ಸೂಪರ್‌ ಮ್ಯಾಜಿಕ್‌: ಮನೆಯೊಳಗೆಯೇ ಪಾಚಿ ಬೆಳೆಸಿ

ನೀರು ನಿಲ್ಲುವ ಕಡೆ ಬೆಳೆಯುವ ಪಾಚಿಯನ್ನು ನೀವು ನೋಡಿರುತ್ತೀರಿ. ಹೂವಿಲ್ಲದ ಈ ಸಣ್ಣ ಸಸ್ಯ ನೆರಳು ಮತ್ತು ತೇವಾಂಶ ಇರುವ ಪ್ರದೇಶದಲ್ಲಿ ಗೊಂಚಲು ರೂಪದಲ್ಲಿ ಬೆಳೆಯುತ್ತದೆ. ತುಂಬಾ ಸುಂದರವಾಗಿ ಕಾಣುವ ಈ ಹಸಿರು ಸಸ್ಯವನ್ನು ಮನೆಯೊಳಗೆಯೂ ಬೆಳೆಸಬಹುದು. ಈ ಕೆಳಗಿನ ಪ್ರಯೋಗದ ಮೂಲಕ ಪಾಚಿ ಬೆಳೆಸುವ ವಿಧಾನವನ್ನು ವಿವರಿಸಲಾಗಿದೆ.

ಬೇಕಾಗುವ ಸಾಮಗ್ರಿ

ಬ್ಲೆಂಡರ್‌, ಮಜ್ಜಿಗೆ, ನೀರು, ಪಾಚಿಯ ಒಣಗಿದ ಅಥವಾ ಜೀವಂತ ಪೊದೆ, ಪೇಂಟ್‌ ಬ್ರಷ್‌, ಸ್ಪ್ರೇ ಬಾಟಲಿ, ಗಟ್ಟಿ ಹಲಗೆ.

ಮಾಡುವ ವಿಧಾನ

1. ಬ್ಲೆಂಡರ್‌ಗೆ ಎರಡು ಕಪ್‌ ಮಜ್ಜಿಗೆ ಮತ್ತು ಎರಡು ಕಪ್‌ ನೀರು ಹಾಕಿ. ಆಮೇಲೆ ಇದಕ್ಕೆ ಪಾಚಿಯ ಪೊದೆ ಹಾಕಿ ಮಿಲ್ಕ್‌ಶೇಕ್‌ನಂತೆ ಚೆನ್ನಾಗಿ ಬ್ಲೆಂಡ್‌ ಮಾಡಿ.

2. ಈಗ ಗಟ್ಟಿ ಹಲಗೆಯ ಮೇಲೆ ಈ ಮಿಶ್ರಣ ಹಾಕಿ ಅಥವಾ ಗೋಡೆ, ನಿಮ್ಮ ಗಾರ್ಡನ್‌ನಲ್ಲಿರುವ ಬಂಡೆ ಕಲ್ಲು ಅಥವಾ ಮರದ ಮೇಲೆ ನಿಮ್ಮ ಹೆಸರನ್ನು ಪೇಂಟ್‌ ಮಾಡಿ ಈ ಮಿಶ್ರಣ ಹಾಕಿ.

3. ಗಾರ್ಡನ್‌ ವಿಶಾಲವಾಗಿದ್ದರೆ ಈ ಮಿಶ್ರಣವನ್ನು ಕಲ್ಲು, ಬೇಲಿಗೆ ಸುರಿಯಬಹುದು ಅಥವಾ ಗಾರ್ಡನ್‌ನ ನೆಲಕ್ಕೆ ಹಚ್ಚಬಹುದು. ಸಣ್ಣ ಪಿಂಗಾಣಿ ಪಾಟ್‌ನ ಮೇಲ್ಮೈಗೂ ಈ ಮಿಶ್ರಣ ಸುರಿಯಬಹುದು.

4. ಈ ಮಿಶ್ರಣ ಸುರಿದ ಎಲ್ಲಾ ಮೇಲ್ಮೈಗಳು ನೆರಳಿರುವ ಕಡೆ ಇರುವಂತೆ ನೋಡಿಕೊಳ್ಳಿ. ಹಾಗಂತ ಕತ್ತಲೆ ಕೋಣೆಯಲ್ಲಿ ಇಡಬೇಡಿ. ಯಾಕೆಂದರೆ ಈ ಸಸ್ಯದ ದ್ಯುತಿಸಂಶ್ಲೇಷಣೆ ಕ್ರಿಯೆಗೆ ಸೂರ್ಯನ ಬೆಳಕು ಬೇಕಾಗುತ್ತದೆ.

