ತರಕಾರಿ ಗೊಂಬೆ ಮಾಡಿ

ಸಾಮಗ್ರಿ: ದಪ್ಪ ಕ್ಯಾರೆಟ್‌-2, ಕೆಂಪು ಮೂಲಂಗಿ-1, ಕ್ಯಾಪ್ಸಿಕಂನ ದುಂಡನೆಯ ಹೋಳು-2, ಕೆಂಪು ಬಿಂದಿ-1, ಚಿಕ್ಕ ಗುಂಡು ಪಿನ್‌-ಸ್ವಲ್ಪ, ಲವಂಗ-4, ಮರದ ಟೂತ್‌ ಪಿಕ್ಸ್‌-ಸ್ವಲ್ಪ, ತಾಜಾ ಹಸಿರು ಹುಲ್ಲು-ಸ್ವಲ್ಪ, ಹಸಿರು ಮ್ಯಾಟ್‌-1.

ವಿಧಾನ: ಕ್ಯಾರೆಟ್‌ಗಳನ್ನು ಮಧ್ಯಕ್ಕೆ ಕತ್ತರಿಸಿ ಬೇರ್ಪಡಿಸಿ. ಇದರಲ್ಲಿ ಎರಡು ದಪ್ಪನೆಯ ದುಂಡನೆ ಪೀಸ್‌ ಮಾಡಿ. ಗಂಡು ಗೊಂಬೆ ಮಾಡಲು ಎರಡೂವರೆ ಇಂಚಿನಷ್ಟು ಕ್ಯಾರೆಟ್‌ ಅನ್ನು ಉಲ್ಟಾ ಮಾಡಿ. ಕೆಂಪು ಮೂಲಂಗಿಯನ್ನು ಎರಡೂಕಾಲು ಇಂಚಿನಷ್ಟು ಕತ್ತರಿಸಿ ಕ್ಯಾರೆಟ್‌ ಮೇಲೆ ಟೂತ್‌ಪಿಕ್‌ ಚುಚ್ಚಿ ನಿಲ್ಲಿಸಿ. ಈ ಮೂಲಂಗಿಯ ಮೇಲೆ ಕಣ್ಣು, ಬಾಯಿಯನ್ನು ಸಿಪ್ಪೆ ಹೋಗುವಂತೆ ಗುರುತು ಮಾಡಿ. ಅದರ ಮೇಲೆ ಕತ್ತರಿಸಿದ ಬಿಂದಿಯನ್ನು ಬಾಯಿಯ ಜಾಗದಲ್ಲಿ ಅಂಟಿಸಿ. ಕ್ಯಾರೆಟ್‌ ಪೀಸನ್ನು ಮೂಗಿನ ಆಕಾರದಂತೆ ಕತ್ತರಿಸಿ ಗುಂಡು ಪಿನ್‌ನಿಂದ ಚುಚ್ಚಿ. ಕಣ್ಣಿಗೆ ಲವಂಗ ಚುಚ್ಚಿ. ಕ್ಯಾರೆಟ್‌ನ ಚಿಕ್ಕ ಎರಡು ಪೀಸ್‌ಗಳನ್ನು ಕಿವಿಯಂತೆ ಮಾಡಿ ಚುಚ್ಚಿ. ಸ್ವಲ್ಪ ದೊಡ್ಡದಾದ ಇನ್ನೆರಡು ಪೀಸ್‌ಗಳನ್ನು ಕ್ಯಾರೆಟ್‌ನ ಗಟ್ಟಿ ಭಾಗದಿಂದ ಕತ್ತರಿಸಿ ಗುಂಡು ಪಿನ್‌ನಿಂದ ಗೊಂಬೆಗೆ ಕೈಗಳಂತೆ ಚುಚ್ಚಿ. ಕೆಂಪು ಮೂಲಂಗಿಯ ಸಿಪ್ಪೆ ತೆಗೆದು ಎರಡು ಪೀಸ್‌ ಮಾಡಿ ಮುಂಭಾಗದಲ್ಲಿಟ್ಟು ಗುಂಡು ಪಿನ್‌ ಚುಚ್ಚಿ. ಕ್ಯಾರೆಟ್‌ ಮೇಲೆ ಅರ್ಧ ಕೆಂಪು ಮೂಲಂಗಿಯ ದಪ್ಪ ಪೀಸನ್ನು ಮುಖದಂತೆ ನಿಲ್ಲಿಸಿ. ತಲೆ ಮತ್ತು ಶರೀರ ಭಾಗದ ಮಧ್ಯದಲ್ಲಿ ಕ್ಯಾಪ್ಸಿಕಂ ಪೀಸ್‌ ಇಟ್ಟು ಹಿಂದಿನಿಂದ ಗುಂಡು ಪಿನ್‌ ಚುಚ್ಚಿ. ಮುಂದೆ ಪದಕದಂತೆ ಕೆಂಪು ಸಿಪ್ಪೆ ತೆಗೆದ ಮೂಲಂಗಿ ತುಂಡು ಅದರ ಮೇಲೆ ಕ್ಯಾರೆಟ್‌ ತುಂಡು ಇಟ್ಟು ಪಿನ್‌ ಚುಚ್ಚಿ. ಟೋಪಿಗೆ ತಲೆ ಮೇಲೆ ದುಂಡನೆಯ ಕ್ಯಾರೆಟ್‌ ತುಂಡನ್ನಿಟ್ಟು ಅದರ ಮೇಲೆ ಕೆಂಪು ಮೂಲಂಗಿಯ ತೊಟ್ಟಿನ ಭಾಗ ಕತ್ತರಿಸಿಟ್ಟು ಪಿನ್‌ ಮಾಡಿ. ಕಣ್ಣುಗಳಿಗೆ ಎರಡು ಚಿಕ್ಕ ಲವಂಗ ಚುಚ್ಚಿ. ಕೆಂಪು ಮೂಲಂಗಿಯ ದಪ್ಪ ದುಂಡನೆಯ ಪೀಸನ್ನು ಅರ್ಧಕೆ ಕತ್ತರಿಸಿ ಗೊಂಬೆ ಮುಂದೆ ಚಿತ್ರದಲ್ಲಿ ತೋರಿಸಿರುವಂತೆ ಇಡಿ.

