ಕೊಡವ ತಕ್ಕ್‌ರ ಆದಿಕವಿ ಹರದಾಸ ಅಪ್ಪನೆರವಂಡ ಅಪ್ಪಚ್ಚಕವಿ, ನಡಿಕೇರಿಯಂಡ ಚಿಣ್ಣಪ್ಪ, ಐಚೆಟ್ಟಿರ ಮುತ್ತಣ್ಣ ಕೂಡ್‌ನನಕೆ ಚೆನ್ನಂಗಾಳ್ ಕೊಡವ ತಕ್ಕ್‌ಲ್ ಎಳ್‌ದ್‌ನ ಎಳ್ತ್ ಬುಟ್ಟಕ ಕೊಡವ ತಕ್ಕ್‌ಲ್ ಸಾಹಿತ್ಯ ಬಂದಿತಿಂಜಿಲೆ. 1980 ಲ್ ಬ್ರಹ್ಮಗಿರಿ ಕೊಡವ ವಾರ ಪತ್ರಿಕೆ ಪುಟ್ಟ್‌ನಲ್ಲಿಂಜ ಚೆನ್ನಂಗ್ ಕೊಡವ ತಕ್ಕ್‌ಲ್ ಎಳ್ತ್‌ಕಾರ ಪುಟ್ಟ್‌ಚಿ.
ಬ್ರಹ್ಮಗಿರಿಲ್ ಎಳ್‌ದಿ ಯಂಡಿಂಜ ಎಳ್ತ್‌ಕಾರಳೆಲ್ಲ ಒಂದಾಯಿ ಕೂಟಿತ್ ಒರ್ ಕೂಟ ಕೆಟ್ಟೊಂಡೂಂದ್ ಪೊರ್‌ಟಾಂಡ ಫಲತ್ 1994 ಏಪ್ರಿಲ್ 30 ಂಗ್ ವಿರಾಜಪೇಟೆಲ್ ಚೆಂಬಾಂಡ ಶಿವಿ ಭೀಮಯ್ಯಂಡ ಮುಂದಾಳ್ತನತ್ ಕೊಡವ ತಕ್ಕ್ ಎಳ್ತ್‌ಕಾರಡ ಕೂಟ ರಚನೆ ಆಚಿ. ಮುದ್ದಿಯಡ ಕುಶ ಪೊನ್ನಪ್ಪ, ಐನಂಡ ಧನು, ಬೊಟ್ಟೋಳಂಡ ಮಿಟ್ಟು ಪೂಣಚ್ಚ, ಅಮ್ಮಣಿಚಂಡ ಪ್ರವೀಣ್ ಚಂಗಪ್ಪ, ಬೇಪಡಿಯಂಡ ಆನಂದ್, ಕಬ್ಬಚ್ಚಿರ ಮನು ಮಾಚಯ್ಯ, ಬಲ್ಯಮೀದೇರಿರ ಸುಬ್ರಮಣಿ ಕೂಡ್‌ನನಕೆ ಚೆನ್ನಂಗಾಳ್‌ರ ಸಹ ಕಾರತ್ ಕೂಟ ಉದ್‌ಚತ್. ಆದ್ಯತ್ ಚೆಂಬಾಂಡ ಶಿವಿ ಭೀಮಯ್ಯಂಡ ಅಧ್ಯಕ್ಷತೆಲ್ ಬಾಕಿ ಎಲ್ಲಾ ಸದಸ್ಯಂಗಳೂ ಕೂಡಿಯಂಡ್ ತಂಗಡ ಕೈಲ್‌ಂಜಿ ಪಣ ಇಟ್ಟಿತ್ ತಂಗಳೇ ಎಳ್‌ದ್‌ನ ಕವನ ಪುಸ್ತಕ ಬೊಳಿಪಡ್‌ತಿತ್, ತಂಗಳೇ ಮಾರಿತ್ ಕೊಡವ ಸಾಹಿತ್ಯ ಪ್ರಚಾರಕ್ ಮೊಳಿ ಇಟ್ಟತ್. ಅಂದ್‌ಂಜ ಶುರು ಆನ ಕೊಡವ ತಕ್ಕ್ ಎಳ್ತ್‌ಕಾರಡ ಕೂಟತ್‌ರ ಕೊಡವ ಭಾಷೆ, ಸಾಹಿತ್ಯ, ಕಲೆ, ಸಂಸ್ಕೃತಿ ಉಳಿಕೆ ಬೊಳಚೆರ ಸೇವೆ ಇಂದೆಕೆತ್ತನೆಕೂ ನಡ್‌ಂದಂಡುಂಡ್.