5. ಎರಡು ವಾರಗಳ ಕಾಲ ಪಾಚಿ ಮಿಶ್ರಣವಿರುವ ಮೇಲ್ಮೈಗಳಿಗೆ ಸ್ಪ್ರೇ ಬಾಟಲಿಯಿಂದ ನೀರು ಸಿಂಪಡಿಸುತ್ತ ಇರಿ.

6. ಕನಿಷ್ಠ ಮೂರು ವಾರಗಳ ನಂತರ ಈ ಮಿಶ್ರಣ ಸುರಿದ ಮೇಲ್ಮೈಗಳಲ್ಲಿ ಪಾಚಿಯು ಪೊದೆಯಂತೆ ಬೆಳೆದು ಸುಂದರವಾಗಿ ಕಾಣುತ್ತದೆ!

ಕಾರಣ ಇಲ್ಲಿದೆ

ಪಾಚಿ ಮೂಲತಃ ಅತ್ಯಂತ ಸರಳವಾದ ಒಂದು ಸಸ್ಯ. ಇದು ಎಷ್ಟು ಸರಳವಾಗಿದೆಯೆಂದರೆ ಇದಕ್ಕೆ ಬೇರಿನ ವ್ಯವಸ್ಥೆಯೂ ಇಲ್ಲ. ಈ ಕಾರಣಕ್ಕೆ ಇದು ಯಾವುದೇ ಗಟ್ಟಿಯಾದ ಮೇಲ್ಮೈಯಲ್ಲೂ ಬೆಳೆಯುತ್ತದೆ ಮತ್ತು ಸಣ್ಣ ಸಣ್ಣ ಎಳೆಗಳ ಮೂಲಕ ಹರಡಿಕೊಳ್ಳುತ್ತದೆ. ಪಾಚಿಗಳು ಸಾಮಾನ್ಯವಾಗಿ ಪೌಷ್ಟಿಕಾಂಶ ಮತ್ತು ನೀರನ್ನು ತಮ್ಮ ಎಲೆಗಳಿಂದ ಹೀರಿಕೊಳ್ಳುತ್ತವೆ. ಇದು ಬೆಳೆಯಲು ಬೀಜಗಳ ಅಗತ್ಯವೂ ಇಲ್ಲ. ಸ್ಪೋರ್‌ ಅಥವಾ ಬೀಜಕವೆಂಬ ಸಣ್ಣ ಕಣಗಳಿಂದಲೇ ಇದು ಹರಡಿಕೊಳ್ಳುತ್ತದೆ. ಈ ಬೀಜಕಗಳು ಗಾಳಿಯ ಮೂಲಕ ಚದುರಿ ತೇವಾಂಶವಿರುವ ಜಾಗಗಳನ್ನು ಹುಡುಕಿಕೊಂಡು ಹೋಗಿ ಅಲ್ಲಿಯೇ ನೆಲೆಯೂರುತ್ತವೆ. ಪಾಚಿಯನ್ನು ಮನೆಯೊಳಗಡೆ ಬೆಳೆಸಬೇಕಿದ್ದರೆ ಮಾತ್ರ ಸ್ವಲ್ಪ ಒಣ ಅಥವಾ ಹಾಸಿ ಪಾಚಿ ಬೇಕಾಗುತ್ತದೆ.

ಹುಲ್ಲು ಬೆಳೆಯದ ಜಾಗಗಳಲ್ಲಿ ಹಸಿರು ಮೂಡಿಸಬೇಕಿದ್ದರೆ ಪಾಚಿ ಬೆಸ್ಟ್‌. ಇದಕ್ಕೆ ಕೇವಲ ನೆರಳು ಮತ್ತು ಸ್ವಲ್ಪ ತೇವಾಂಶ ಸಾಕಾಗುತ್ತವೆ. ಈ ಕಾರಣಕ್ಕೆ ಮನೆಯೊಳಗೆ ಬೆಳೆಸುವ ಪಾಚಿಗೆ ಪ್ರತಿದಿನ ನೀರು ಸಿಂಪಡಿಸುತ್ತಿರಬೇಕು. ಈ ಪ್ರಯೋಗದಲ್ಲಿ ಬಳಸಲಾದ ಮಜ್ಜಿಗೆಯು ಆಮ್ಲೀಯವಾಗಿದ್ದು ಇದು ಪಾಚಿಯ ಬೆಳವಣಿಗೆಗೆ ಸಹಕಾರಿಯಾಗಿದೆ.