ಹೆಣ್ಣು ಗೊಂಬೆ ಮಾಡಲು ಮೇಲೆ ತಿಳಿಸಿದಂತೆಯೇ ದಪ್ಪ ಕ್ಯಾರೆಟ್‌ ಮೇಲೆ ಕೆಂಪು ಮೂಲಂಗಿಯ ಬಿಳಿ ಪೀಸನ್ನು ಮುಖದಂತೆ ಕಾಣಲು ಇಡಿ. ಅದಕ್ಕೆ ಬಿಂದಿಯಿಂದ ಬಾಯಿ ಮಾಡಿ ಕೂರಿಸಿ. ಕಣ್ಣಿಗಾಗಿ ಲವಂಗ ಚುಚ್ಚಿ. ಎರಡು ಕಿವಿಗಳನ್ನು ಚುಚ್ಚಿ. ದಪ್ಪ ಮೆಣಸಿನಕಾಯಿಯ ದಪ್ಪ ಪೀಸನ್ನು ಕತ್ತಿನ ಕೆಳಗೆ ಇಟ್ಟರೆ ಫ್ರಿಲ್‌ ಥರ ಕಾಣುತ್ತದೆ. ಮತ್ತೊಂದು ದಪ್ಪ ಮೆಣಸಿನಕಾಯಿಯ ಸಣ್ಣ ಪೀಸನ್ನು ತಲೆ ಮೇಲಿಟ್ಟು ಕ್ಯಾರೆಟ್‌ನ ಚೂಪಾದ ಭಾಗ ಕತ್ತರಿಸಿ ಪಿನ್‌ ಚುಚ್ಚಿ. ಕ್ಯಾರೆಟ್‌ ಪೀಸ್‌ಗಳನ್ನು ಬಟನ್‌ ಜಾಗದಲ್ಲಿಟ್ಟು ಪಿನ್‌ ಮಾಡಿ. ಕ್ಯಾರೆಟ್‌ ಪೀಸನ್ನು ಕೈಗಳಂತೆ ಚುಚ್ಚಿ. ತಟ್ಟೆಯಲ್ಲಿ ಹಸಿರು ಮ್ಯಾಟ್‌ ಹಾಸಿ ಪೀಠದಂತೆ ಕತ್ತರಿಸಿದ ಕ್ಯಾರೆಟ್‌ ತುಂಡುಗಳನ್ನಿಟ್ಟು ಅದರ ಮೇಲೆ ಎರಡೂ ಗೊಂಬೆಗಳನ್ನು ಅಕ್ಕಪಕ್ಕ ನಿಲ್ಲಿಸಿ. ಹಿಂದೆ ತಾಜಾ ಹಸಿರು ಹುಲ್ಲು ಹಾಸಿದರೆ ತೋಟದಲ್ಲಿ ಗೊಂಬೆಗಳು ಇರುವಂತೆ ಕಾಣುತ್ತದೆ.

ಜ್ಯೋತಿ ದೀಪಕ್‌