ನಿಂಬೆ ಸಿಪ್ಪೆಯ ಮರುಬಳಕೆಗೆ ಐಡಿಯಾ
ನಿಂಬೆರಸವನ್ನು ತೆಗೆದ ಮೇಲೆ ಚರಟವನ್ನು ಎಸೆಯುವುದು ಮಾಮೂಲಿ...
ಒಮ್ಮೆ ಬಳಸಿದ ನಿಂಬೆಹಣ್ಣನ್ನು ಮರುಬಳಕೆ ಮಾಡಲು ಸಾಧ್ಯವಿಲ್ಲ. ನಿಂಬೆರಸವನ್ನು ತೆಗೆದ ಮೇಲೆ ಚರಟವನ್ನು ಎಸೆಯುವುದು ಮಾಮೂಲಿ. ಆದರೆ ನಿಮಗೆ ಗೊತ್ತಾ, ಬಳಸಿ ಬಿಸಾಕುವ ನಿಂಬೆಹಣ್ಣಿನ ಸಿಪ್ಪೆಯ ಉಪಯೋಗವಿದೆ. ಅದಕ್ಕಾಗಿ ಈ ಕೆಳಗಿನ ಟಿಫ್ಸ್ ಟ್ರೈ ಮಾಡಿ.
-ಶ್ರಾವ್ಯಾ ಹೆಚ್. ಎನ್
ಬಳಸಿ ಬಿಸಾಡುವ ನಿಂಬೆಹಣ್ಣಿನ ಸಿಪ್ಪೆಯಿಂದ ನಾನಾ ಉಪಯೋಗವಿದೆ ಎನ್ನುತ್ತಾರೆ ಕಿಚನ್ ಎಕ್ಸ್ಪರ್ಟ್ಸ್. ಹೇಗೆಲ್ಲಾ ಬಳಸಬಹುದು ಎಂಬುದಕ್ಕೆ ಇಲ್ಲಿದೆ ಒಂದಿಷ್ಟು ಐಡಿಯಾ.
1. ಮೈಕ್ರೊವೇವ್ ಕ್ಲೀನರ್
ನಿಂಬೆಹಣ್ಣಿನ ಸಿಪ್ಪೆಯೊಂದಿಗೆ ಸೇಫ್ ಬೌಲ್ನಲ್ಲಿ ನೀರು ತುಂಬಿಸಿ. 5 ನಿಮಿಷಗಳ ಕಾಲ ಮೈಕ್ರೋವೇವ್ ಆನ್ ಮಾಡಿ. ನಿಂಬೆಯ ಪರಿಮಳದೊಂದಿಗೆ ಮೈಕ್ರೋವೇವ್ ಸ್ವಚ್ಛವಾಗುತ್ತದೆ.
2. ಉಡುಪುಗಳ ಕಲೆ ತೆಗೆಯಲು
ಬಟ್ಟೆಯಲ್ಲಿ ಸಾರು ಸಾಂಬಾರು ಮುಂತಾದುವುಗಳು ಚೆಲ್ಲಿ ಉಡುಪುಗಳು ಕಲೆಯುಂಟಾದರೆ ತಕ್ಷ ಣ ಆ ಜಾಗಕ್ಕೆ ನಿಂಬೆರಸವನ್ನು ಹಚ್ಚಿ ನಂತರ ಡಿಟರ್ಜಂಟ್ನಿಂದ ವಾಶ್ ಮಾಡಿ. ಕಲೆ ಮಾಯವಾಗುತ್ತದೆ.
3. ಮನೆ ಸುವಾಸನೆಯುಕ್ತವಾಗಿಸಲು
ನಿಂಬೆ ಸಿಪ್ಪೆಯನ್ನು ಒಂದು ಬೌಲ್ ನೀರಿನಲ್ಲಿ ಹಾಕಿ ಚೆನ್ನಾಗಿ ಕುದಿಸಿ. ಇದರಿಂದ ಮನೆಯೆಲ್ಲಾ ನಿಂಬೆರಸದಿಂದ ಸುವಾಸನೆಯುಕ್ತವಾಗುತ್ತದೆ.