ಸಂಸ್ಥೆರ ಪೆದತೇ ಉಳ್ಳನಕೆ ಇದ್ ಕೊಡವ ತಕ್ಕ್‌ಲ್ ಎಳ್‌ದುವಯಿಂಡ ಒರ್ ಕೂಟ. ಆಚೆಂಗಿ ಕೂಟ ಕೊಡವ ತಕ್ಕ್‌ಲ್ ಎಳ್ದಿತ್ ಅಭ್ಯಾಸ ಉಳ್ಳಯಿಂಡದೇ ಎಳ್ತ್‌ನ ಮಾತ್ರ ಬೊಳಿಪಡ್‌ತುವ ಅಲ್ಲ. ಕೊಡವ ತಕ್ಕ್ ಲ್ ಎಳ್ದ್‌ವಕ್ ಇರಾದೆ ಉಳ್ಳಯಿಂಗಕ್ ಸಾಹಿತ್ಯ ಶಿಬಿರ, ನಾಟಕ ಶಿಬಿರತ್‌ರಂತ ಪಡಿಪುಕ್ ಬೋಂಡಿ ಯಾನ ಏರ್ಪಾಡ್‌ನೋ ಮಾಡಿತ್. ಕೊಡವ ಸಾಹಿತ್ಯತ್ ಕಥೆ, ಕವನ, ಚುಟುಕ, ಕಾದಂಬರಿ ಕೂಡ್‌ನನಕೆ ಬೋರೆ ಬೋರೆ ಸಾಹಿತ್ಯತ್‌ನ ಎಳ್ದುವಕ್ ಪಡ್‌ಪ್‌ಚಿಟ್ಟಿತ್. ಅಯಿಂಡ ಕೈಲ್ ಎಳ್ದ್‌ಚಿಟ್ಟಿತ್ ಕೂಟವೇ ಮಿಂಞಕ್ ನಿಂದಿತ್, ಪಣ ದಾನಿಯಡ ಸಹಕಾರತ್ ಪುಸ್ತಕ ಬೊಳಿಪಡ್‌ತಿತ್ ಎಳ್ತ್‌ಕಾರಕ್ ಪುರ್‌ಡ್ ಪಿಂಞ ಒತ್ತಾಸೆ ಕೊಡ್‌ಪ. ಸರಕಾರತ್‌ಂಜ ಒರ್ ಉರ್‌ಪಿಯತ್‌ರ ಸಹಾಯ ಪಣ ಇಲ್ಲತೆ ಬೊರೀ ದಾನಿಯಳೇ ನಂಬಿಯಂಡ್ ತಿಂಗಕೋರಂದ್ ಕಾರ್ಯ ಕ್ರಮ ಮಾಡಿತ್ ಪುಸ್ತಕ ಬೊಳಿ ಪಡ್‌ತಿಯಂಡುಳ್ಳ ಸ್ವಯಂ ಸೇವಾ ಸಂಸ್ಥೆ ಈ ಕೊಡವ ತಕ್ಕ್ ಎಳ್ತ್‌ಕಾರಡ ಕೂಟ.
1994 ಲಿಂಜ ಕೂಟ ಕೊಡಗ್‌ರ ಉದ್ದಗಲತೂ, ಪೊರಜಿಲ್ಲೆರ ಮಂಗಳೂರ್, ಸಕಲೇಶಪುರ, ಮೈಸೂರ್, ಹುಣಸೂರ್, ಬೆಂಗಳೂರ್‌ರಂತ ಬೋರೆ ಬೋರೆ ಜಾಗತೂ, ಪೊರ ರಾಜ್ಯತ್‌ರ ಕಾಸರಗೋಡ್, ಗೋವಾ, ಡೆಲ್ಲಿರಂತ ಸುಮಾರ್ ಜಾಗತೂ ಕೊಡವ ತಕ್ಕ್‌ರ ಪಾಟ್‌ಗೋಷ್ಠಿ, ತಮಾಶಿಗೋಷ್ಠಿ, ಕವಿಗೋಷ್ಠಿ, ನಾಟಕ, ಸಾಹಿತ್ಯ ಶಿಬಿರ, ಜಾನಪದ ಆಟ್, ಪುಸ್ತಕ ಬೊಳಿಪಡ್‌ತುವದೂ ಕೂಡ್‌ನನಕೆ ಪಲತರ ಕಾರ್ಯ ಕ್ರಮತ್‌ನ ನಡ್‌ತಿಯಂಡ್ ಬಂದಿತ್. 1999 ಲ್ ಮರಣಪಟ್ಟ ಕೂಟತ್‌ರ ಸಲಹೆಗಾರನೂ ಕೊಡವ ತಕ್ಕ್ ರ ಎಳ್ತ್‌ಕಾರ, ನಾಟಕಕಾರ, ಪಾಟ್‌ಕಾರ, ನಿರೂಪಣೆ ಕಾರನೂ ಆನ ಮುಲ್ಲೇರ ಜಿಮ್ಮಿ ಅಯ್ಯಪ್ಪಂಡ ಗೇನತ್ ಇಡೀ ಒರ್ ಕಾಲ ತಿಂಗೋದಿ ಬೋರೆ ಬೋರೆ ಊರ್‌ಲ್ ಪಲತರ ಸಾಹಿತ್ಯ, ಕಲೆರ ಕಾರ್ಯಕ್ರಮ ನಡ್‌ತಿತ್. ರಾಜ್ಯ ಮಟ್ಟತ್‌ರ ಕೊಡವ ಮೇಳ ಮಾಡ್‌ನದಲ್ಲತೆ, ವಿರಾಜಪೇಟೆ ಕೊಡವ ಸಮಾಜತ್‌ರ ಪಕ್ಕ ಉಳ್ಳ ಜಿಮ್ಮಿ ಕಲಾ ವೇದಿಕೆ ಕೆಟ್ಟೊಕ್ ಮೊಳಿ ಆಚಿ.
ಮೇಳ ಕೈಂಜನಕೆ ತಿಂಗೋದಿ ಓರೋರ್ ಊರ್‌ಲ್, ಓರೋರ್ ಪುದಿಯ ಎಳ್ತ್‌ಕಾರಡ ಪುದಿಯ ಪುಸ್ತಕ ಬೊಳಿ ಪಡ್‌ತುವದಲ್ಲತೆ ಪಲತರ ಸಾಂಸ್ಕೃತಿಕ ಪೈಪೋಟಿ ಪಿಂಞ ಪ್ರದರ್ಶನ ಬೆಚ್ಚಿತ್ ಇನಾಂ ಕೊಡ್‌ತಿತ್ ಎಳ್ತ್‌ಕಾರಕೂ, ಕಲಾವಿದಂಗಕೂ ಪುರ್‌ಡ್ ಬಪ್ಪನಕೆ ಮಾಡ್‌ಚಿ. ಈ ಕಾರ್ಯಕ್ರಮ ಇಂದೆಕೂ ದಾನಿಯಡ ಸಹಕಾರತ್ ಊರೂರ್‌ಲ್ ನಡ್‌ಂದಂಡುಂಡ್.
