ಶಿಶುಗೀತೆ: ಹಳ್ಳಿಯಲಿ ರಜೆಯ ಮಜ

ಪರಮೇಶ್‌ ಹೊಡೇನೂರು

ರಜೆಯ ಮಜವನು ಅನುಭವಿಸಲು

ಅಜ್ಜಿಯ ಊರಿಗೆ ಹೋಗಿದ್ದೆ

ಹಳ್ಳಿಯ ಹಳೆಯ ಗೆಳೆಯರ ಜೊತೆಗೆ

ಸುತ್ತಿದೆ ತೋಟ ಹೊಲ ಗದ್ದೆ

ಊರನು ಸುತ್ತುತ ನೀರಲಿ ಈಜುತ

ಸಂತಸದಿ ನಲಿಯುತಲಿದ್ದೆ

ಚಿನ್ನಿ ದಾಂಡು ಗೋಲಿ ಬುಗುರಿ

ಆಡುತ ಖುಷಿ ಅನುಭವಿಸಿದ್ದೆ

ಅಜ್ಜಿ ತಾತನ ಸಂಗಡ ಕುಳಿತು

ಉಣ್ಣುತಿದ್ದೆ ಬಿಸಿ ಬಿಸಿ ಮುದ್ದೆ

ಮಲಗುವ ಮುನ್ನ ಕತೆಯ ಕೇಳುತ

ಹೊಡೆಯುತಿದ್ದೆ ಕುಂಭಕರ್ಣ ನಿದ್ದೆ

ಗ್ರಾಮದೇವತೆಯ ಹಬ್ಬದ ಜಾತ್ರೆ

ನೋಡುತ ವಿಸ್ಮಯ ಪಡುತಿದ್ದೆ

ದೇವರ ಹೆಸರಲಿ ಪ್ರಾಣಿಗಳ ಬಲಿ

ಕೊಡುವುದ ಕಂಡು ಅಳುತಿದ್ದೆ

ಮೂಢನಂಬಿಕೆ ಕಂದಾಚಾರಗಳ

ಕಂಡು ಒಳಗೊಳಗೆ ನಗುತಿದ್ದೆ

ಗುರುಗಳು ತಿಳಿಸಿದ ವಿಜ್ಞಾನ ಸತ್ಯವ

ಗ್ರಾಮದ ಜನರಿಗೆ ತಿಳಿಸಿದ್ದೆ.