* ಶೀಲಾ ಸಿ. ಶೆಟ್ಟಿ
ರಾಖಿ ಹಬ್ಬದ ಸಡಗರದಲ್ಲಿ ಸೋದರ-ಸೋದರಿಯರು ಸಂಭ್ರಮಿಸುತ್ತಿದ್ದಾರೆ. ಸೋದರಿಯರಿಂದ ರಾಖಿ ಕಟ್ಟಿಸಿಕೊಂಡ ನಂತರ ಸೋದರರು ಗಿಫ್ಟ್‌ ನೀಡುವುದು ನಡೆದು ಬಂದ ಪ್ರತೀತಿ. ಹಾಗೆಂದು ಕೊಡುಗೆಯಾಗಿ ಏನಾದರೂ ನೀಡಬೇಕು ಎಂದು ಕೈಗೆ ಸಿಕ್ಕಿದ್ದನ್ನು ನೀಡುವುದು ತರವಲ್ಲ. ಬದಲಿಗೆ ಸೋದರಿಯ ಮನಸ್ಸು ಮುಟ್ಟುವಂತಹ ಕೊಡುಗೆ ನೀಡುವುದು ಉತ್ತಮ. ಉಡುಗೊರೆ ಕೊಡುವ ಬಗ್ಗೆ ತಲೆ ಕೆಡಿಸಿಕೊಳ್ಳುವವರರಿಗೆ ಇಲ್ಲಿದೆ ಒಂದಿಷ್ಟು ಐಡಿಯಾ.
1. ಗಿಫ್ಟ್‌ ಟ್ರೆಂಡಿಯಾಗಿರಲಿ
ಟ್ರೆಂಡಿಯಾಗಿರುವ ಕೊಡುಗೆಗಳು ಇಂದಿನ ಇ-ಜನರೇಷನ್‌ ಹುಡುಗಿಯರಿಗೆ ಇಷ್ಟವಾಗುತ್ತವೆ. ಅವನ್ನು ಬಳಸವುದೂ ಸುಲಭ. ಮೂಲೆಯೊಂದರಲ್ಲಿ ಗಿಫ್ಟ್‌ ಇರಿಸುವುದಕ್ಕಿಂತ ಅದನ್ನು ಬಳಸಿದರೆ ಅದಕ್ಕೆ ಸಾರ್ಥಕತೆ ಹೆಚ್ಚು. ವಯಸ್ಸಿನ ಆಧಾರದ ಮೇಲೆ ಕೊಡುಗೆಯನ್ನು ಆಯ್ಕೆ ಮಾಡಿ. ಸ್ಕೂಲ್‌ ಹಾಗೂ ಕಾಲೇಜು ಹೋಗುವ ಹುಡುಗಿಯರಾದಲ್ಲಿ ಟ್ರೆಂಡಿಯಾಗಿರುವುದನ್ನು ನೀಡಿ.
2. ಬಜೆಟ್‌ ಪ್ಲಾನ್‌ ಇರಲಿ
ಮೊದಲೇ ಇಂತಿಷ್ಟು ಬೆಲೆಯ ಗಿಫ್ಟ್‌ ಕೊಳ್ಳಬೇಕು ಎಂಬ ಪ್ಲಾನ್‌ ಇರಲಿ. ಇಲ್ಲವಾದಲ್ಲಿ ಅವರಿಗಿಷ್ಟವಾದ ವಸ್ತುವಿನ ಬೆಲೆ ನಿಮ್ಮ ಬಜೆಟ್‌ಗೆ ಮ್ಯಾಚ್‌ ಆಗದೇ ಇರಬಹುದು. ಎಲ್ಲರ ಮುಂದೆ ನೀವು ಮುಜುಗರಕ್ಕಿಡಾಗಬಹುದು.
3. ಒಬ್ಬರಿಗಿಂತ ಹೆಚ್ಚು ಸೋದರಿಯರಿಗೆ
ಮನೆಯಲ್ಲಿ ಸೋದರಿಯರು ಒಬ್ಬರಿಗಿಂತ ಹೆಚ್ಚು ಮಂದಿಯಿದ್ದಲ್ಲಿ ಮೊದಲೇ ಅವರ ಚಾಯ್ಸ್‌ ತಿಳಿದುಕೊಳ್ಳಿ. ಸಮಾನ ಮನಸ್ಕರಾದಲ್ಲಿ ಎಲ್ಲರಿಗೂ ಒಂದೇ ರೀತಿಯ ಗಿಫ್ಟ್‌ ನೀಡಿ. ಭೇದ-ಭಾವ ಉಂಟು ಮಾಡಿದಂತಾಗುವುದಿಲ್ಲ.
