತುಪ್ಪಕ್ಕೆ ಚಲಿಸಿ ಮೊಟ್ಟೆಯನ್ನು ಸಣ್ಣ ಮಾಡಿ ಕುಗ್ಗಿಸುತ್ತದೆ.

ಪೊರೆಯ ಮೂಲಕ ನೀರು ಚಲಿಸುವ ಈ ಪ್ರಕ್ರಿಯೆಯನ್ನು ಓಸ್ಮೊಸಿಸ್‌ ಎಂದು ಹೇಳಲಾಗುತ್ತದೆ. ಈ ಪ್ರಕ್ರಿಯೆಯಲ್ಲಿ ನೀರು ಸಾಮಾನ್ಯವಾಗಿ ಅಧಿಕ ಸಾಂದ್ರತೆಯ ನೀರಿನ ಅಣುಗಳಿಂದ ಕಡಿಮೆ ಸಾಂದ್ರತೆಯ ಸ್ಥಳಕ್ಕೆ ಚಲಿಸುತ್ತದೆ. ಈ ಕಾರಣಕ್ಕೆ ಈ ಪ್ರಯೋಗದಲ್ಲಿ ಮೊದಲ ಮೊಟ್ಟೆ ನೀರನ್ನು ಹೀರಿಕೊಂಡರೆ, ಎರಡನೆ ಮೊಟ್ಟೆ ನೀರನ್ನು ಬಿಡುಗಡೆ ಮಾಡಿರುತ್ತದೆ.