1994 ಲ್ ಕರ್ನಾಟಕ ಸರಕಾರ ಕೊಡವ ಸಾಹಿತ್ಯ ಅಕಾಡೆಮಿ ಬೋಂಡಂದ್ ಬಯ್ಯಕೆಡ್‌ತವಕ್ ಪೊರ್‌ಡುವಕ ಬೋರೆ ಬೋರೆ ಸಂಘ, ಸಂಸ್ಥೆ, ಕೊಡವಾಭಿ ಮಾನಿಯಡ ಸಹಕಾರತ್ ಮಡಿಕೇರಿಲ್ ಮೆರವಣಿಗೆ, ಪ್ರತಿಭಟನೆ ಮಾಡಿತ್. ಇಂದಾಕಣೆ ಅಕಾಡೆಮಿಕ್ ಆಯ್ಕೆ ಆನ ಮೂಂದ್ ಅಧ್ಯಕ್ಷಂಗ ಪಿಂಞ ಇರ್‌ವದಾಂಗೂ ಅದಿಯಾನ ಸದಸ್ಯಂಗ ಕೊಡವ ತಕ್ಕ್ ಎಳ್ತ್ ಕಾರಡ ಕೂಟತ್‌ರ ಸದಸ್ಯಂಗಳೇ ಎಣ್ಣುವದ್ ವಿಶೇಷ. ಸಂಗೀತಗೋಷ್ಠಿ, ಪಾಟ್‌ಗೋಷ್ಠಿ, ತಮಾಶಿಗೋಷ್ಠಿ, ನತ್ಯ, ಜಾನಪದ ಆಟ್, ನಾಟಕ, ಸಾಹಿತ್ಯ ಶಿಬಿರ, ಪಾಟ್ ಶಿಬಿರ, ಜಾನಪದ ಆಟ್-ಪಾಟ್ ಶಿಬಿರ ಕೂಡ್‌ನನಕೆ ಇರ್‌ನೂರಾಂಗೂ ಅದಿಯಾನ ಕಾರ್ಯ ಕ್ರಮ ಮಾಡ್‌ನದಲ್ಲತೆ, ಮಡಿಕೇರಿ ಆಕಾಶವಾಣಿಲ್ ಪಿಂಞ ಬೆಂಗಳೂರ್ ದೂರದರ್ಶನತ್ ಪಲತರ ಕಾರ್ಯಕ್ರಮ ಕೊಡ್‌ತಿತ್ ಪ್ರಸಾರ ಆಯಿತ್. ಜಿಲ್ಲೆ, ಪೊರಜಿಲ್ಲೆ, ಪೊರರಾಜ್ಯ ಕೂಡ್‌ನನಕೆ ಬೋರೆ ಬೋರೆ ಜಾಗತ್ ಇರ್‌ನೂರಾಂಗೂ ಅದಿಯಾನ ನಾಟಕ ಪ್ರದರ್ಶನ ಮಾಡಿತ್. ಈಂಡ ಕೂಟ್‌ಕ್ ಇಕ್ಕಾಕಣೆ ಕೂಟತ್‌ರ ಆದನೆಲ್ ಮೂಂದ್ ಕೊಡವ ಪಾಟ್‌ರ್ ಸಿ.ಡಿ ಬೊಳಿ ಪಡ್‌ತಿತ್. ಒರ್ ವೆಬ್ಸೈಟ್ ತೊರ್‌ಪಕ್ ಏರ್ಪಾಡಾಯಿತ್. ಕೊಡವ ತಕ್ಕ್‌ರ ಅರ್ಥಕೋಶ ಮಾಡೊಕ್ ಯೋಜನೆ ರೂಪ್‌ಚಿಟ್ಟತ್. ಇದ್‌ಂಡ ಆದ್ಯತ ಮೊಟ್ಟಾಯಿತ್ ಮಂಡೇಪಂಡ ಡಬ್ಲ್ಯೂ ಕಾಳಪ್ಪ ಅಯಿಂಗ ದಾನ ತಂದ ಒರ್ ಲಕ್ಷ ಉರ್‌ಪಿಯ ಪಣತ್ ಶಬ್ದಕೋಶಕ್ ಸಮ್ಮಂಧಪಟ್ಟ ಕಾರ್ಬಾರ್ ಆಯಂಡುಂಡ್. ಇಚ್ಚಕೆಲ್ಲಾಂಡ ಕೂಟ್‌ಕ್ ಕೂಟ ತಂಗಡ ತಿಂಗೋದಿ ಕಾರ್ಯಕ್ರಮ ನಡ್‌ಪಕ ಪೆರಿಯ ಎಳ್ತ್‌ಕಾರ, ಜಾನಪದ ತಜ್ಞಂಗ ಕೂಡ್‌ನನಕೆ ಕೊಡವ ಭಾಷೆ, ಸಾಹಿತ್ಯ, ಕಲೆ, ಸಾಂಸ್ಕೃತಿಕ ಸೇವೆ ಸಾಧನೆ ಮಾಡ್‌ನಯಿಂಗಳ ಸನ್ಮಾನ ಮಾಡುವದೂ, ಮರಣಪಟ್ಟ, ಕೇಳಿಪಟ್ಟ ಎಳ್ತ್‌ಕಾರಡ ಪೆದತ್ ದತ್ತಿನಿಧಿ ಸ್ಥಾಪನೆ ಮಾಡಿತ್ ಅಯಿಂಡ ಪೆದತ್ ಸಾಹಿತ್ಯ ಪೈಪೋಟಿ ಮಾಡಿತ್ ಇನಾಂ ಕೊಡ್‌ಪ.
