- ಶೀಲಾ ಸಿ. ಶೆಟ್ಟಿ
ಉದ್ಯಾನನಗರಿಯಲ್ಲಿ ಇದೀಗ ಪೂಲ್ ಇನ್ ಪಾರ್ಟಿಗಳ ಸೀಸನ್ ಆರಂಭವಾಗಿದೆ.
ಇದುವರೆಗೂ ಪೂಲ್ ಸೈಡ್ ಪಾರ್ಟಿಗಳತ್ತ ಮುಖ ಮಾಡುತ್ತಿದ್ದ ಇ-ಜನರೇಷನ್ ಹೈಕಳು, ಪೇಜ್3 ಸಿಲೆಬ್ರಿಟಿಗಳು ಹಾಗೂ ಸ್ವಿಮ್ ಲವರ್ಸ್ ಇದೀಗ ಪೂಲ್ ಇನ್ ಪಾರ್ಟಿಗಳತ್ತ ಒಲವು ತೋರಿಸತೊಡಗಿದ್ದಾರೆ.
ಮೊದಲಿನಿಂದಲೂ ಪೂಲ್ ಸೈಡ್ ಪಾರ್ಟಿಗಳು ಸಮ್ಮರ್ ಸೀಸನ್ನಲ್ಲಿ ಟ್ರೆಂಡಿಯಾಗಿದ್ದವು. ಇದೀಗ ಇ-ಜನರೇಷನ್ ಹೈಕಳು ಇಷ್ಟಪಡುವಂತಹ ಪೂಲ್ ಇನ್ ಪಾರ್ಟಿಗಳು ಹೆಚ್ಚೆಚ್ಚು ಆಯೋಜನೆಗೊಳ್ಳತೊಡಗಿವೆ.
ಏನಿದು ಪೂಲ್ ಇನ್ ಪಾರ್ಟಿ?
ಸಮ್ಮರ್ನ ಇನ್ಡೋರ್ ಪಾರ್ಟಿಗಳಲ್ಲಿ ಪೂಲ್ ಇನ್ ಪಾರ್ಟಿಯೂ ಕೂಡ ಒಂದು. ಒಂದು ವರ್ಗದ ಜನರು ಮಾತ್ರ ಇಂತಹ ಪಾರ್ಟಿಗಳಲ್ಲಿ ಪಾಲ್ಗೊಳ್ಳುತ್ತಾರೆ. ಸ್ಟಾರ್ ಹೋಟೆಲ್ಗಳಲ್ಲಿ ನಡೆಯುವ ಈ ಪಾರ್ಟಿಗಳಲ್ಲಿ ಕೇವಲ ಆಹ್ವಾನಿತರಿಗೆ ಮಾತ್ರ ಎಂಟ್ರಿ. ಕೆಲವೇ ಮಂದಿಗೆ ಮಾತ್ರ ಅವಕಾಶ. ಸ್ವಿಮ್ಮಿಂಗ್ ಪೂಲ್ನೊಳಗೆ ಓಡಾಡುತ್ತಲೇ ಪಾರ್ಟಿ ಮಾಡಬಹುದಾದಂತಹ ಸದಾವಕಾಶ. ಪೂಲ್ನೊಳಗೆ ಸ್ನಾಕ್ಸ್ ಜತೆಗೆ ಡ್ರಿಂಕ್ಸ್ ಮಾಡುವ ಮುಕ್ತ ಅವಕಾಶ ಇಲ್ಲುಂಟು. ಕೆಲವು ಪಾರ್ಟಿಗಳಲ್ಲಿ ಸ್ಪೋರ್ಟ್ಸ್, ಗೇಮ್ಸ್ ಸೌಲಭ್ಯವುಂಟು.
ಸ್ವಿಮ್ಮಿಂಗ್ ಬರುವವರಿಗೆ ಮಾತ್ರ
ಪೂಲ್ನೊಳಗೆ ಸ್ವಿಮ್ಮಿಂಗ್ ಬರುವವರಿಗೆ ಮಾತ್ರ ಆದ್ಯತೆ. ಇಲ್ಲವಾದಲ್ಲಿ ಈ ಪಾರ್ಟಿಗೆ ಎಂಟ್ರಿ ಇಲ್ಲ ಎನ್ನುತ್ತಾರೆ ಆಯೋಜಕರು. 'ಬೇಸಿಗೆ ಕಾಲಕ್ಕೆ ಹೊಂದುವಂತಹ ಕೂಲ್ ಡ್ರಿಂಕ್ಸ್ ಹಾಗೂ ಸ್ನಾಕ್ಸ್ ಇಲ್ಲಿ ಪೂರೈಸಲಾಗುತ್ತದೆ. ಈಜು ಬರದವರು ಪೂಲ್ಸೈಡ್ನಲ್ಲಿ ಇರಬೇಕಾಗುತ್ತದೆ. ಮೊದಲ ಆದ್ಯತೆ ಈಜು ಬರುವವರಿಗೆ ಮಾತ್ರ ಎನ್ನುತ್ತಾರೆ ಅವರು.
