ಸೂಪರ್‌ ಮ್ಯಾಜಿಕ್‌: ಸೀಸಾ ಆಡುವ ಕ್ಯಾಂಡಲ್‌

ನಿಮ್ಮ ಸ್ನೇಹಿತರ ಜತೆ ನೀವು ಸೀಸಾ ಆಡಿರುತ್ತೀರಿ. ಒಮ್ಮೆ ಮೇಲೆ ಮತ್ತೆ ಕೆಳಗೆ ಚಲಿಸುವ ಈ ಸೀಸಾ ಆಟವನ್ನೂ ಕ್ಯಾಂಡಲ್‌ಗಳೂ ಆಡುತ್ತವೆ ಎಂದು ನಿಮಗೆ ಗೊತ್ತಿದೆಯೇ? ಇಲ್ಲವಾದರೆ ಈ ಕೆಳಗಿನ ಪ್ರಯೋಗ ಮಾಡಿ ಫಲಿತಾಂಶ ತಿಳಿದುಕೊಳ್ಳಿ. ಈ ಪ್ರಯೋಗವನ್ನು ಹಿರಿಯರ ಉಪಸ್ಥಿತಿಯಲ್ಲೇ ಮಾಡಿ.

Vijaya Karnataka Web

ಬೇಕಾಗುವ ಸಾಮಗ್ರಿ

ಸಣ್ಣ ಪ್ಲಾಸ್ಟಿಕ್‌ ಲೋಟ, ಎರಡು ಸ್ಟ್ರಾ, ಕತ್ತರಿ, ಮೂರು ಪೇಪರ್‌ ಕ್ಲಿಪ್‌, ಡ್ರಾಯಿಂಗ್‌ ಪಿನ್‌, ಸ್ಟ್ರಾಗೆ ಫಿಟ್‌ ಆಗುವ ಎರಡು ಸಣ್ಣ ಕ್ಯಾಂಡಲ್‌, ಬೆಂಕಿಪೊಟ್ಟಣ, ಹಳೆಯ ದಿನಪತ್ರಿಕೆ, ಅಡಿಕೋಲು.

ಮಾಡುವ ವಿಧಾನ

1. ಟೇಬಲ್‌ ಮೇಲೆ ದಿನಪತ್ರಿಕೆ ಅಥವಾ ಮ್ಯಾಟ್‌ ಇಡಿ. ಪ್ಲಾಸ್ಟಿಕ್‌ ಲೋಟದ ತಳ ಭಾಗದಲ್ಲಿ ಕತ್ತರಿಯ ಸಹಾಯದಿಂದ ಒಂದು ತೂತು ಮಾಡಿ. ಸ್ಟ್ರಾ ತೂರಿಸಲು ಸಾಧ್ಯವಾಗುವಷ್ಟು ಈ ತೂತು ದೊಡ್ಡದಿರಲಿ.

2. ಈ ಲೋಟವನ್ನು ದಿನಪತ್ರಿಕೆಯ ಮೇಲೆ ತಲೆಕೆಳಗೆ ಮಾಡಿಡಿ. ಇದರ ತೂತಿನಲ್ಲಿ ಸ್ಟ್ರಾವನ್ನು ನೇರವಾಗಿ ಸಿಕ್ಕಿಸಿಡಿ.

3. ಇನ್ನೊಂದು ಸ್ಟ್ರಾವನ್ನು ಅಡಿಕೋಲಿನಿಂದ ಅಳತೆ ಮಾಡಿ ಅದರ ಕೇಂದ್ರಭಾಗವನ್ನು ಗುರುತಿಸಿ. ಈ ಭಾಗದಲ್ಲಿ ಡ್ರಾಯಿಂಗ್‌ ಪಿನ್‌ನಿಂದ ಒಂದು ತೂತು ಮಾಡಿ.

4. ಈ ಚಿತ್ರದಲ್ಲಿ ತೋರಿಸಿರುವಂತೆ ಒಂದು ಪೇಪರ್‌ ಕ್ಲಿಪ್ಪನ್ನು ಬಿಡಿಸಿ. ಇದರ ಮೊದಲ ತುದಿಯನ್ನು ಎರಡನೇ ಸ್ಟ್ರಾದ ತೂತಿಗೆ ಸಿಕ್ಕಿಸಿ. ಈ ಕ್ಲಿಪ್‌ನ ಬಾಗಿದ ಭಾಗವನ್ನು ಮೊದಲ ಸ್ಟ್ರಾಗೆ ಸಿಕ್ಕಿಸಿ. ಇವೆರಡೂ ಸ್ಟ್ರಾಗಳು ಈಗ ಸೀಸಾ ಉಪಕರಣದಂತೆ ಕಾಣುತ್ತವೆ.