1994 ಂಜ ಇಪ್ಪರಕ್ ಅಧ್ಯಕ್ಷಂಗಳಾಯಿತ್ ಚೆಂಬಾಂಡ ಶಿವಿ ಭೀಮಯ್ಯ, ಉಳ್ಳಿಯಡ ಎಂ. ಪೂವಯ್ಯ, ಮುದ್ದಿ ಯಡ ಕುಶ ಪೊನ್ನಪ್ಪ, ಚೆಟ್ಟಂಗಡ ರವಿ ಸುಬ್ಬಯ್ಯ, ಅಮ್ಮಣಿಚಂಡ ಪ್ರವೀಣ್ ಚಂಗಪ್ಪ ಅಧ್ಯಕ್ಷಂಗಳಾಯಿತ್ ಕಾರ್ಬಾರ್ ಮಾಡಿಯಂಡ್ ಬಂದಿತ್. ಇಕ್ಕ ಬೊಟ್ಟೋಳಂಡ ಮಿಟ್ಟು ಪೂಣಚ್ಚ ಅಧ್ಯಕ್ಷಂಗಳಾಯಿತ್ ಕಾರ್ಬಾರ್ ಮಾಡಿಯ ಂಡುಂಡ್.
ಇಕ್ಕಾಕಣೆ 139 ಕೊಡವ ತಕ್ಕ್‌ರ ಸಾಹಿತ್ಯ ಪುಸ್ತಕ ಈ ಯೋಜನೆಲ್ ಬೊಳಿ ಕಂಡಿತ್. ಈ ತಿಂಗತ್ 140 ನೇ ಮೊಟ್ಟ್‌ರ ಪುದಿಯ ಪುಸ್ತಕ ಬೊಳಿ ಪಡ್‌ತುವದಲ್ಲತೆ ಪಲತರ ಸಾಂಸ್ಕೃತಿಕ ಪೈಪೋಟಿ ಪಿಂಞ ಪ್ರದರ್ಶನವೂ ನಡ್‌ಪ. ಕೂಟತ್‌ರ ಜನಪ್ರಿಯ ಕೊಡವ ಸಾಹಿತ್ಯ ಮಾಲೆ ಯೋಜನೆಲ್ ಕೊಡವ ತಕ್ಕ್‌ಲ್ ಚುಟುಕ, ಕವನ, ಕಥೆ, ಕಾದಂಬರಿ, ನಾಟಕ, ಒಡೆಪಗಾದೆ, ತಮಾಶಿ, ಐಲಾಟ, ತೀನಿ, ಕೊಡವ ತಕ್ಕ್‌ಲ್ ಕಾಗದ ಎಳ್‌ದುವಾಂಗ್ ಸಮ್ಮಂಧಪಟ್ಟ ಎಳ್ತ್‌ಕುತ್ತ್, ನಾಡ್‌ಮದ್ದ್, ಆರೋಗ್ಯ ಭಾಗ್ಯ, ಯೋಗಾಸನ, ದೇವನೆಲೆ, ಬುದ್ದಿತಕ್ಕ್, ಮಕ್ಕಡ ಕಥೆ, ಬದ್‌ಕ್‌ಕ್ ಬಟ್ಟೆ ಕಾಟುವ ಸೂತ್ರ, ಕಾಫಿ ಬೊಳೆಕ್ ಸಮ್ಮಂದಪಟ್ಟ ಪುಸ್ತಕ, ಪಾಟ್, ಪದ್ದತಿ, ಜಾನಪದ ಪಾಟ್, ಪಳೆಯ ಪಾಟ್, ಕಾರ್ಡ್‌ರ ಕಥೆ, ಪಳ್‌ಂಜೊಲ್ಲ್, ತರ್ಜುಮೆ ಸಾಹಿತ್ಯ, ಮರಣಪಟ್ಟ ಎಳ್ತ್‌ಕಾರ ಎಳ್ದ್ ನ ಎಳ್ತ್‌ನ ಪುಸ್ತಕ ಮಾಡಿತ್ ಬೊಳಿ ಪಡ್‌ತುವದೂ ಕೂಡ್‌ನನಕೆ ಬೋರೆ ಏದ್ ಭಾಷೆಲೂ ಬರತಂತ ಎಲ್ಲಾ ತರತ್‌ರ ಸಾಹಿತ್ಯತ್‌ನ ಪುಸ್ತಕ ಮಾಡಿತ್ ಬೊಳಿ ಪಡ್‌ತಿತ್. ಇಂಞೂ ತಿಂಗೋದಿ ಪುಸ್ತಕ ಬೊಳಿಪಡ್‌ತುವ ಯೋಜನೆ ಇಟ್ಟಂಡಿತ್. ಪುಸ್ತಕ ಪ್ರಕಟಣೆ, ಕಾರ್ಯಕ್ರಮ ಸಂಘಟನೆ, ಪ್ರಚಾರ, ಪೈಪೋಟಿ - ಪ್ರದರ್ಶನತ್‌ರ ಇನಾಂ ಕೂಡ್‌ನನಕೆ 50 ಆಯಿರ ಉರ್‌ಪಿಯತ್‌ರಚ್ಚಕ್ ಪಣತ್‌ನ ದಾನಿಯಡ ಸಹಕಾರತೇ ಪಡ್‌ಂದಂಡ್ ಎಡೆಬುಡತೆ ತಿಂಗೋದಿ ಕಾರ್ಯಕ್ರಮ ಮಾಡಿಯಂಡ್ ಬಂದಂಡುಳ್ಳದ್ ಕೂಟತ್‌ರ ಪೆರ್ತ್ ಬಲ್ಯ ಸಾಧನೆ.
