ಸೂಪರ್‌ ಮ್ಯಾಜಿಕ್‌: ಕಲ್ಲಿನಂಥ ಮೊಟ್ಟೆ

ಕಲ್ಲಿನಲ್ಲಿ ಜಿಯೋಡ್‌ ಎಂಬ ವಿಧವಿದೆ. ಕಲ್ಲಿನೊಳಗೆ ಟೊಳ್ಳು ಕುಳಿಯಂತಿರುವ ಈ ರಚನೆಯಲ್ಲಿ ಖನಿಜ ಅಥವಾ ಹರಳುಗಳು ತುಂಬಿರುತ್ತವೆ. ಜಿಯೋಡ್‌ ವಿಧದ ಕಲ್ಲು ಹೆಚ್ಚಾಗಿ ಸಂಚಿತ ಅಥವಾ ಅಗ್ನಿಜನ್ಯ ಶಿಲೆಗಳಲ್ಲಿ ಕಂಡು ಬರುತ್ತದೆ. ಅಚ್ಚರಿಯೆಂದರೆ ನಾವು ಮೊಟ್ಟೆಯೊಳಗೆ ಕೂಡಾ ಇಂಥ ಜಿಯೋಡ್‌ ಕಲ್ಲುಗಳನ್ನು ಸೃಷ್ಟಿಸಲು ಸಾಧ್ಯವಿದೆ! ಈ ಕೆಳಗಿನ ಪ್ರಯೋಗ ಮಾಡಿ ಫಲಿತಾಂಶ ತಿಳಿಯಿರಿ.

ಬೇಕಾಗುವ ಸಾಮಗ್ರಿ

ಹಸಿ ಮೊಟ್ಟೆ, ನೀರು, ಸ್ಫಟಿಕದ ಪುಡಿ, ಅಂಟು, ಪೇಂಟ್‌ ಬ್ರಷ್‌, ಚಾಕು, ಫುಡ್‌ ಕಲರ್‌.

ಮಾಡುವ ವಿಧಾನ

1. ಮೊಟ್ಟೆಯ ದುಂಡನೆಯ ತುದಿಯಲ್ಲಿ ಚಾಕುವನ್ನು ನಯವಾಗಿ ಸವರಿ ಅದರ ಮೇಲಿನ ಕವಚವನ್ನು ತೆಗೆಯಿರಿ.

2. ಮೊಟ್ಟೆಯೊಳಗಿರುವ ಲೋಳೆಯನ್ನು ಸಂಪೂರ್ಣ ತೆಗೆದು ಒಳ ಭಾಗವನ್ನು ನೀರಿನಿಂದ ತೊಳೆಯಿರಿ.

3. ಮೊಟ್ಟೆಯ ಒಳ ಭಾಗವನ್ನು ನಿಮ್ಮ ಬೆರಳಿನಿಂದ ಉಜ್ಜಿ ಉಳಿದಿರುವ ಪೊರೆಯನ್ನು ತೆಗೆಯಿರಿ.

4. ಮೊಟ್ಟೆಯನ್ನು ಟಿಶ್ಯೂ ಪೇಪರ್‌ನಿಂದ ಉಜ್ಜಿ ಒಣಗಿಸಿ. ನಂತರ ಪೇಂಟ್‌ ಬ್ರಷ್‌ ಅನ್ನು ಅಂಟಿನಲ್ಲಿ ಅದ್ದಿ ಮೊಟ್ಟೆಯೊಳಗೆ ಗೆರೆಯಂತೆ ಸವರಿ.

5. ಮೊಟ್ಟೆಯೊಳಗೆ ಸ್ಫಟಿಕದ ಪುಡಿಯನ್ನು ಚೆನ್ನಾಗಿ ಉದುರಿಸಿ. ಬಳಿಕ ಮೊಟ್ಟೆಯನ್ನು ತಲೆಕೆಳಗಾಗಿಸಿ ಅಂಟಿಗೆ ಅಂಟಿಕೊಳ್ಳದ ಪುಡಿಯನ್ನು ಕೆಳಗೆ ಉದುರಿಸಿ.

6. ಆ ಮೊಟ್ಟೆಯನ್ನು ರಾತ್ರಿಯಿಡೀ ಹಾಗೆಯೇ ಒಣಗಲು ಬಿಡಿ. ಮರುದಿನ ಒಂದು ಕಪ್‌ ನೀರನ್ನು ಕುದಿಸಿ ಬೌಲ್‌ಗೆ ಸುರಿಯಿರಿ.

