ಶಿಶುಗೀತೆ: ಗೌರಿ ಹಾಲು ಕೊಟ್ಟಳು

ಸೋಮಲಿಂಗ ಬೇಡರ

ನಮ್ಮ ಮನೆಯ ಪುಟ್ಟ ತಮ್ಮ

ದಿನವು ಅಳುವನು

ಕುಡಿಯಲೊಲ್ಲೆ ಕೊಂಡು ತರುವ

ಹಾಲು ಎನುವನು

ಮನೆಯ ಮುಂದೆ ಹಸುವು ಬರಲು

ಖುಷಿಯ ಪಡುವನು

ಅದರ ಹಾಲು ಬೇಕು ನನಗೆ

ಎನುತಲಿರುವನು

ಪುಟ್ಟ ತಮ್ಮ ಮಾಡುತಿರುವ

ಹಟಕೆ ಅಮ್ಮನು

ಕೊಂಡು ತನ್ನಿ ಮನೆಗೆ ಒಂದು

ಹಸುವು ಎಂದಳು

ಅಮ್ಮ ಹೇಳಿದೊಂದೆ ತಡವು

ಅಪ್ಪ ಹೊರಟನು

ಸಂತೆಗಳನು ಸುತ್ತಿ ಅಲೆದು

ತರಲು ಹಸುವನು

ಎರಡು ದಿವಸ ಕಳೆದ ಮೇಲೆ

ಅಪ್ಪ ಬಂದನು

ತನ್ನ ಜೊತೆಗೆ ಒಂದು ಹಸುವ

ಕರೆದು ತಂದನು

ಗೌರಿ ಎಂದು ಅಮ್ಮ ಅದಕೆ

ಹೆಸರು ಇಟ್ಟಳು

ರೊಟ್ಟಿ ಇಳುವಿ ದೃಷ್ಟಿ ತೆಗೆದು

ಲಟಿಕೆ ಮುರಿದಳು

ಸಂತೆಯಿಂದ ಅಪ್ಪ ಕೊಂಡು

ತಂದ ಗೌರಿಯು

ಅವಳ ನೋಡಲೆರಡು ಕಣ್ಣು

ನಮಗೆ ಸಾಲವು

ಎಷ್ಟು ಚಂದ ಗೌರಿ ಮಾಟ

ಬಹಳ ಸುಂದರ

ನಾಚಬೇಕು ಅವಳ ನೋಡಿ

ಬಾನ ಚಂದಿರ

ಕೆಲವು ದಿನವು ಕಳೆಯುತಿರಲು

ಗೌರಿ ಕೊಟ್ಟಳು

ತನ್ನ ಹಾಗೆ ಬಣ್ಣವಿರುವ

ಮುದ್ದು ಕರುವನು

ನುಣುಪು ಮೈಯ ಹೊಳಪು ಕಣ್ಣ

ಚೆಲುವ ಕರುವದು

ಅದನು ಕಂಡು ಮನೆಯ ಮಂದಿ

ಹಿಗ್ಗಿ ನಲಿದೆವು

ಗೌರಿ ತನ್ನ ಕರುವ ನೆಕ್ಕಿ

ಶುಚಿಯಗೊಳಿಸಲು

ಸ್ವಚ್ಛಗೊಂಡ ಕರುವಿಗಾಗ

ಹಿತವು ಎನಿಸಿತು

ತಾಯಿ ಹಾಲು ಕುಡಿಯುವಂತೆ

ಅಪ್ಪ ಕರುವಿಗೆ

ಕಲಿಸಿ ಕೊಡಲು ಕುಡಿಯುತಿತ್ತು

ಬೆಳಗು ಸಂಜೆಗೆ

ಉಳಿದ ಹಾಲು ಅಪ್ಪ ಹಿಂಡಿ

ಕೊಡಲು ಅಮ್ಮನು

ಮಾಡಿ ಕೊಡುತಲಿದ್ದಳೆಮಗೆ

ತಿನಲು ಗಿಣ್ಣನು

ಗೌರಿ ಕೊಡುವ ಎಳೆಯ ಹಾಲು

ಬೆಳ್ಳಗಾಗಲು

ಕರುವು ಕುಡಿದು ಬಿಟ್ಟಿದ್ದೆಲ್ಲ

ನಮಗೆ ಆದವು

ಪುಟ್ಟನಿಂದ ನಮ್ಮ ಮನೆಗೆ

ಗೌರಿ ಬಂದಳು

ಎಲ್ಲರುಂಡು ಉಳಿವ ಹಾಗೆ

ಹಾಲು ಕೊಟ್ಟಳು.