ಶಿಶುಗೀತೆ: ಬೆಕ್ಕಿನ ಮರಿ

ಸುರೇಶ ಕಂಬಳಿ

ಯಾವ ಊರಿಗೆ ಹೋಗಿರುವೆ

ಪುಟಾಣಿ ಬೆಕ್ಕಿನ ಮರಿ

ಕರೆದರು ಕೂಡ ಬರಲೇ ಇಲ್ಲ

ಹತ್ತು ಹಲವು ಬಾರಿ

ನಿನ್ನೆಯಿಂದ ಕೇಳ್ತಾ ಇಲ್ಲ

ನಿನ್ನ ಹೆಜ್ಜೆಯ ಸದ್ದು

ಹೇಳದೆ ಎಲ್ಲಿಗೆ ಹೋದೆ

ಅಷ್ಟು ಬೇಗನೆ ಎದ್ದು

ಹಾಲು ಸಕ್ಕರೆ ಬೆರೆಸಿಟ್ಟು

ಕಾದೆನು ಹಗಲೆಲ್ಲ

ನಿನ್ನ ನೋಡದ ನನಗೀಗ

ಯಾಕೊ ಏನೋ ಹಸಿವಿಲ್ಲ

ಅಪ್ಪಗೆ ಹೇಳಿ ತರಿಸಿರುವೆ

ನಿನಗೂ ಹೊಸ ಬಟ್ಟೆ

ಯಾರೋ ಏನೋ ಅಂದರೆಂದು

ನನ್ನನ್ಯಾಕೆ ಟೂ ಬಿಟ್ಟೆ

ನೀನು ಇಲ್ಲದ ಮನೆಯಂತೂ

ಬರೀ ಖಾಲಿ ಖಾಲಿ

ಇಬ್ಬರು ಕೂಡಿ ಆಡೋಣ

ನನ್ನಲ್ಲುಂಟು ಗೋಲಿ

ಮಲಗಲು ಹೋದರೆ ನಿದ್ದೆ ಇಲ್ಲ

ಜೊತೆಗಿರಬೇಕು ನೀನು

ಇಬ್ಬರೂ ಹಳ್ಳಕೆ ಹೋಗೋಣ

ಹಿಡಿದು ಕೊಡವೆನು ಮೀನು

ನನ್ನ ಪುಟಾಣಿ ಮೊಬೈಲಲಿ

ನಿನಗೂ ತೋರುವೆ ಗೇಮು

ಆಟವ ಆಡುತ ಹಸಿದರೆ

ಉಣಿಸುವೆ ನನ್ನ ಮಮ್ಮು.