ಸೂಪರ್‌ ಮ್ಯಾಜಿಕ್‌: ಬೆಳ್ಳಿ ಮೊಟ್ಟೆ

ಚಿನ್ನದ ಮೊಟ್ಟೆಗಳ ಕುರಿತು ನೀವು ಅನೇಕ ಕಥೆಗಳನ್ನು ಕೇಳಿರುತ್ತೀರಿ. ಚಿನ್ನದ ಮೊಟ್ಟೆಯಂತೆ ಬೆಳ್ಳಿಯ ಮೊಟ್ಟೆಯನ್ನು ನೀವು ನೋಡಿದ್ದೀರಾ? ಇಲ್ಲವಾದರೆ ಈ ಕೆಳಗಿನ ಪ್ರಯೋಗ ಮಾಡಿ ಬೆಳ್ಳಿ ಮೊಟ್ಟೆಯನ್ನು ನೀವೇ ಮಾಡಿ.

ಬೇಕಾಗುವ ಸಾಮಗ್ರಿ

ಕ್ಯಾಂಡಲ್‌, ಬೆಂಕಿಪೊಟ್ಟಣ, ಮೊಟ್ಟೆ, ನೀರು ತುಂಬಿರುವ ಪಾರದರ್ಶಕ ಗಾಜಿನ ಲೋಟ, ಇಕ್ಕಳ

ಮಾಡುವ ವಿಧಾನ

1. ಈ ಪ್ರಯೋಗ ಮಾಡುವ ಮೊದಲು ಮೊಟ್ಟೆಯನ್ನು ಕೊಠಡಿಯ ಉಷ್ಣಾಂಶದಲ್ಲಿ ಸಂಪೂರ್ಣ ಒಣಗಿಸಿ.

2. ಕ್ಯಾಂಡಲ್‌ ಬೆಳಗಿಸಿ. ಮೊಟ್ಟೆಯನ್ನು ಇಕ್ಕಳದಿಂದ ಎತ್ತಿ ಬೆಂಕಿಯ ಜ್ವಾಲೆಯ ಮೇಲಿಟ್ಟು ತಿರುಗಿಸಿ.

3. ಮೊಟ್ಟೆ ಸಂಪೂರ್ಣ ಮಸಿಮಯವಾಗುವಂತೆ ಅದನ್ನು ಜ್ವಾಲೆಯ ಸುತ್ತ ಚೆನ್ನಾಗಿ ತಿರುಗಿಸುತ್ತಾ ಇರಿ.

4. ಈಗ ಮಸಿ ಹಿಡಿದ ಮೊಟ್ಟೆಯನ್ನು ನಿಧಾನವಾಗಿ ನೀರಿರುವ ಗಾಜಿನ ಲೋಟಕ್ಕೆ ಹಾಕಿ ನೀರಿನ ಮೂಲಕ ಮೊಟ್ಟೆಯನ್ನು ನೋಡಿ.

5. ಈ ರೀತಿ ಮಾಡಿದಾಗ ನಿಮಗೆ ಅಚ್ಚರಿಯಾಗುತ್ತದೆ. ಯಾಕೆಂದರೆ ಆ ಮೊಟ್ಟೆ ಬೆಳ್ಳಿಯಂತೆ ಫಳಫಳ ಹೊಳೆಯುತ್ತಿರುತ್ತದೆ!

ಈ ಪ್ರಯೋಗದಲ್ಲಿ ಮೂಲತಃ ಮೊಟ್ಟೆ ಬೆಳ್ಳಿಯಾಗಿ ಪರಿವರ್ತನೆಯಾಗುವುದಿಲ್ಲ. ನೀರಿನ ಮೂಲಕ ನೋಡಿದಾಗ ಮಾತ್ರ ಅದು ಬೆಳ್ಳಿಯ ಮೊಟ್ಟೆಯಂತೆ ಕಾಣುತ್ತದೆ. ಮೊಟ್ಟೆಯ ಸುತ್ತ ರಚನೆಯಾಗಿರುವ ಮಸಿಯಲ್ಲಿ ಕಾರ್ಬನ್‌ ಇರುವುದೇ ಇದಕ್ಕೆ ಕಾರಣ. ಸಾಮಾನ್ಯವಾಗಿ ಕಾರ್ಬನ್‌ ನೀರನ್ನು ಹಿಮ್ಮೆಟ್ಟಿಸುತ್ತದೆ. ಇದರಿಂದ ಗಾಳಿಯ ತೆಳು ಪೊರೆಯೊಂದು ಕಾರ್ಬನ್‌ ಸುತ್ತ ಆವರಿಸಿಕೊಂಡು ಅದು ಒದ್ದೆಯಾಗದಂತೆ ನೋಡಿಕೊಳ್ಳುತ್ತದೆ. ಈ ಗಾಳಿಯ ಪೊರೆ ಮೊಟ್ಟೆಯ ಮೇಲೆ ಬೀಳುವ ಬೆಳಕನ್ನು ಪ್ರತಿಫಲಿಸುತ್ತದೆ. ಇದರಿಂದ ಮೊಟ್ಟೆ ಕನ್ನಡಿ ಅಥವಾ ಬೆಳ್ಳಿಯಂತೆ ಹೊಳಪಾಗಿ ಕಾಣುತ್ತದೆ.