ಚೆಟ್ಟಂಗಡ ರವಿ ಸುಬ್ಬಯ್ಯ
ಬ್ರಹ್ಮಗಿರಿಲ್ ಎಳ್‌ದಿ ಯಂಡಿಂಜ ಎಳ್ತ್‌ಕಾರಳೆಲ್ಲ ಒಂದಾಯಿ ಕೂಟಿತ್ ಒರ್ ಕೂಟ ಕೆಟ್ಟೊಂಡೂಂದ್ ಪೊರ್‌ಟಾಂಡ ಫಲತ್ 1994 ಏಪ್ರಿಲ್ 30 ಂಗ್ ವಿರಾಜಪೇಟೆಲ್ ಚೆಂಬಾಂಡ ಶಿವಿ ಭೀಮಯ್ಯಂಡ ಮುಂದಾಳ್ತನತ್ ಕೊಡವ ತಕ್ಕ್ ಎಳ್ತ್‌ಕಾರಡ ಕೂಟ ರಚನೆ ಆಚಿ. ಮುದ್ದಿಯಡ ಕುಶ ಪೊನ್ನಪ್ಪ, ಐನಂಡ ಧನು, ಬೊಟ್ಟೋಳಂಡ ಮಿಟ್ಟು ಪೂಣಚ್ಚ, ಅಮ್ಮಣಿಚಂಡ ಪ್ರವೀಣ್ ಚಂಗಪ್ಪ, ಬೇಪಡಿಯಂಡ ಆನಂದ್, ಕಬ್ಬಚ್ಚಿರ ಮನು ಮಾಚಯ್ಯ, ಬಲ್ಯಮೀದೇರಿರ ಸುಬ್ರಮಣಿ ಕೂಡ್‌ನನಕೆ ಚೆನ್ನಂಗಾಳ್‌ರ ಸಹ ಕಾರತ್ ಕೂಟ ಉದ್‌ಚತ್. ಆದ್ಯತ್ ಚೆಂಬಾಂಡ ಶಿವಿ ಭೀಮಯ್ಯಂಡ ಅಧ್ಯಕ್ಷತೆಲ್ ಬಾಕಿ ಎಲ್ಲಾ ಸದಸ್ಯಂಗಳೂ ಕೂಡಿಯಂಡ್ ತಂಗಡ ಕೈಲ್‌ಂಜಿ ಪಣ ಇಟ್ಟಿತ್ ತಂಗಳೇ ಎಳ್‌ದ್‌ನ ಕವನ ಪುಸ್ತಕ ಬೊಳಿಪಡ್‌ತಿತ್, ತಂಗಳೇ ಮಾರಿತ್ ಕೊಡವ ಸಾಹಿತ್ಯ ಪ್ರಚಾರಕ್ ಮೊಳಿ ಇಟ್ಟತ್. ಅಂದ್‌ಂಜ ಶುರು ಆನ ಕೊಡವ ತಕ್ಕ್ ಎಳ್ತ್‌ಕಾರಡ ಕೂಟತ್‌ರ ಕೊಡವ ಭಾಷೆ, ಸಾಹಿತ್ಯ, ಕಲೆ, ಸಂಸ್ಕೃತಿ ಉಳಿಕೆ ಬೊಳಚೆರ ಸೇವೆ ಇಂದೆಕೆತ್ತನೆಕೂ ನಡ್‌ಂದಂಡುಂಡ್.
ಸಂಸ್ಥೆರ ಪೆದತೇ ಉಳ್ಳನಕೆ ಇದ್ ಕೊಡವ ತಕ್ಕ್‌ಲ್ ಎಳ್‌ದುವಯಿಂಡ ಒರ್ ಕೂಟ. ಆಚೆಂಗಿ ಕೂಟ ಕೊಡವ ತಕ್ಕ್‌ಲ್ ಎಳ್ದಿತ್ ಅಭ್ಯಾಸ ಉಳ್ಳಯಿಂಡದೇ ಎಳ್ತ್‌ನ ಮಾತ್ರ ಬೊಳಿಪಡ್‌ತುವ ಅಲ್ಲ. ಕೊಡವ ತಕ್ಕ್ ಲ್ ಎಳ್ದ್‌ವಕ್ ಇರಾದೆ ಉಳ್ಳಯಿಂಗಕ್ ಸಾಹಿತ್ಯ ಶಿಬಿರ, ನಾಟಕ ಶಿಬಿರತ್‌ರಂತ ಪಡಿಪುಕ್ ಬೋಂಡಿ ಯಾನ ಏರ್ಪಾಡ್‌ನೋ ಮಾಡಿತ್. ಕೊಡವ ಸಾಹಿತ್ಯತ್ ಕಥೆ, ಕವನ, ಚುಟುಕ, ಕಾದಂಬರಿ ಕೂಡ್‌ನನಕೆ ಬೋರೆ ಬೋರೆ ಸಾಹಿತ್ಯತ್‌ನ ಎಳ್ದುವಕ್ ಪಡ್‌ಪ್‌ಚಿಟ್ಟಿತ್. ಅಯಿಂಡ ಕೈಲ್ ಎಳ್ದ್‌ಚಿಟ್ಟಿತ್ ಕೂಟವೇ ಮಿಂಞಕ್ ನಿಂದಿತ್, ಪಣ ದಾನಿಯಡ ಸಹಕಾರತ್ ಪುಸ್ತಕ ಬೊಳಿಪಡ್‌ತಿತ್ ಎಳ್ತ್‌ಕಾರಕ್ ಪುರ್‌ಡ್ ಪಿಂಞ ಒತ್ತಾಸೆ ಕೊಡ್‌ಪ. ಸರಕಾರತ್‌ಂಜ ಒರ್ ಉರ್‌ಪಿಯತ್‌ರ ಸಹಾಯ ಪಣ ಇಲ್ಲತೆ ಬೊರೀ ದಾನಿಯಳೇ ನಂಬಿಯಂಡ್ ತಿಂಗಕೋರಂದ್ ಕಾರ್ಯ ಕ್ರಮ ಮಾಡಿತ್ ಪುಸ್ತಕ ಬೊಳಿ ಪಡ್‌ತಿಯಂಡುಳ್ಳ ಸ್ವಯಂ ಸೇವಾ ಸಂಸ್ಥೆ ಈ ಕೊಡವ ತಕ್ಕ್ ಎಳ್ತ್‌ಕಾರಡ ಕೂಟ.
