ಸೂಪರ್‌ ಮ್ಯಾಜಿಕ್‌: ಬಾಟಲಿಯ ಕೇಂದ್ರಾಭಿಮುಖ ಬಲ

ಮುಚ್ಚಳವಿಲ್ಲದೆ ತಲೆ ಕೆಳಗಾಗಿರುವ ಬಾಟಲಿಯಿಂದ ಬಾಲ್‌ ಎತ್ತಲು ಸಾಧ್ಯವೇ? ಇದನ್ನು ಕಂಡು ಹಿಡಿಯಲು ಈ ಕೆಳಗಿನ ಪ್ರಯೋಗ ಮಾಡಿ ನೋಡಿ ಫಲಿತಾಂಶ ತಿಳಿದುಕೊಳ್ಳಿ.

Vijaya Karnataka Web

ಬೇಕಾಗುವ ಸಾಮಗ್ರಿ

ಸಣ್ಣ ಬಾಲ್‌, ಬಾಲ್‌ಗಿಂತ ದೊಡ್ಡ ಬಾಯಿಯಿರುವ ಅಗಲವಾದ ಬಾಟಲಿ.

ಮಾಡುವ ವಿಧಾನ

1. ಬಾಲನ್ನು ನೆಲ ಅಥವಾ ಟೇಬಲ್‌ನಂಥ ಸಪಾಟಾದ ಮೇಲ್ಮೈಯಲ್ಲಿಡಿ. ಅದರ ಮೇಲೆ ಬಾಟಲಿಯನ್ನು ತಲೆ ಕೆಳಗಾಗಿ ಇಡಿ.

2. ಬಾಲನ್ನು ಆ ಬಾಟಲಿಯೊಂದಿಗೆ ಮೇಲೆತ್ತಲು ಯತ್ನಿಸಿ. ಇದು ಸಾಧ್ಯವಾಗುವುದಿಲ್ಲ.

3. ಈಗ ಬಾಟಲಿಯನ್ನು ಬಾಲ್‌ನ ಸುತ್ತ ತಿರುಗಿಸಿ. ನಿಧಾನವಾಗಿ ತಿರುಗುವ ವೇಗವನ್ನು ಹೆಚ್ಚಿಸಿ.

4. ಬಾಟಲಿ ವೃತ್ತಾಕಾರವಾಗಿ ತಿರುಗುವಾಗ ಬಾಲ್‌ ಕೂಡಾ ಅದರ ಬಾಯಿಯ ಅಂಚಿನೊಂದಿಗೆ ತಿರುಗಲು ಆರಂಭಿಸುತ್ತದೆ.

5. ಬಾಟಲಿಯ ವೇಗ ಹೆಚ್ಚಿಸಿ ಬಾಟಲಿಯನ್ನು ಟೇಬಲ್‌ನಿಂದ ಮೇಲೆತ್ತಿದರೆ ಆ ಬಾಲ್‌ ಕೂಡಾ ಬಾಟಲಿಯೊಂದಿಗೆ ಮೇಲೆ ಬರುತ್ತದೆ! ಸತತ ಅಭ್ಯಾಸದಿಂದ ಮಾತ್ರ ಈ ಪ್ರಯೋಗ ಸಾಧ್ಯವಾಗುತ್ತದೆ.

ಕಾರಣ ಇಲ್ಲಿದೆ

ಬಾಟಲಿಯ ವೃತ್ತೀಯ ಚಲನೆ ನಯವಾಗಿದ್ದಾಗ ಬಾಲ್‌ ಕೂಡಾ ಬಾಟಲಿಯೊಳಗೆ ವೃತ್ತಾಕಾರವಾಗಿ ಚಲಿಸಲು ಆರಂಭಿಸುತ್ತದೆ. ಇದು ಸೆಂಟ್ರಿಪೆಟಲ್‌ ಫೋರ್ಸ್‌ ಅಥವಾ ಕೇಂದ್ರಾಭಿಮುಖ ಬಲದಿಂದ ಸಾಧ್ಯವಾಗುತ್ತದೆ. ವಕ್ರೀಯ ಪಥದಲ್ಲಿ ಚಲಿಸುವ ವಸ್ತುವಿನ ಮೇಲೆ ಕೇಂದ್ರಾಭಿಮುಖ ಬಲವು ತನ್ನ ಪರಿಣಾಮ ಬೀರುತ್ತದೆ. ಬಾಲ್‌ನ ವೇಗ ಮತ್ತು ಬಾಟಲಿಯ ಆಕಾರವು ಅದನ್ನು ವೃತ್ತೀಯವಾಗಿ ಚಲಿಸುವಂತೆ ಮಾಡುತ್ತದೆ. ಈ ಚಲನೆಗೆ ಕೇಂದ್ರಾಭಿಮುಖ ಬಲವೇ ಕಾರಣ. ಬಾಲ್‌ ಮೇಲಿನ ಕೇಂದ್ರಾಭಿಮುಖ ಬಲವು ಅದರ ಗುರುತ್ವಾಕರ್ಷಣೆ ಬಲಕ್ಕಿಂತ ಜಾಸ್ತಿಯಿರುವಾಗ ಬಾಟಲಿಯನ್ನು ಬಾಲ್‌ ಸಮೇತ ಮೇಲೆತ್ತಬಹುದು. ಬಾಟಲಿ ತಿರುಗಿಸುವುದನ್ನು ನಿಧಾನ ಮಾಡಿದಾಗ ಅಥವಾ ನಿಲ್ಲಿಸಿದಾಗ ಕೇಂದ್ರಾಭಿಮುಖ ಬಲ ಕಡಿಮೆಯಾಗುತ್ತದೆ ಮತ್ತು ಗುರುತ್ವಾಕರ್ಷಣೆ ಶಕ್ತಿ ಹೆಚ್ಚಾಗಿ ಬಾಲ್‌ ಕೆಳಗೆ ಬೀಳುತ್ತದೆ.