ಸೂಪರ್‌ ಮ್ಯಾಜಿಕ್‌: ಗಾಳಿಯ ಒತ್ತಡ ಬಲು ಜೋರು

ನಮ್ಮ ಸುತ್ತಮುತ್ತ ಆವೃತವಾಗಿರುವ ಗಾಳಿ ನಮ್ಮ ವಿರುದ್ಧವಾಗಿ ಬಲವಾಗಿ ತಳ್ಳಲ್ಪಡುತ್ತದೆ ಎಂಬ ವಿಷಯ ಬಹುತೇಕ ಜನರಿಗೆ ಗೊತ್ತಿಲ್ಲ. ಈ ತಳ್ಳಲ್ಪಡುವಿಕೆಯನ್ನು ಗಾಳಿಯ ಒತ್ತಡ ಎಂದು ಕರೆಯಲಾಗುತ್ತದೆ. ಗಾಳಿಯ ಕಣಗಳು ಎಲ್ಲಾ ದಿಕ್ಕುಗಳಲ್ಲಿ ಸಮಾನವಾಗಿ ಹರಡಿ ಸಮತೋಲನ ಮಾಡಿಕೊಳ್ಳುವ ಕಾರಣ ಗಾಳಿಯ ಒತ್ತಡ ನಮಗೆ ಹೆಚ್ಚು ಅನುಭವವಾಗುವುದಿಲ್ಲ. ನಮ್ಮ ದೇಹದೊಳಗಿನ ಗಾಳಿಯ ಒತ್ತಡವೂ ನಮ್ಮ ಸುತ್ತಲಿರುವ ಗಾಳಿಯ ಒತ್ತಡಕ್ಕೆ ಸಮವಾಗಿರುವುದರಿಂದ ಗಾಳಿಯು ಖಾಲಿ ಸೋಡಾ ಕ್ಯಾನ್‌ಗೆ ಬಲವಾಗಿ ಅಪ್ಪಳಿಸಿದಂತೆ ನಮಗೆ ಅಪ್ಪಳಿಸುವುದಿಲ್ಲ. ಗಾಳಿಗೆ ಅಷ್ಟೊಂದು ಶಕ್ತಿಯಿದೆ. ಈ ಪ್ರಯೋಗದಲ್ಲಿ ಗಾಳಿಯ ಒತ್ತಡದಿಂದ ಆಗುವ ಅನಾಹುತಕ್ಕಿಂತ ಅದರಿಂದಾಗುವ ಕೆಲವು ಅಚ್ಚರಿಗಳನ್ನು ವಿವರಿಸಲಾಗಿದೆ. ಈ ಪ್ರಯೋಗ ಮಾಡಿ ಫಲಿತಾಂಶ ತಿಳಿದುಕೊಳ್ಳಿ.

ಬೇಕಾಗುವ ಸಾಮಗ್ರಿ

ಎರಡು ಟೇಬಲ್‌ ಟೆನಿಸ್‌ ಬಾಲ್‌, ಮಾಡೆಲಿಂಗ್‌ ಕ್ಲೇ, ಎರಡು ಸ್ಟ್ರಾ, ಹೇರ್‌ ಡ್ರೈಯರ್‌.

ಮಾಡುವ ವಿಧಾನ

1. ಈ ಚಿತ್ರದಲ್ಲಿ ತೋರಿಸಿರುವಂತೆ ಮಾಡೆಲಿಂಗ್‌ ಕ್ಲೇನಿಂದ ಎರಡು ಪುಟ್ಟ ಗುಡ್ಡದಂಥ ರಚನೆ ಮಾಡಿ.

2. ಈ ಕ್ಲೇನಲ್ಲಿ ಎರಡು ಸ್ಟ್ರಾಗಳನ್ನು ಒಂದಕ್ಕೊಂದು ಸಮಾನ ಅಂತರದಲ್ಲಿ ಇರುವಂತೆ ನೇರವಾಗಿ ಮತ್ತು ಅದಕ್ಕೆ ತಿರುಗಲು ಸಾಧ್ಯವಾಗುವಂತೆ ನಿಲ್ಲಿಸಿ.

3. ಪ್ರತಿ ಸ್ಟ್ರಾದ ಮೇಲ್ಭಾಗದಲ್ಲಿ ಸ್ಪಲ್ಪ ಕ್ಲೇ ಉಪಯೋಗಿಸಿಕೊಂಡು ಟೇಬಲ್‌ ಟೆನಿಸ್‌ ಬಾಲ್‌ಗಳನ್ನು ಅಂಟಿಸಿ. ಈ ಬಾಲ್‌ಗಳೂ ಸಮಾನ ಅಂತರದಲ್ಲಿ ಇರುವಂತೆ ನೋಡಿಕೊಳ್ಳಿ.

