ಸೂಪರ್‌ ಮ್ಯಾಜಿಕ್‌: ನೀರಿನಲ್ಲಿ ತೇಲುವ ಪೇಪರ್‌ ಕ್ಲಿಪ್‌

ಲೋಹದ ಪೇಪರ್‌ ಕ್ಲಿಪ್‌ ನೀರಿನಲ್ಲಿ ತೇಲಲು ಸಾಧ್ಯವೇ? ಇದನ್ನು ಕಂಡುಕೊಳ್ಳಲು ಈ ಕೆಳಗಿನ ಪ್ರಯೋಗ ಮಾಡಿ ಫಲಿತಾಂಶ ತಿಳಿದುಕೊಳ್ಳಿ.

Vijaya Karnataka Web

ಬೇಕಾಗುವ ಸಾಮಗ್ರಿ

ಪೇಪರ್‌ ಕ್ಲಿಪ್‌, ನೀರು ತುಂಬಿಸಿರುವ ಒಂದು ಬೌಲ್‌, ಟಿಶ್ಯೂ ಪೇಪರ್‌.

ಮಾಡುವ ವಿಧಾನ

1. ನೀರಿನ ಬೌಲ್‌ಗೆ ಪೇಪರ್‌ ಕ್ಲಿಪ್‌ ಹಾಕಿ. ಈ ರೀತಿ ಮಾಡಿದಾಗ ಕ್ಲಿಪ್‌ ನೀರಿನಲ್ಲಿ ಮುಳುಗುತ್ತದೆ.

2. ಈಗ ತೆಳ್ಳನೆಯ ಚೌಕಾಕಾರದ ಟಿಶ್ಯೂ ಪೇಪರನ್ನು ನೀರಿನ ಮೇಲೆ ಇಡಿ. ಇದರ ಮೇಲೆ ಪೇಪರ್‌ ಕ್ಲಿಪ್‌ ಅನ್ನು ನಿಧಾನವಾಗಿ ಇಡಿ.

3. ಟಿಶ್ಯೂ ಪೇಪರ್‌ ನೀರಿನಲ್ಲಿ ತೋಯ್ದು ನೀರಿನೊಳಗೆ ಮುಳುಗುತ್ತದೆ. ಆದರೆ ಅದರ ಮೇಲಿದ್ದ ಪೇಪರ್‌ ಕ್ಲಿಪ್‌ ನೀರಿನ ಮೇಲ್ಮೈಯಲ್ಲಿ ತೇಲುತ್ತದೆ!

4. ಟಿಶ್ಯೂ ಪೇಪರ್‌ ಮುಳುಗದಿದ್ದರೆ ಅದನ್ನು ಪೇಪರ್‌ ಕ್ಲಿಪ್‌ಗೆ ಸ್ಪರ್ಶಿಸದಂತೆ ಕಾಟನ್‌ ಬಡ್‌ನಿಂದ ಕೆಳಗೆ ತಳ್ಳಿ.

ಕಾರಣ ಇಲ್ಲಿದೆ

ಲೋಹದಿಂದ ಮಾಡಿದ ಪೇಪರ್‌ ಕ್ಲಿಪ್‌ಗಳು ಭಾರವಾಗಿರುವ ಕಾರಣ ಅವು ನೀರಿನಲ್ಲಿ ತೇಲದೆ ಮುಳುಗುತ್ತವೆ. ಆದ್ದರಿಂದ ನೀವು ಮೊದಲ ಬಾರಿಗೆ ನೀರಿಗೆ ಪೇಪರ್‌ ಕ್ಲಿಪ್‌ ಹಾಕಿದಾಗ ಅದು ಮುಳುಗಿತು. ಎರಡನೇ ಬಾರಿ ಪೇಪರ್‌ ಕ್ಲಿಪ್‌ ನೀರಿನಲ್ಲಿ ತೇಲಿದಂತೆ ಕಂಡು ಬಂತು. ಮೂಲತಃ ಅದು ತೇಲುವುದಿಲ್ಲ. ನೀರಿನ ಮೇಲ್ಮೈ ಒತ್ತಡ ಅದನ್ನು ಹಿಡಿದಿಟ್ಟುಕೊಂಡಿರುತ್ತದಷ್ಟೆ.

ದ್ರಾವಣದ ಮೇಲ್ಮೈಯಲ್ಲಿ ದ್ರವದ ಅಣುಗಳನ್ನು ಪರಸ್ಪರ ಒಂದಕ್ಕೊಂದು ಹಿಡಿದಿಟ್ಟುಕೊಳ್ಳುವ ಶಕ್ತಿಯೇ ಮೇಲ್ಮೈ ಒತ್ತಡ. ಇದು ದ್ರಾವಣದ ಮೇಲ್ಮೈಯನ್ನು ಜಾರುವ ಪದರದಂತೆ ಮಾಡುತ್ತದೆ. ನೀರಿನ ಆಳಕ್ಕೆ ಹೋಗಬೇಕಾದರೆ ಆ ಪದರವನ್ನು ತಳ್ಳಿಯೇ ಹೋಗಬೇಕಾಗುತ್ತದೆ. ಪೇಪರ್‌ ಕ್ಲಿಪ್‌ ಈ ಮೇಲ್ಮೈ ಪದರವನ್ನು ತಾಳಿಕೊಳ್ಳುವಷ್ಟು ಸಮಯದವರೆಗೆ ಅದು ನೀರಿನಲ್ಲಿ ತೇಲುತ್ತಿರುತ್ತದೆ!