1994 ಲಿಂಜ ಕೂಟ ಕೊಡಗ್‌ರ ಉದ್ದಗಲತೂ, ಪೊರಜಿಲ್ಲೆರ ಮಂಗಳೂರ್, ಸಕಲೇಶಪುರ, ಮೈಸೂರ್, ಹುಣಸೂರ್, ಬೆಂಗಳೂರ್‌ರಂತ ಬೋರೆ ಬೋರೆ ಜಾಗತೂ, ಪೊರ ರಾಜ್ಯತ್‌ರ ಕಾಸರಗೋಡ್, ಗೋವಾ, ಡೆಲ್ಲಿರಂತ ಸುಮಾರ್ ಜಾಗತೂ ಕೊಡವ ತಕ್ಕ್‌ರ ಪಾಟ್‌ಗೋಷ್ಠಿ, ತಮಾಶಿಗೋಷ್ಠಿ, ಕವಿಗೋಷ್ಠಿ, ನಾಟಕ, ಸಾಹಿತ್ಯ ಶಿಬಿರ, ಜಾನಪದ ಆಟ್, ಪುಸ್ತಕ ಬೊಳಿಪಡ್‌ತುವದೂ ಕೂಡ್‌ನನಕೆ ಪಲತರ ಕಾರ್ಯ ಕ್ರಮತ್‌ನ ನಡ್‌ತಿಯಂಡ್ ಬಂದಿತ್. 1999 ಲ್ ಮರಣಪಟ್ಟ ಕೂಟತ್‌ರ ಸಲಹೆಗಾರನೂ ಕೊಡವ ತಕ್ಕ್ ರ ಎಳ್ತ್‌ಕಾರ, ನಾಟಕಕಾರ, ಪಾಟ್‌ಕಾರ, ನಿರೂಪಣೆ ಕಾರನೂ ಆನ ಮುಲ್ಲೇರ ಜಿಮ್ಮಿ ಅಯ್ಯಪ್ಪಂಡ ಗೇನತ್ ಇಡೀ ಒರ್ ಕಾಲ ತಿಂಗೋದಿ ಬೋರೆ ಬೋರೆ ಊರ್‌ಲ್ ಪಲತರ ಸಾಹಿತ್ಯ, ಕಲೆರ ಕಾರ್ಯಕ್ರಮ ನಡ್‌ತಿತ್. ರಾಜ್ಯ ಮಟ್ಟತ್‌ರ ಕೊಡವ ಮೇಳ ಮಾಡ್‌ನದಲ್ಲತೆ, ವಿರಾಜಪೇಟೆ ಕೊಡವ ಸಮಾಜತ್‌ರ ಪಕ್ಕ ಉಳ್ಳ ಜಿಮ್ಮಿ ಕಲಾ ವೇದಿಕೆ ಕೆಟ್ಟೊಕ್ ಮೊಳಿ ಆಚಿ.
ಮೇಳ ಕೈಂಜನಕೆ ತಿಂಗೋದಿ ಓರೋರ್ ಊರ್‌ಲ್, ಓರೋರ್ ಪುದಿಯ ಎಳ್ತ್‌ಕಾರಡ ಪುದಿಯ ಪುಸ್ತಕ ಬೊಳಿ ಪಡ್‌ತುವದಲ್ಲತೆ ಪಲತರ ಸಾಂಸ್ಕೃತಿಕ ಪೈಪೋಟಿ ಪಿಂಞ ಪ್ರದರ್ಶನ ಬೆಚ್ಚಿತ್ ಇನಾಂ ಕೊಡ್‌ತಿತ್ ಎಳ್ತ್‌ಕಾರಕೂ, ಕಲಾವಿದಂಗಕೂ ಪುರ್‌ಡ್ ಬಪ್ಪನಕೆ ಮಾಡ್‌ಚಿ. ಈ ಕಾರ್ಯಕ್ರಮ ಇಂದೆಕೂ ದಾನಿಯಡ ಸಹಕಾರತ್ ಊರೂರ್‌ಲ್ ನಡ್‌ಂದಂಡುಂಡ್.