4. ಹೇರ್‌ ಡ್ರೈಯರ್‌ ಆನ್‌ ಮಾಡಿ ಎರಡೂ ಬಾಲ್‌ಗಳ ಮೇಲಕ್ಕೆ ಹಿಡಿಯಿರಿ. ಇದರಿಂದ ಬರುವ ಗಾಳಿ ಎರಡೂ ಬಾಲ್‌ಗಳಿಗೂ ಸಮವಾಗಿ ಸಿಗುವಂತೆ ಇರಬೇಕು.

5. ಈ ರೀತಿ ಮಾಡಿದಾಗ ಆ ಬಾಲ್‌ಗಳು ಪರಸ್ಪರ ಹತ್ತಿರಕ್ಕೆ ಬರುತ್ತವೆ!

ಕಾರಣ ಇಲ್ಲಿದೆ

18ನೇ ಶತಮಾನದಲ್ಲಿದ್ದ ಸ್ವಿಸ್‌ನ ಖ್ಯಾತ ಗಣಿತ ತಜ್ಞ ಮತ್ತು ಭೌತಶಾಸ್ತ್ರಜ್ಞ ಡೇನಿಯಲ್‌ ಬೆರ್ನೌಲಿ ಎಂಬವರು ಒಂದು ವೈಜ್ಞಾನಿಕ ಸಿದ್ಧಾಂತವನ್ನು ಪ್ರತಿಪಾದಿಸಿದ್ದರು. ಅದು ಈಗ ಬೆರ್ನೌಲಿ ಸಿದ್ಧಾಂತ ಎಂದೇ ಕರೆಯಲ್ಪಡುತ್ತದೆ. ಈ ಸಿದ್ಧಾಂತ ಚಲಿಸುವ ದ್ರವಗಳಿಗೆ ಅನ್ವಯವಾಗುತ್ತದೆ. ಗಾಳಿಯೂ ಚಲಿಸುವ ಕಾರಣ ಅದನ್ನೂ ದ್ರವವೆಂದೇ ಪರಿಗಣಿಸಲಾಗುತ್ತದೆ. ಈ ಸಿದ್ಧಾಂತದ ಪ್ರಕಾರ, ಒಂದು ಮೇಲ್ಮೈಯಲ್ಲಿ ಗಾಳಿ ಎಷ್ಟು ವೇಗವಾಗಿ ಚಲಿಸುತ್ತದೊ ಅದು ಆ ಮೇಲ್ಮೈಗೆ ತಳ್ಳಲ್ಪಡುವ ಪ್ರಮಾಣ ಕಡಿಮೆಯಾಗುತ್ತದೆ. ಅಂದರೆ ಗಾಳಿಯು ಚಲಿಸುವಾಗ ವ್ಯಯಿಸಿದ ಒತ್ತಡವು ಮೇಲ್ಮೈಯಲ್ಲಿ ಕಡಿಮೆಯಾಗುತ್ತದೆ.

ಈ ಪ್ರಯೋಗದಲ್ಲಿ ಹೇರ್‌ ಡ್ರೈಯರ್‌ ಜೋರಾಗಿ ಬೀಸುವ ಗಾಳಿಯನ್ನು ಹೊರಗೆ ತಳ್ಳುತ್ತದೆ. ಗಾಳಿಯ ಅಲೆ ಎರಡು ಟೇಬಲ್‌ ಟೆನಿಸ್‌ ಬಾಲ್‌ಗಳ ನಡುವೆ ಹಾದು ಹೋಗುವಾಗ ಅದು ಆ ವಲಯದಲ್ಲಿ ಬಾಲ್‌ಗಳಿಂದ ಕಡಿಮೆ ಒತ್ತಡವನ್ನು ಪಡೆದುಕೊಳ್ಳುತ್ತದೆ. ಆದರೆ ಬಾಲ್‌ಗಳ ಸುತ್ತಮುತ್ತಲಿರುವ ಗಾಳಿಯ ಒತ್ತಡವು ಕೆಳಗೆ ಹೋಗುವುದಿಲ್ಲ. ಇಲ್ಲಿ ಗಾಳಿಯ ತಳ್ಳಲ್ಪಡುವಿಕೆ ಕಡಿಮೆಯಾಗುವುದರಿಂದ ಬಾಲ್‌ಗಳ ಸುತ್ತಮುತ್ತಲಿನ ಗಾಳಿಯು ಆ ಬಾಲ್‌ಗಳನ್ನು ಮಧ್ಯಕ್ಕೆ ತಳ್ಳುತ್ತದೆ. ಈ ಕಾರಣದಿಂದ ಆ ಬಾಲ್‌ಗಳು ಪರಸ್ಪರ ಹತ್ತಿರ ಬರುತ್ತವೆ.