5. ಈಗ ಎರಡನೆ ಸ್ಟ್ರಾನ ಪ್ರತಿ ತುದಿಗೂ ಕ್ಯಾಂಡಲ್‌ ತೂರಿಸಿ. ಮೇಣದಲ್ಲಿರುವ ಬತ್ತಿ ಹೊರಗಡೆ ಇರುವಂತೆ ನೋಡಿಕೊಳ್ಳಿ. ಕ್ಯಾಂಡಲ್‌ ಗಟ್ಟಿಯಾಗಿ ನಿಲ್ಲಲು ಸಾಧ್ಯವಾಗುವಂತೆ ಪೇಪರ್‌ ಕ್ಲಿಪ್‌ ಅಳವಡಿಸಿ. ಕ್ಯಾಂಡಲ್‌ಗಳನ್ನು ಹಿಂದೆ ಮುಂದೆ ತಳ್ಳುವ ಮೂಲಕ ಎರಡು ಸ್ಟ್ರಾಗಳ ಸೀಸಾ ಭಾರವು ಸಮತೋಲನದಲ್ಲಿರುವಂತೆ ನೋಡಿಕೊಳ್ಳಿ.

6. ಈಗ ಒಂದು ಕ್ಯಾಂಡಲನ್ನು ಬೆಳಗಿಸಿ. ಸ್ವಲ್ಪ ಸೆಕೆಂಡುಗಳ ಬಳಿಕ ಇನ್ನೊಂದು ಕ್ಯಾಂಡಲ್‌ ಬೆಳಗಿಸಿ. ಎರಡೂ ಕ್ಯಾಂಡಲ್‌ ಬೆಳಗಿದ ಮೇಲೆ ಆ ಕ್ಯಾಂಡಲ್‌ಗಳು ಸೀಸಾದಂತೆ ಮೇಲೆ ಮತ್ತು ಕೆಳಗೆ ಚಲಿಸುತ್ತವೆ. ಒಮ್ಮೊಮ್ಮೆ ಈ ಚಲನೆ ವೇಗವಾಗಿ ಕ್ಯಾಂಡಲ್‌ಗಳು ತಿರುಗಲು ಆರಂಭಿಸುತ್ತವೆ!

ಕಾರಣ ಇಲ್ಲಿದೆ

ಆಟದ ಮೈದಾನದಲ್ಲಿರುವ ಸಾಮಾನ್ಯ ಸೀಸಾದಲ್ಲಿ ನೀವು ಮೇಲಕ್ಕೆ ಚಲಿಸಲು ನಿಮ್ಮ ಕಾಲುಗಳನ್ನು ಮತ್ತು ಕೆಳಗೆ ಬರಲು ನಿಮ್ಮ ತೂಕವನ್ನು ಉಪಯೋಗಿಸುತ್ತೀರಿ. ಈ ಕ್ಯಾಂಡಲ್‌ಗಳ ಸೀಸಾದಲ್ಲಿ ಅವುಗಳಲ್ಲಿರುವ ಮೇಣ ಈ ಕೆಲಸ ಮಾಡುತ್ತದೆ. ನೀವು ಒಂದು ಕ್ಯಾಂಡಲ್‌ ಬೆಳಗಿಸಿದಾಗ ಅದರ ಮೇಣ ಮೊದಲು ಕರಗಿ ಹನಿಯುತ್ತದೆ. ಮೇಣ ಕರಗಿ ಕೆಳಗೆ ಬಿದ್ದಾಗ ಕ್ಯಾಂಡಲ್‌ನ ಭಾರ ಕಡಿಮೆಯಾಗಿ ಅದು ಮೇಲೇರುತ್ತದೆ. ನಂತರ ನೀವು ಕೆಳಗಡೆ ಇರುವ ಇನ್ನೊಂದು ಕ್ಯಾಂಡಲ್‌ ಬೆಳಗಿಸಿದಾಗ ಅದರ ಮೇಣ ಕೂಡಾ ಕರಗಿ ಕೆಳಗೆ ಬೀಳುವ ಕಾರಣ ಅದು ಬೇಗನೆ ಹಗುರವಾಗಿ ಮೇಲಕ್ಕೇಳುತ್ತದೆ.

ಎರಡೂ ಕ್ಯಾಂಡಲ್‌ಗಳ ತೂಕದಲ್ಲಿರುವ ವ್ಯತ್ಯಾಸಕ್ಕೆ ಅನುಗುಣವಾಗಿ ಕ್ಯಾಂಡಲ್‌ಗಳ ಮೇಣ ಕರಗಿ ಕೆಳಗೆ ಬಿದ್ದು ಮೇಲೆ ಮತ್ತು ಕೆಳಗೆ ಚಲಿಸುತ್ತವೆ. ಕ್ಯಾಂಡಲ್‌ಗಳು ತಿರುಗಲು ಆರಂಭಿಸಿದಾಗ ಅವುಗಳ ವೇಗವೂ ಜಾಸ್ತಿಯಾಗುತ್ತದೆ. ಒಂದು ವೇಳೆ ನೀವು ಎರಡೂ ಕ್ಯಾಂಡಲ್‌ಗಳನ್ನು ಒಂದೇ ಸಮಯದಲ್ಲಿ ಬೆಳಗಿಸಿದರೆ ಈ ಸೀಸಾ ಚಲನೆ ಕಂಡು ಬರುವುದಿಲ್ಲ. ಯಾಕೆಂದರೆ ಎರಡೂ ಕ್ಯಾಂಡಲ್‌ಗಳ ಮೇಣವು ಒಂದೇ ಪ್ರಮಾಣದಲ್ಲಿ ಕರುಗುವುದರಿಂದ ತೂಕದಲ್ಲಿ ವ್ಯತ್ಯಾಸವಾಗದೆ ಸಮವಾಗಿರುತ್ತದೆ.