ಸಾಹಸ ದೃಶ್ಯಗಳಲ್ಲಿ ಪಾಲ್ಗೊಂಡ ಕನಸೊಂದು ಬಿದ್ದ ತಕ್ಷ ಣ ಎಚ್ಚೆತ್ತ ನಾನು ಹಾಸಿಗೆಯಲ್ಲಿ ಸುರಕ್ಷಿತವಾಗಿದ್ದೇನೆಯೇ ಎಂದೊಮ್ಮೆ ನೋಡಿಕೊಂಡೆ. ನಾನು ಕನಸಿನಲ್ಲಿ ಅಷ್ಟೊಂದು ಭಯಾನಕವಾಗಿರಲು ಹೇಗೆ ಸಾಧ್ಯ? ಕನಸಿನಲ್ಲಿ ನನ್ನ ಮನಸ್ಸಿನ ಯೋಚನೆಗೆ ನನ್ನ ದೇಹ ಯಾಕೆ ಸ್ಪಂದಿಸಲಿಲ್ಲ?
ನಿದ್ದೆಯಲ್ಲಿ ಎರಡು ವಿಧಗಳಿವೆ. ಒಂದು ಸಾಮಾನ್ಯ ನಿದ್ದೆ ಮತ್ತೊಂದು ಕನಸಿನ ನಿದ್ರೆ. ಎರಡನೇ ರೀತಿಯ ನಿದ್ದೆಯನ್ನು ಹೆಚ್ಚಾಗಿ ಕನಸು ಎಂದೇ ಕರೆಯುತ್ತಾರೆ. ಸಾಮಾನ್ಯ ನಿದ್ದೆಯಲ್ಲಿ ನಿಮ್ಮ ಸ್ನಾಯುಗಳು ಯಾವುದೇ ಕ್ರಿಯೆ ಮಾಡಲು ಸಿದ್ಧವಾಗಿರುತ್ತವೆ. ನಿಮಗೆ ಅಹಿತವೆನಿಸಿದಾಗ ನೀವು ಚಲಿಸಬಹುದು, ನಿಮ್ಮ ಹೆಸರನ್ನು ಯಾರಾದರೂ ಕೂಗಿದರೆ ಎದ್ದೇಳಬಹುದು. ಈ ಸಾಮಾನ್ಯ ನಿದ್ದೆಯಲ್ಲಿಯೇ ಕನಸು ಎಂಬ ನಿದ್ರಾಲೋಕವೊಂದು ತೆರೆದುಕೊಳ್ಳುತ್ತದೆ.
ಈ ಹಂತದಲ್ಲಿ ನಿಮ್ಮ ಉಸಿರಾಟ ಮತ್ತು ಹೃದಯ ಬಡಿತ ಕೊಂಚ ವ್ಯತ್ಯಾಸಗೊಳ್ಳುತ್ತದೆ. ನೀವು ಚಲಿಸಲು ಯತ್ನಿಸುವ ಸ್ನಾಯುಗಳು ನಿಷ್ಕ್ರೀಯವಾಗಿರುತ್ತದೆ. ಈ ನಿಷ್ಕ್ರೀಯತೆಯ ಕಾರಣದಿಂದ ನೀವು ಕನಸಿನಲ್ಲಿ ಸ್ಪಂದಿಸುವ ದೃಶ್ಯಕ್ಕೆ ನಿಮ್ಮ ಸ್ನಾಯುಗಳು ಸ್ಪಂದಿಸುವುದಿಲ್ಲ. ಇದರಿಂದ ನೀವು ಯಾವುದೇ ರೀತಿಯಲ್ಲಿ ಗಾಯಗೊಳ್ಳುವುದಿಲ್ಲ. ಆದ್ದರಿಂದ ನಿಮಗೆ ಎಂಥ ಭಯಾನಕ ಕನಸು ಬಿದ್ದರೂ ನೀವು ಸುರಕ್ಷಿತವಾಗಿರುತ್ತೀರಿ. ಆ ಕನಸಿನಿಂದ ಹೊರಗೆ ಬರಲು ನೀವು ನಿದ್ದೆಯಿಂದ ಎದ್ದೇಳುತ್ತೀರಿ. ಮನುಷ್ಯನ ಸಾಮಾನ್ಯ ಸ್ಥಿತಿಯಲ್ಲಿ ಈ ಕನಸು ಎಂಬುದು 10 ರಿಂದ 15 ನಿಮಿಷಗಳವರೆಗೆ ಇರುತ್ತದೆ. ಇದಾದ ಬಳಿಕ ಆತನಿಗೆ ಸಾಮಾನ್ಯ ನಿದ್ರೆಯು ಆವರಿಸುತ್ತದೆ.