ಸೂಪರ್‌ ಮ್ಯಾಜಿಕ್‌: ಆಂತರಿಕ ಒತ್ತಡಕ್ಕೆ ಕುಗ್ಗುವ ವಸ್ತು

ಪ್ರೆಶರ್‌ ಕುಕ್ಕರ್‌ಗಳು ಆಹಾರಗಳನ್ನು ಬೇಯಿಸುವುದರ ಜತೆಗೆ ಅವುಗಳ ಗಾತ್ರವನ್ನೂ ಕುಗ್ಗಿಸುತ್ತದೆ ಎಂಬುದು ನಿಮಗೆ ಗೊತ್ತೇ? ಇದನ್ನು ಕಂಡುಕೊಳ್ಳಲು ಈ ಕೆಳಗಿನ ಪ್ರಯೋಗ ಮಾಡಿ ಫಲಿತಾಂಶ ಮತ್ತು ಕಾರಣ ತಿಳಿದುಕೊಳ್ಳಿ. ಈ ಪ್ರಯೋಗವನ್ನು ಹಿರಿಯರ ಉಪಸ್ಥಿತಿಯಲ್ಲಿಯೇ ಮಾಡಿ.

ಬೇಕಾಗುವ ಸಾಮಗ್ರಿ

ಸ್ಟೈರೊಫೋಮ್‌ ಲೋಟ, ಪ್ರೆಶರ್‌ ಕುಕ್ಕರ್‌, ಗ್ಯಾಸ್‌ ಸ್ಟವ್‌, ಲೋಹದ ಜಾಲರಿ, ಶಾಖ ನಿರೋಧಕ ಪ್ಲಾಸ್ಟಿಕ್‌ ಬೌಲ್‌, ನೀರು, ಟೈಮರ್‌.

ಮಾಡುವ ವಿಧಾನ

1. ಪ್ರೆಶರ್‌ ಕುಕ್ಕರ್‌ಗೆ 2 ರಿಂದ 3 ಸೆಂ.ಮೀವರೆಗೆ ನೀರು ತುಂಬಿಸಿ. ನೀರಿನೊಳಗೆ ಲೋಹದ ಜಾಲರಿ ಇಟ್ಟು ಅದರ ಮೇಲೆ ಪ್ಲಾಸ್ಟಿಕ್‌ ಬೌಲ್‌ ಇಡಿ.

2. ಬೌಲ್‌ನ ಮಧ್ಯ ಭಾಗದಲ್ಲಿ ಸ್ಟೈರೊಫೋಮ್‌ ಲೋಟವನ್ನು ನೇರವಾಗಿ ಇಟ್ಟು ಕುಕ್ಕರ್‌ನ ಮುಚ್ಚಳ ಮುಚ್ಚಿ ಸ್ಟವ್‌ ಮೇಲೆ ಇಡಿ.

3. ಕುಕ್ಕರ್‌ನಿಂದ ವಿಶಲ್‌ ಬರುವ ಸೂಚನೆ ಸಿಕ್ಕಿದಾಗ ಟೈಮರ್‌ ಆನ್‌ ಮಾಡಿ. ಇದಾದ ಹತ್ತು ನಿಮಿಷಗಳವರೆಗೆ ಕುಕ್ಕರನ್ನು ಹಾಗೆಯೇ ಬಿಡಿ. ಬಳಿಕ ಕುಕ್ಕರನ್ನು ಕೆಳಗಿಳಿಸಿ ನಲ್ಲಿ ನೀರಿನ ಕೆಳಗಿಡಿ.

4. ಹರಿಯುವ ನೀರು ಬಿದ್ದಾಗ ಕುಕ್ಕರ್‌ನ ಆವಿ ತಕ್ಷ ಣ ಹೋಗುತ್ತದೆ. ಕುಕ್ಕರ್‌ ತಣ್ಣಗಾದ ಬಳಿಕ ಅದರ ಮುಚ್ಚಳ ತೆಗೆದು ನೋಡಿ.

5. ನೀವು ಬೌಲ್‌ನಲ್ಲಿಟ್ಟಿದ್ದ ಸ್ಟೈರೊಫೋಮ್‌ ಲೋಟ ಅದರ ನೈಜ ಗಾತ್ರದ ಅರ್ಧದಷ್ಟು ಕುಗ್ಗಿ ಚಿಕ್ಕದಾಗಿರುತ್ತದೆ!

ಕಾರಣ ಇಲ್ಲಿದೆ

ಲೋಟಕ್ಕೆ ಬಳಕೆಯಾದ ಸ್ಟೈರೊಫೋಮ್‌ ಮೂಲತಃ ಹಿಗ್ಗಿರುವ ಪಾಲಿಸ್ಟಿರೀನ್‌ ಆಗಿದೆ. ಇದು ಅನಿಲವೊಂದಕ್ಕೆ ಹಿಗ್ಗುವ ಪಾಲಿಮರ್ಸ್‌ ಎಂಬ ಅಣುಗಳ ಉದ್ದನೆಯ ಸರಪಳಿಗಳನ್ನು ಹೊಂದಿದೆ. ಇದೇ ಕಾರಣಕ್ಕೆ ಸ್ಟೈರೊಫೋಮ್‌ನ ಲೋಟ ತುಂಬಾ ಹಗುರವಾಗಿರುತ್ತದೆ. ಆ ಲೋಟವನ್ನು ತುಂಬಾ ಹತ್ತಿರದಿಂದ ನೋಡಿದರೆ ಅದರಲ್ಲಿರುವ ಗಾಳಿಯ ಕಿರುಚೀಲಗಳೂ ಕಾಣಿಸುತ್ತವೆ.

ಪ್ರೆಶರ್‌ ಕುಕ್ಕರ್‌ ನೀರನ್ನು ಆವಿಯನ್ನಾಗಿ ಪರಿವರ್ತಿಸುವ ಮೂಲಕ ಕೆಲಸ ಮಾಡುತ್ತದೆ. ಇದರಲ್ಲಿ ಸ್ವಲ್ಪ ಆವಿ ಮಾತ್ರ ವಿಶಲ್‌ ಕೂಗಿದಾಗ ಹೊರಗೆ ಹೋಗುತ್ತದೆ ಹಾಗೂ ಬಹುತೇಕ ಪ್ರಮಾಣದ ಆವಿ ಕುಕ್ಕರ್‌ನ ಒಳಗಡೆಯೇ ಇರುತ್ತದೆ. ಈ ಬಿಸಿ ಆವಿಯು ಕುಕ್ಕರ್‌ನೊಳಗೆ ಒತ್ತಡವನ್ನುಂಟು ಮಾಡುತ್ತದೆ. ಇದನ್ನೇ ಆಂತರಿಕ ಒತ್ತಡ ಎನ್ನಲಾಗುತ್ತದೆ. ಈ ಪ್ರಯೋಗದಲ್ಲಿ ನೀರಿನ ಆವಿಯ ಒತ್ತಡವು ಸ್ಟೈರೊಫೋಮ್‌ ಲೋಟದ ಗಾಳಿಯನ್ನು ಕುಗ್ಗಿಸಿ ಹಿಂಡುವ ಕಾರಣ ಆ ಲೋಟ ಕುಗ್ಗಿ ಗಾತ್ರದಲ್ಲಿ ಚಿಕ್ಕದಾಗುತ್ತದೆ.