7. ಈ ಬಿಸಿ ನೀರಿಗೆ 30 ರಿಂದ 40 ಹನಿಗಳಷ್ಟು ಫುಡ್‌ ಕಲ್‌ ಹಾಕಿ ಚೆನ್ನಾಗಿ ಕಲಸಿ. ಇದಕ್ಕೆ ಅರ್ಧ ಕಪ್‌ನಷ್ಟು ಸ್ಫಟಿಕದ ಪುಡಿ ಹಾಕಿ ಮತ್ತೆ ತಿರುವಿ. ಆ ಪುಡಿ ನೀರಿನಲ್ಲಿ ಸಂಪೂರ್ಣ ಕರಗುವವರೆಗೆ ತಿರುವುತ್ತಿರಬೇಕು. ನೀರಿನಲ್ಲಿ ಸ್ಫಟಿಕದ ಪುಡಿ ಒಂಚೂರೂ ಇರಬಾರದು.

8. ಈಗ ಒಣಗಿದ ಮೊಟ್ಟೆಯ ಕವಚವನ್ನು ಸ್ಫಟಿಕದ ಪುಡಿ ಇರುವ ಭಾಗ ಮೇಲೆ ಬರುವಂತೆ ನಿಧಾನವಾಗಿ ಮೇಲಿನ ದ್ರಾವಣದಲ್ಲಿ ಇಡೀ ರಾತ್ರಿ ಇಡಿ.

9. ಮರುದಿನ ಚಮಚದ ಸಹಾಯದಿಂದ ಮೊಟ್ಟೆಯ ಕವಚವನ್ನು ದ್ರಾವಣದಿಂದ ತೆಗೆದು ಪೇಪರ್‌ ಟವೆಲ್‌ ಮೇಲಿಡಿ. ಆ ಮೊಟ್ಟೆಯ ಕವಚದೊಳಗೆ ಹರಳುಗಳು ಬೆಳೆದಿರುತ್ತವೆ! ಮೇಲ್ನೋಟಕ್ಕೆ ಮೊಟ್ಟೆ ಕಲ್ಲಿನಂತೆ ಕಾಣುತ್ತದೆ.

ಕಾರಣ ಇಲ್ಲಿದೆ

ಬಿಸಿ ನೀರಿನಲ್ಲಿ ಹೆಚ್ಚಿನ ಪ್ರಮಾಣದ ಸ್ಫಟಿಕದ ಪುಡಿ ಕರಗಿದಾಗ ಅಲ್ಲಿ ಸಂಪೂರ್ಣ ಕರಗಬಲ್ಲ ದ್ರಾವಣವೊಂದು ಉತ್ಪತ್ತಿಯಾಗುತ್ತದೆ. ಆ ದ್ರಾವಣದಲ್ಲಿ ಕರಗಿದ ಸ್ಫಟಿಕದ ಪುಡಿಯ ಕಣಗಳು ತುಂಬಿರುತ್ತವೆ. ಈ ದ್ರಾವಣ ಆರಿದ ಮೇಲೆ ಸ್ಫಟಿಕದ ಅಣುಗಳು ಬೌಲ್‌ನ ಕೆಳ ಭಾಗಕ್ಕೆ ಬೀಳಲು ಆರಂಭಿಸಿ ತಮ್ಮ ಹಿಂದಿನ ಘನ ರೂಪಕ್ಕೆ ಮರಳಲು ಸಾಧ್ಯವಾಗುವಂತೆ ಹರಳುಗಟ್ಟಲು ಆರಂಭಿಸುತ್ತದೆ. ಮೊಟ್ಟೆಯ ಕವಚದೊಳಗೆ ಲೇಪಿಸಿರುವ ಸ್ಫಟಿಕದ ಪುಡಿಯ ಪದರವು ಈ ಅಣುಗಳಿಗೆ ಒರಟಾದ ಮೇಲ್ಮೈಯನ್ನು ಒದಗಿಸುತ್ತದೆ. ಇದರಿಂದಾಗಿ ಅಣುಗಳು ಅಲ್ಲಿಯೇ ಪದರದ ಮೇಲೆ ಪದರಿನಂತೆ ಶೇಖರಗೊಳ್ಳುತ್ತವೆ. ಈ ಪ್ರಕ್ರಿಯೆಯನ್ನು ಸೆಡಿಮೆಂಟೇಷನ್‌ ಅಥವಾ ಸಂಚಯ ಎಂದು ಹೇಳಲಾಗುತ್ತದೆ. ಇದು ಬಹುತೇಕ ಜಿಯೋಡ್‌ ಕಲ್ಲು ರೂಪುಗೊಳ್ಳುವುದನ್ನೇ ಹೋಲುತ್ತದೆ. ಈ ಕಲ್ಲಿನೊಳಗಿರುವ ನೀರು, ಖನಿಜಗಳು ಗಾಳಿಯ ಚೀಲದೊಳಗೆ ಜಿನುಗಿ ನಿಕ್ಷೇಪಗಳನ್ನು ಉಳಿಸಿ ಬಿಡುತ್ತವೆ.