FB ಮಹಿಳಾ ಉದ್ಯೋಗಿಗಳು ತುಂಡುಡುಗೆ ತೊಡಲಿದೆ ನಿರ್ಬಂಧ

ನ್ಯೂಯಾರ್ಕ್: ಫೇಸ್‌ಬುಕ್ ಎಂಬ ಸಾಮಾಜಿಕ ತಾಣದಲ್ಲಿ 'ಸಭ್ಯ' ಹಾಗೂ 'ಅಸಭ್ಯ'ದ ನಡುವೆ ತೆಳು ಗೆರೆಯ ಅಂತರವಿದೆ ಎನ್ನುವುದು ಎಲ್ಲರಿಗೂ ಗೊತ್ತು. ಇಲ್ಲಿ ಎಲ್ಲ ರೀತಿಯ ಸಭ್ಯ ಹಾಗೂ ಅಸಭ್ಯ ಮಾಹಿತಿಗಳೂ ಲಭ್ಯ. ಇಂಥ ತಾಣವನ್ನು ನಿರ್ವಹಿಸುತ್ತಿರುವ ಕಂಪನಿಯಲ್ಲಿ ಕಾರ್ಯನಿರ್ವಹಿಸುವ ಮಹಿಳಾ ಉದ್ಯೋಗಿಗಳಿಗೆ 'ಸಭ್ಯವಲ್ಲದ' ಉಡುಗೆ ತೊಡದಂತೆ ಕಂಪನಿ ಹೇಳುತ್ತಂತೆ. ಕೆಲವು ಡ್ರೆಸ್‌ಗಳು ಸಹೋದ್ಯೋಗಿಗಳ ಏಕಾಂತಕ್ಕೆ ಭಂಗ ತರುವ ಸಾಧ್ಯತೆ ಇದೆ ಎಂಬ ಕಾರಣಕ್ಕೆ ಇಂಥದ್ದೊಂದು ಸೂಚನೆ ನೀಡಿದೆಯಂತೆ ಕಂಪನಿ!

ಕಂಪನಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಅಂಟೋನಿಯೋ ಗರ್ಸಿಯಾ ಮಾರ್ಟಿನೆಜ್ ಎಂಬ ಉದ್ಯೋಗಿ ಬರೆದಿರುವ 'ಕೆಯೋಸ್ ಮಂಕೀಸ್' ಎಂಬ ಪುಸ್ತಕದಲ್ಲಿ ಈ ರೀತಿ ಆರೋಪಿಸಿದ್ದಾರೆಂದು 'ಟೆಲಿಗ್ರಾಫ್' ವರದಿ ಮಾಡಿದೆ.

'ಪುರುಷ ವಿಭಾಗದ ಮಾನವ ಸಂಪನ್ಮೂಲ ಇಲಾಖೆ ಕೆಲವು ಮಹಿಳಾ ಸಹವರ್ತಿಗಳ ಸಹಾಯದೊಂದಿಗೆ ಸಹೋದ್ಯೋಗಿಗಳ ಚಿತ್ತ ವಿಕ್ಷೇಪಗೊಳಿಸುವಂಥ ಉಡುಗೆಯನ್ನು ತೊಡಬಾರದೆಂದು ಆಗಾಗ ಭಾಷಣ ಮಾಡುತ್ತಿದ್ದರು. ಕೆಲವೊಮ್ಮೆ ಮಹಿಳಾ ಉದ್ಯೋಗಿಗಳನ್ನು ತುಳಿಯಲು ಇಂಥ ಸೂಚನೆಗಳನ್ನು ನೀಡಲಾಗುತ್ತಿತ್ತು ಎಂಬುವುದು ನಂತರ ನನಗೆ ಗೊತ್ತಾಯಿತು,' ಎಂದು ಮಾರ್ಟಿನೆಜ್ ಹೇಳಿದ್ದಾರೆ.

ಲೈಂಗಿಕ ದೌರ್ಜನ್ಯವನ್ನು ಗಂಭೀರವಾಗಿ ಪರಿಗಣಿಸೋಲ್ಲ: ಕಂಪನಿಯಲ್ಲಿ ಲೈಂಗಿಕ ದೌರ್ಜನ್ಯದ ಆರೋಪವನ್ನು ಗಂಭೀರವಾಗಿ ಪರಿಗಣಿಸುವುದೇ ಇಲ್ಲವೆಂದು ಫೇಸ್‌ಬುಕ್‌ನ ಮಾಜಿ ಉದ್ಯೋಗಿಗಳು ಹೇಳುತ್ತಾರೆ. 'ಸುಮಾರು ಹದಿನಾರು ವರ್ಷದವಳಂತೆ ಕಾಣುವ ಇಂಟರ್ನಿಯೊಬ್ಬಳು ತುಂಡುಡುಗೆ ತೊಟ್ಟು ಬರುತ್ತಿದ್ದಳು. ಅದು ಅನುಚಿತವಾಗಿದ್ದು, ನಗೆ ಬರಿಸುವಂಥ ಪರಿಸ್ಥಿತಿ ಅಲ್ಲಿತ್ತು,' ಎಂದಿದ್ದಾರೆ.

ಕಂಪನಿಯ ಸಿಇಒ ಮಾರ್ಕ್ ಝುಕರ್‌ಬರ್ಗ್ ವಿಪರೀತ ಸಿಟ್ಟಿನ ಮನುಷ್ಯ. 'ಅಪರಿಚಿತ ಉದ್ಯೋಗಿಯೊಬ್ಬ ಕಂಪನಿಯ ಹೊಸ ಅವತರಿಣಿಕೆಯನ್ನು ಲೀಕ್ ಮಾಡಿದಾಗ, ಇಡೀ ಆಫೀಸಿಗೇ ಮೇಲ್ ಕಳುಹಿಸಿ ರಾಜೀನಾಮೆ ನೀಡುವಂತೆ ಹೇಳಿದ್ದರು' ಎಂದು ಮಾರ್ಟಿನೆಜ್ ಹೇಳಿದ್ದಾರೆ.

ಬಿಳಿಯ ಹಾಗೂ ಏಷಿಯನ್ ಪುರುಷರೇ ಫೇಸ್‌ಬುಕ್‌ನಲ್ಲಿ ಪ್ರಭಾವಿಯಾಗಿದ್ದಾರೆ. ಈ ವರ್ಷ 2897 ಉದ್ಯೋಗಿಗಳನ್ನು ನೇಮಿಸಿಕೊಂಡಿದ್ದು, ವೈವಿಧ್ಯತೆ ಇದೀಗ ಸುಧಾರಿಸಿದೆ, ಎಂದು ಕಳೆದ ವರ್ಷ ಟೆಕ್ ಕ್ರಂಚ್ ವರದಿಯಿಂದ ತಿಳಿದು ಬರುತ್ತದೆ.

ಕಳೆದ ವರ್ಷ ಶೇ.40ರಷ್ಟು ಉದ್ಯೋಗಿಗಳ ಸಂಖ್ಯೆ ಹೆಚ್ಚಾದರೂ, 10,082ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಹೊಂದಿರುವ ಕಂಪನಿಯಲ್ಲಿ ಶೇ.1ರಷ್ಟು ಮಾತ್ರ ಮಹಿಳಾ ಉದ್ಯೋಗಿಗಳಿದ್ದಾರೆ.