4. ಹೃದಯಕ್ಕೆ ತಾಗುವಂತಿರಲಿ
ಸೋದರ ಸಂಬಂಧವನ್ನು ಹೈಲೈಟ್‌ ಮಾಡುವಂತಹ ಶೋಪೀಸ್‌ಗಳು, ಸಂದೇಶಗಳು ಇರುವ ಗ್ರೀಟಿಂಗ್‌ ಕಾರ್ಡ್‌ ಆಗಬಹುದು. ಇಲ್ಲವೇ ಮಧುರ ಬಾಂಧವ್ಯ ಬಿಂಬಿಸುವ ಬಾಲ್ಯದ ನೆನಪನ್ನು ಮಾಡಿಕೊಡುವಂಥವನ್ನು ನೀಡಬಹುದು.
5. ಆಸಕ್ತಿದಾಯಕವಾಗಿರಲಿ
ನೀವು ನೀಡುವ ಗಿಫ್ಟ್‌ ಆಸಕ್ತಿ ಕೆರಳಿಸಬೇಕು. ಅಯ್ಯೋ, ಇದಾ ಗಿಫ್ಟ್‌ ಎಂದು ಟೀಕೆ ಮಾಡುವಂತಿರಬಾರದು. ಕಡಿಮೆ ಬೆಲೆಯದ್ದಾದರೂ ಸರಿ ಅದು ನೀಡಿದ ಮೇಲೆ ಗಮನ ಸೆಳೆಯಬೇಕು. ಗಮನದಲ್ಲಿಟ್ಟುಕೊಂಡು ಅದಕ್ಕೆ ಪೂರಕವಾಗುವಂತಹ ಕೊಡುಗೆ ನೀಡುವುದು ಉತ್ತಮ.
6. ಸರ್‌ಪ್ರೈಸ್‌ ಆಗುವಂತಿರಲಿ
ಬಹಳ ದಿನಗಳಿಂದ ಕೊಳ್ಳಲು ಬಯಸುತ್ತಿರುವ ಅವರ ಆಯ್ಕೆಯ ವಸ್ತುವಿನ ಬಗ್ಗೆ ನಿಮಗೆ ಗೊತ್ತಿದ್ದಲ್ಲಿ, ಅದನ್ನೇ ಕೊಂಡು ಕೊಡುಗೆಯಾಗಿ ನೀಡಿ ಸರ್‌ಪ್ರೈಸ್‌ ಮಾಡಿ. ಇದು ಅವರಿಗೆ ದುಪ್ಪಟ್ಟು ಸಂತೋಷ ನೀಡುತ್ತದೆ.
7. ಫೋಟೋ ಮಿಕ್ಸ್‌ ಮ್ಯಾಚ್‌
ಜೊತೆಗೆ ಕಳೆದ ನೆನಪುಗಳನ್ನು ಮೆಲುಕು ಹಾಕುವಂತಹ ಫೋಟೋವೊಂದನ್ನು ಲ್ಯಾಮಿನೇಟ್‌ ಮಾಡಿಸಬಹುದು. ಫೋಟೋ ಫ್ರೇಮ್‌ ಹಾಕಿಸಿ ನೀಡಬಹುದು. ಚಿರಸ್ಮರಣೀಯವಾಗಿಸಬಹುದು. ಇಂದು ಫೋಟೋಗಳನ್ನು ಮಗ್‌ ಇಲ್ಲವೇ ಟೀ ಶರ್ಟ್‌ ಮೇಲೆ ಹಾಕಿಸಿ ನೀಡಬಹುದು. ಇವು ಕೊಂಚ ದುಬಾರಿಯಾಗಬಹುದು. ಆದರೆ, ಇದು ಸದಾ ನಿಮ್ಮ ನೆನಪನ್ನು ತರುತ್ತದೆ. ಕೀಚೈನ್‌ ಮೇಲೂ ಪುಟ್ಟದಾದ ಫೋಟೋ ಹಾಕಿಸಬಹುದು.
-----
ರಾಖಿ ಹಬ್ಬಕ್ಕೆ ಸೋದರರು ನೀಡುವ ಕೊಡುಗೆ ನೋಡಲು ಆಕರ್ಷಕವಾಗಿದ್ದರೆ ಸಾಲದು, ತೆಗೆದುಕೊಂಡವರ ಮನಸ್ಸಿಗೆ ಇಷ್ಟವಾಗಬೇಕು.
- ಹರ್ಷ್‌ ಕುಮಾರ್‌ ಬೇಡಿ, ಮಾಡೆಲ್‌