1994 ಲ್ ಕರ್ನಾಟಕ ಸರಕಾರ ಕೊಡವ ಸಾಹಿತ್ಯ ಅಕಾಡೆಮಿ ಬೋಂಡಂದ್ ಬಯ್ಯಕೆಡ್‌ತವಕ್ ಪೊರ್‌ಡುವಕ ಬೋರೆ ಬೋರೆ ಸಂಘ, ಸಂಸ್ಥೆ, ಕೊಡವಾಭಿ ಮಾನಿಯಡ ಸಹಕಾರತ್ ಮಡಿಕೇರಿಲ್ ಮೆರವಣಿಗೆ, ಪ್ರತಿಭಟನೆ ಮಾಡಿತ್. ಇಂದಾಕಣೆ ಅಕಾಡೆಮಿಕ್ ಆಯ್ಕೆ ಆನ ಮೂಂದ್ ಅಧ್ಯಕ್ಷಂಗ ಪಿಂಞ ಇರ್‌ವದಾಂಗೂ ಅದಿಯಾನ ಸದಸ್ಯಂಗ ಕೊಡವ ತಕ್ಕ್ ಎಳ್ತ್ ಕಾರಡ ಕೂಟತ್‌ರ ಸದಸ್ಯಂಗಳೇ ಎಣ್ಣುವದ್ ವಿಶೇಷ. ಸಂಗೀತಗೋಷ್ಠಿ, ಪಾಟ್‌ಗೋಷ್ಠಿ, ತಮಾಶಿಗೋಷ್ಠಿ, ನತ್ಯ, ಜಾನಪದ ಆಟ್, ನಾಟಕ, ಸಾಹಿತ್ಯ ಶಿಬಿರ, ಪಾಟ್ ಶಿಬಿರ, ಜಾನಪದ ಆಟ್-ಪಾಟ್ ಶಿಬಿರ ಕೂಡ್‌ನನಕೆ ಇರ್‌ನೂರಾಂಗೂ ಅದಿಯಾನ ಕಾರ್ಯ ಕ್ರಮ ಮಾಡ್‌ನದಲ್ಲತೆ, ಮಡಿಕೇರಿ ಆಕಾಶವಾಣಿಲ್ ಪಿಂಞ ಬೆಂಗಳೂರ್ ದೂರದರ್ಶನತ್ ಪಲತರ ಕಾರ್ಯಕ್ರಮ ಕೊಡ್‌ತಿತ್ ಪ್ರಸಾರ ಆಯಿತ್. ಜಿಲ್ಲೆ, ಪೊರಜಿಲ್ಲೆ, ಪೊರರಾಜ್ಯ ಕೂಡ್‌ನನಕೆ ಬೋರೆ ಬೋರೆ ಜಾಗತ್ ಇರ್‌ನೂರಾಂಗೂ ಅದಿಯಾನ ನಾಟಕ ಪ್ರದರ್ಶನ ಮಾಡಿತ್. ಈಂಡ ಕೂಟ್‌ಕ್ ಇಕ್ಕಾಕಣೆ ಕೂಟತ್‌ರ ಆದನೆಲ್ ಮೂಂದ್ ಕೊಡವ ಪಾಟ್‌ರ್ ಸಿ.ಡಿ ಬೊಳಿ ಪಡ್‌ತಿತ್. ಒರ್ ವೆಬ್ಸೈಟ್ ತೊರ್‌ಪಕ್ ಏರ್ಪಾಡಾಯಿತ್. ಕೊಡವ ತಕ್ಕ್‌ರ ಅರ್ಥಕೋಶ ಮಾಡೊಕ್ ಯೋಜನೆ ರೂಪ್‌ಚಿಟ್ಟತ್. ಇದ್‌ಂಡ ಆದ್ಯತ ಮೊಟ್ಟಾಯಿತ್ ಮಂಡೇಪಂಡ ಡಬ್ಲ್ಯೂ ಕಾಳಪ್ಪ ಅಯಿಂಗ ದಾನ ತಂದ ಒರ್ ಲಕ್ಷ ಉರ್‌ಪಿಯ ಪಣತ್ ಶಬ್ದಕೋಶಕ್ ಸಮ್ಮಂಧಪಟ್ಟ ಕಾರ್ಬಾರ್ ಆಯಂಡುಂಡ್. ಇಚ್ಚಕೆಲ್ಲಾಂಡ ಕೂಟ್‌ಕ್ ಕೂಟ ತಂಗಡ ತಿಂಗೋದಿ ಕಾರ್ಯಕ್ರಮ ನಡ್‌ಪಕ ಪೆರಿಯ ಎಳ್ತ್‌ಕಾರ, ಜಾನಪದ ತಜ್ಞಂಗ ಕೂಡ್‌ನನಕೆ ಕೊಡವ ಭಾಷೆ, ಸಾಹಿತ್ಯ, ಕಲೆ, ಸಾಂಸ್ಕೃತಿಕ ಸೇವೆ ಸಾಧನೆ ಮಾಡ್‌ನಯಿಂಗಳ ಸನ್ಮಾನ ಮಾಡುವದೂ, ಮರಣಪಟ್ಟ, ಕೇಳಿಪಟ್ಟ ಎಳ್ತ್‌ಕಾರಡ ಪೆದತ್ ದತ್ತಿನಿಧಿ ಸ್ಥಾಪನೆ ಮಾಡಿತ್ ಅಯಿಂಡ ಪೆದತ್ ಸಾಹಿತ್ಯ ಪೈಪೋಟಿ ಮಾಡಿತ್ ಇನಾಂ ಕೊಡ್‌ಪ.
