ಬಿ.ಆರ್ ನಾಡಗೌಡ
ನಮ್ಮ ಸಾಕುನಾಯಿ ಮುದ್ದು
ಟೋನಿ ಬಹಳ ತುಂಟನು
ಮನೆಯ ಮಂದಿಗೆಲ್ಲ ಇಷ್ಟ
ಪರಮ ಆಪ್ತ ಮಿತ್ರನು
ಹಾಲಿನಂತೆ ಹೊಳೆವ ಬಣ್ಣ
ಥಳಕು ಕಣ್ಣು ಕುಕ್ಕಿದೆ
ಅಂದವಾದ ಮೈಯ ಮಾಟ
ನೋಟ ಮೋಡಿ ಮಾಡಿದೆ
ಶಾಲೆಯಿಂದ ಮನೆಗೆ ಬರಲು
ಒಡನೆ ಓಡಿ ಬರುವುದು
ತುತ್ತು ಮಾಡಿ ಬಾಯಿಗಿಡಲು
ಮುತ್ತು ಕೊಡಲು ಜಿಗಿವುದು
ಸ್ವಾಮಿ ಬಂಟ ನಮ್ಮ ನೆಂಟ
ಟೋನಿ ಕದನ ಪ್ರಿಯನು
ಹಗಲು ಇರುಳು ಬಿಡದೆ ಸದಾ
ಮನೆಯ ಕಾಯುತಿರುವನು
ಏನು ಬೇಕು ಬೇಡವದಕೆ
ನಿತ್ಯ ಗಮನ ಹರಿಸುವೆ
ಜೀವಕ್ಕಿಂತ ಅಧಿಕ ಒಲವು
ತೋರಿ ಸಾಕು ಸಲಹುವೆ
ಉಂಡ ಮನೆಗೆ ಜೀವ ಸವೆಸಿ
ಬದುಕು ಇದರ ಕಾಯಕ
ಒಡೆಯನನ್ನು ನಂಬಿ ನಡೆವ
ಸ್ವಾಮಿ ನಿಷ್ಠ ಸೇವಕ.