ಎಥ್ನಿಕ್ ಡ್ರೆಸ್ಕೋಡ್ಗೆ ಅವಕಾಶವಿಲ್ಲ
ಪೂಲ್ ಇನ್ ಪಾರ್ಟಿ ಎಂದಾಕ್ಷಣಾ ಡ್ರೆಸ್ಕೋಡ್ ಸ್ವಿಮ್ಮಿಂಗ್ನ ಡ್ರೆಸ್ ಇರಬೇಕೆಂದಿಲ್ಲ. ಒಟ್ಟಿನಲ್ಲಿ ನೀರಲ್ಲಿ ಸುಲಭವಾಗಿ ಓಡಾಡಬಹುದಾದಂತಹ ಡ್ರೆಸನ್ನು ಧರಿಸಬಹುದು. ಎಥ್ನಿಕ್ ಉಡುಪಿಗೆ ಇಲ್ಲಿ ಅವಕಾಶವಿಲ್ಲ ಎನ್ನುತ್ತಾರೆ ಪಾರ್ಟಿ ಪ್ರೇಮಿಗಳು. ಯೂನಿಸೆಕ್ಸ್ ಪೂಲ್ ಇನ್ ಪಾರ್ಟಿ ನಡೆಯುವಾಗ ಮಾತ್ರ ಬಹಳಷ್ಟು ಎಚ್ಚರವಹಿಸುವುದು ಉತ್ತಮ. ಇಲ್ಲವಾದಲ್ಲಿ ಅನಾಹುತಕ್ಕೆ ಎಡೆಮಾಡಿಕೊಡಬಹುದು ಎನ್ನುತ್ತಾರೆ ಪಾರ್ಟಿ ಪ್ರೇಮಿಯೊಬ್ಬರು.
ಸ್ಕಿನ್ಕೇರ್ ಕೂಡ ಅಗತ್ಯ
ಬೇಸಿಗೆ ಮಜಾ ಕಳೆಯಲು ನಡೆಯುವ ಈ ಪೂಲ್ ಇನ್ ಪಾರ್ಟಿಗಳು ನಾನಾ ಸ್ಕಿನ್ ಸಮಸ್ಯೆಗಳನ್ನು ತಂದೊಡ್ಡಬಹುದು. ಮುಂಜಾಗ್ರತಾ ಕ್ರಮವಾಗಿ ಕ್ರೀಮ್ಗಳನ್ನು ಲೇಪಿಸಿಕೊಂಡು ಇಳಿದಲ್ಲಿ ಉತ್ತಮ. ಸಂಜೆ ವೇಳೆ ನಡೆಯುವ ಪಾರ್ಟಿಗಳಾದಲ್ಲಿ ಸನ್ಟ್ಯಾನ್ ಭಯವಿಲ್ಲ. ಹೆಚ್ಚಾಗಿ ಉರಿ ಬಿಸಿಲಿನಲ್ಲಿ ಇಂತಹ ಪಾರ್ಟಿ ಆಯೋಜನೆ ನಡೆಯದು.
-----------------
ಬಾಕ್ಸ್
ಪಾಲ್ಗೊಳ್ಳುವವರಿಗೆ ಎಚ್ಚರಿಕೆ ಮಾತು
ರೆಪ್ಯೂಟೆಡ್ ಆಯೋಜಕರ ಪಾರ್ಟಿಗಳಲ್ಲಿ ಮಾತ್ರ ನೋಂದಣಿ ಮಾಡಿ. ಯಾವುದೇ ಕಾರಣಕ್ಕೂ ಗೊತ್ತು ಗುರಿಯಿಲ್ಲದ ಪೂಲ್ ಇನ್ ಪಾರ್ಟಿಗೆ ಹೋಗದಿರಿ. ಫೋಟೋಗಳಿಗೆ ಫೋಸ್ ನೀಡುವ ಮುನ್ನ ಮುಂದಾಗುವ ಸನ್ನಿವೇಶಗಳ ಬಗ್ಗೆ ಗೊತ್ತಿರಲಿ. ಸೋಷಿಯಲ್ ಮೀಡಿಯಾ ಅಪ್ಲೋಡ್ ಮಾಡುವ ಮುನ್ನ ತಮ್ಮ ವ್ಯಕ್ತಿತ್ವಕ್ಕೆ ಇದು ಹೊಂದುವುದೇ ಎಂಬುದನ್ನು ಯೋಚಿಸಿ.
---------------------
ಪೂಲ್ ಇನ್ ಪಾರ್ಟಿಯಲ್ಲಿ ಪಾಲ್ಗೊಳ್ಳುವವರಾದಲ್ಲಿ...
* ಮೊದಲು ರೂಲ್ಸ್ ರೆಗ್ಯುಲೇಷನ್ಸ್ ತಿಳಿದುಕೊಳ್ಳಿ.
* ಪಾರ್ಟಿಯ ಸಮಯದ ಪರಿಜ್ಞಾನವಿರಲಿ.
* ಮಧ್ಯ ರಾತ್ರಿ ನಂತರವೂ ಮುಂದುವರೆದರೇ ಎಚ್ಚರ.
* ಆರೋಗ್ಯ ಸಮಸ್ಯೆ ಇರುವವರು ನೀರಿನಲ್ಲಿ ಹೆಚ್ಚು ಹೊತ್ತು ಕಳೆಯುವುದು ಬೇಡ.