1994 ಂಜ ಇಪ್ಪರಕ್ ಅಧ್ಯಕ್ಷಂಗಳಾಯಿತ್ ಚೆಂಬಾಂಡ ಶಿವಿ ಭೀಮಯ್ಯ, ಉಳ್ಳಿಯಡ ಎಂ. ಪೂವಯ್ಯ, ಮುದ್ದಿ ಯಡ ಕುಶ ಪೊನ್ನಪ್ಪ, ಚೆಟ್ಟಂಗಡ ರವಿ ಸುಬ್ಬಯ್ಯ, ಅಮ್ಮಣಿಚಂಡ ಪ್ರವೀಣ್ ಚಂಗಪ್ಪ ಅಧ್ಯಕ್ಷಂಗಳಾಯಿತ್ ಕಾರ್ಬಾರ್ ಮಾಡಿಯಂಡ್ ಬಂದಿತ್. ಇಕ್ಕ ಬೊಟ್ಟೋಳಂಡ ಮಿಟ್ಟು ಪೂಣಚ್ಚ ಅಧ್ಯಕ್ಷಂಗಳಾಯಿತ್ ಕಾರ್ಬಾರ್ ಮಾಡಿಯ ಂಡುಂಡ್.
ಇಕ್ಕಾಕಣೆ 139 ಕೊಡವ ತಕ್ಕ್‌ರ ಸಾಹಿತ್ಯ ಪುಸ್ತಕ ಈ ಯೋಜನೆಲ್ ಬೊಳಿ ಕಂಡಿತ್. ಈ ತಿಂಗತ್ 140 ನೇ ಮೊಟ್ಟ್‌ರ ಪುದಿಯ ಪುಸ್ತಕ ಬೊಳಿ ಪಡ್‌ತುವದಲ್ಲತೆ ಪಲತರ ಸಾಂಸ್ಕೃತಿಕ ಪೈಪೋಟಿ ಪಿಂಞ ಪ್ರದರ್ಶನವೂ ನಡ್‌ಪ. ಕೂಟತ್‌ರ ಜನಪ್ರಿಯ ಕೊಡವ ಸಾಹಿತ್ಯ ಮಾಲೆ ಯೋಜನೆಲ್ ಕೊಡವ ತಕ್ಕ್‌ಲ್ ಚುಟುಕ, ಕವನ, ಕಥೆ, ಕಾದಂಬರಿ, ನಾಟಕ, ಒಡೆಪಗಾದೆ, ತಮಾಶಿ, ಐಲಾಟ, ತೀನಿ, ಕೊಡವ ತಕ್ಕ್‌ಲ್ ಕಾಗದ ಎಳ್‌ದುವಾಂಗ್ ಸಮ್ಮಂಧಪಟ್ಟ ಎಳ್ತ್‌ಕುತ್ತ್, ನಾಡ್‌ಮದ್ದ್, ಆರೋಗ್ಯ ಭಾಗ್ಯ, ಯೋಗಾಸನ, ದೇವನೆಲೆ, ಬುದ್ದಿತಕ್ಕ್, ಮಕ್ಕಡ ಕಥೆ, ಬದ್‌ಕ್‌ಕ್ ಬಟ್ಟೆ ಕಾಟುವ ಸೂತ್ರ, ಕಾಫಿ ಬೊಳೆಕ್ ಸಮ್ಮಂದಪಟ್ಟ ಪುಸ್ತಕ, ಪಾಟ್, ಪದ್ದತಿ, ಜಾನಪದ ಪಾಟ್, ಪಳೆಯ ಪಾಟ್, ಕಾರ್ಡ್‌ರ ಕಥೆ, ಪಳ್‌ಂಜೊಲ್ಲ್, ತರ್ಜುಮೆ ಸಾಹಿತ್ಯ, ಮರಣಪಟ್ಟ ಎಳ್ತ್‌ಕಾರ ಎಳ್ದ್ ನ ಎಳ್ತ್‌ನ ಪುಸ್ತಕ ಮಾಡಿತ್ ಬೊಳಿ ಪಡ್‌ತುವದೂ ಕೂಡ್‌ನನಕೆ ಬೋರೆ ಏದ್ ಭಾಷೆಲೂ ಬರತಂತ ಎಲ್ಲಾ ತರತ್‌ರ ಸಾಹಿತ್ಯತ್‌ನ ಪುಸ್ತಕ ಮಾಡಿತ್ ಬೊಳಿ ಪಡ್‌ತಿತ್. ಇಂಞೂ ತಿಂಗೋದಿ ಪುಸ್ತಕ ಬೊಳಿಪಡ್‌ತುವ ಯೋಜನೆ ಇಟ್ಟಂಡಿತ್. ಪುಸ್ತಕ ಪ್ರಕಟಣೆ, ಕಾರ್ಯಕ್ರಮ ಸಂಘಟನೆ, ಪ್ರಚಾರ, ಪೈಪೋಟಿ - ಪ್ರದರ್ಶನತ್‌ರ ಇನಾಂ ಕೂಡ್‌ನನಕೆ 50 ಆಯಿರ ಉರ್‌ಪಿಯತ್‌ರಚ್ಚಕ್ ಪಣತ್‌ನ ದಾನಿಯಡ ಸಹಕಾರತೇ ಪಡ್‌ಂದಂಡ್ ಎಡೆಬುಡತೆ ತಿಂಗೋದಿ ಕಾರ್ಯಕ್ರಮ ಮಾಡಿಯಂಡ್ ಬಂದಂಡುಳ್ಳದ್ ಕೂಟತ್‌ರ ಪೆರ್ತ್ ಬಲ್ಯ ಸಾಧನೆ.
ಚೆಟ್ಟಂಗಡ ರವಿ ಸುಬ್ಬಯ್ಯ
