ಸೂಪರ್‌ ಮ್ಯಾಜಿಕ್‌: ಗಾಳಿಯ ಕ್ರಿಯಾಶೀಲ ಗುಣ

ನಮ್ಮ ಕಣ್ಣಿಗೆ ಗಾಳಿಯು ಕಾಣಿಸದಿದ್ದರೂ ಅದರ ಕ್ರಿಯಾಶೀಲತೆ ಮಾತ್ರ ಎಲ್ಲೆಡೆ ವ್ಯಾಪಿಸಿದೆ. ನಮಗಿಂತ ಹೆಚ್ಚಾಗಿ ಅದುವೇ ಹೆಚ್ಚಿನ ಸ್ಥಳವನ್ನು ಆವರಿಸಿಕೊಳ್ಳುತ್ತದೆ. ಈ ಕೆಳಗಿನ ಪ್ರಯೋಗದ ಮೂಲಕ ಅದರ ಕ್ರಿಯಾಶೀಲ ಗುಣವನ್ನು ತಿಳಿದುಕೊಳ್ಳಬಹುದು.

Vijaya Karnataka Web

ಬೇಕಾಗುವ ಸಾಮಗ್ರಿ

ಪ್ಲಾಸ್ಟಿಕ್‌ ಬ್ಯಾಗ್‌, ರಬ್ಬರ್‌ ಬ್ಯಾಂಡ್‌, ನಿಮ್ಮ ಕೈ ಒಳಗೆ ಹೋಗುವಷ್ಟು ಅಗಲವಿರುವ ಗಾಜಿನ ಜಾರ್‌.

ಮಾಡುವ ವಿಧಾನ

1. ಪ್ಲಾಸ್ಟಿಕ್‌ ಬ್ಯಾಗ್‌ನೊಳಗೆ ನಿಮ್ಮ ಕೈ ಹಾಕಿ ಅದರ ಒಳಭಾಗವನ್ನು ಹೊರಗೆ ಎಳೆಯಿರಿ.

2. ಈ ರೀತಿ ಮಾಡಿದಾಗ ಅದರ ಒಳಭಾಗ ಸುಲಭವಾಗಿ ಹೊರಗೆ ಬರುತ್ತದೆ.

3. ಅದೇ ಪ್ಲಾಸ್ಟಿಕ್‌ ಬ್ಯಾಗನ್ನು ಗಾಜಿನ ಜಾರ್‌ನೊಳಗೆ ಹಾಕಿ ಎಲ್ಲೆಡೆ ಹರಡಿಸಿ.

4. ಬ್ಯಾಗ್‌ನ ಮೇಲ್ಭಾಗವನ್ನು ಜಾರ್‌ನ ಬಾಯಿಗೆ ಮಡಚಿ ರಬ್ಬರ್‌ ಬ್ಯಾಂಡನ್ನು ಬಿಗುವಾಗಿ ಕಟ್ಟಿ.

5. ಈಗ ನಿಮ್ಮ ಕೈಯನ್ನು ಜಾರ್‌ನೊಳಗೆ ಹಾಕಿ ಅದರಲ್ಲಿರುವ ಪ್ಲಾಸ್ಟಿಕ್‌ ಬ್ಯಾಗ್‌ನ ಒಳಭಾಗವನ್ನು ಮತ್ತೆ ಹೊರಗೆ ತರಲು ಪ್ರಯತ್ನಿಸಿ.

6. ಈ ರೀತಿ ಮಾಡಿದಾಗ ಪ್ಲಾಸ್ಟಿಕ್‌ ಬ್ಯಾಗನ್ನು ಜಾರ್‌ನಿಂದ ಪ್ರತ್ಯೇಕಗೊಳಿಸಲು ತುಂಬಾ ಕಷ್ಟವಾಗುತ್ತದೆ. ರಬ್ಬರ್‌ ಬ್ಯಾಂಡ್‌ನ ಬಿಗಿ ಭದ್ರತೆಯಿಂದಾಗಿ ಬ್ಯಾಗ್‌ ಅಲ್ಲಿಯೇ ಇರುತ್ತದೆ.

ಕಾರಣ ಇಲ್ಲಿದೆ

ಗಾಳಿಯು ಎಲ್ಲದರ ಮೇಲೆಯೂ ಸ್ವಲ್ಪ ಒತ್ತಡವನ್ನು ಪ್ರಯೋಗಿಸುತ್ತದೆ ಅಥವಾ ತಳ್ಳುತ್ತದೆ. ನೀವು ಪ್ಲಾಸ್ಟಿಕ್‌ ಬ್ಯಾಗನ್ನು ಜಾರ್‌ನ ಸುತ್ತ ರಬ್ಬರ್‌ ಬ್ಯಾಂಡ್‌ನಿಂದ ಬಿಗಿಯಾಗಿ ಕಟ್ಟಿದಾಗ ಸಣ್ಣ ಪ್ರಮಾಣದ ಗಾಳಿ ಅವುಗಳೆರಡರ ನಡುವೆ ಸಿಕ್ಕಿ ಹಾಕಿಕೊಂಡಿರುತ್ತದೆ. ಆದರೆ ಖಾಲಿ ಜಾರ್‌ನೊಳಗಿರುವ ಗಾಳಿಯ ಪ್ರಮಾಣ ಇದಕ್ಕಿಂತ ಹೆಚ್ಚಿರುತ್ತದೆ. ಆದ್ದರಿಂದ ಜಾರ್‌ನೊಳಗಿನ ಗಾಳಿಯ ತಳ್ಳುವಿಕೆಗೆ ಹೋಲಿಸಿದರೆ ಪ್ಲಾಸ್ಟಿಕ್‌ ಮತ್ತು ಜಾರ್‌ ಮಧ್ಯೆ ಸಿಲುಕಿರುವ ಗಾಳಿಯ ಪ್ರಮಾಣ ತುಂಬಾ ಕಡಿಮೆ. ಜಾರ್‌ನೊಳಗಿರುವ ಗಾಳಿಯು ಪ್ಲಾಸ್ಟಿಕ್‌ ಬ್ಯಾಗನ್ನು ಕೆಳಗೆ ತಳ್ಳುತ್ತದೆ. ನೀವು ಅದರೊಳಗೆ ಕೈ ಹಾಕಿ ಅದನ್ನು ಹೊರಗೆ ಎಳೆಯಲು ಯತ್ನಿಸಿದಾಗ ಗಾಳಿಯು ಅದನ್ನು ಅಲ್ಲಿಯೇ ಬಿಗಿಯಾಗಿ ಹಿಡಿದುಕೊಂಡಿರುತ್ತದೆ. ಆದ್ದರಿಂದ ಪ್ಲಾಸ್ಟಿಕ್‌ ಬ್ಯಾಗನ್ನು ಜಾರ್‌ನಿಂದ ಸುಲಭವಾಗಿ ಪ್ರತ್ಯೇಕಗೊಳಿಸಲು ಆಗುವುದಿಲ್ಲ.