4. ಹಣ್ಣು-ತರಕಾರಿ ಫ್ರೆಶ್ನೆಸ್ ಕಾಪಾಡಲು
ಹಣ್ಣು-ತರಕಾರಿಗಳು ಫ್ರೆಶ್ ಆಗಿರಲು, ನೀರಿಗೆ ಸ್ವಲ್ಪ ಉಪ್ಪು ಹಾಗೂ ನಿಂಬೆರಸ ಬೆರೆಸಿ. ಹಣ್ಣು-ತರಕಾರಿಗಳನ್ನು ಅದರಲ್ಲಿ ಮುಳುಗಿಸಿಡಿ. ಆನಂತರ ತೆಗೆದು ಒಣಗಿದ ಬಟ್ಟೆಯಿಂದ ಒರೆಸಿದರೆ ಫ್ರೆಶ್ನೆಸ್ ಹಾಗೆಯೇ ಇರುತ್ತದೆ.
5. ಆಯುಧಗಳನ್ನು ಹರಿತಗೊಳಿಸಲು
ಆಯುಧಗಳ ತುದಿಗೆ ನಿಂಬೆಹಣ್ಣಿನ ಸಿಪ್ಪೆಯಿಂದ ಚೆನ್ನಾಗಿ ಉಜ್ಜಿದರೆ ಮೊಂಡಾದ ಆಯುಧಗಳು ಹರಿತವಾಗುವುದರಲ್ಲಿ ಯಾವುದೇ ಸಂಶಯವಿಲ್ಲ.
6. ಕ್ರೀಮಿ-ಕೀಟಗಳಿಗೆ ರಾಮಬಾಣ
ಇರುವೆ ಅಥವಾ ಕೀಟಗಳಿರುವ ಜಾಗದಲ್ಲಿ ನಿಂಬೆಹಣ್ಣಿನ ಸಿಪ್ಪೆಯಿಂದ ಉಜ್ಜಿನೋಡಿ. ಇರುವೆಗಳು ಪುನಃ ಬರುವುದಿಲ್ಲ. ನಿಂಬೆಹಣ್ಣಿನ ಸಿಪ್ಪೆಯಿಂದ, ಜಿರಲೆಗಳಿಂದಲೂ ಮುಕ್ತಿ ಹೊಂದಬಹುದು.
7. ಕ್ಲೀನಿಂಗ್ ಏಜೆಂಟ್
ನಿಂಬೆಹಣ್ಣಿನ ಸಿಪ್ಪೆಯನ್ನು ಫ್ರಿಡ್ಜ್ನಲ್ಲಿಟ್ಟು ನೋಡಿ. ಇದರ ಸುವಾಸನೆಯಿಂದ ಫ್ರಿಡ್ಜ್ ಬಾಗಿಲು ತೆಗೆದಾಗ ಪರಿಮಳ ಬೀರುತ್ತದೆ.
ಫ್ಲಾಸ್ಕ್ಗಳ ಕ್ಲೀನರ್ ಪ್ಲಾಸ್ಕ್ಗಳಿಗೆ ಬಿಸಿಯಾದ ನೀರು ತುಂಬಿಸಿ. ಅದರೊಳಗೆ ನಿಂಬೆಹಣ್ಣಿನ ಸಿಪ್ಪೆಯನ್ನು ಹಾಕಿ, 5ರಿಂದ10 ನಿಮಿಷದ ನಂತರ, ಚೆನ್ನಾಗಿ ಕುಲಕಿ ಆನಂತರ ಬಿಸಿನೀರಿನಿಂದ ತೊಳೆದರೆ ಪ್ಲಾಸ್ಕ್ ಅಥವಾ ಕಾಫಿ ಕೆಟಲ್ ಸುವಾಸನೆಯುಕ್ತವಾಗುತ್ತದೆ.
8. ಡಿಶ್ ವಾಶರ್
ನಿಂಬೆಹಣ್ಣಿನ ಸಿಪ್ಪೆಯು ಉತ್ತಮ ಡಿಶ್ ವಾಶರ್ ಆಗಿ ಕಾರ್ಯ ನಿರ್ವಹಿಸುತ್ತದೆ. ಕಪ್ಪಾಗಿರುವ, ತಳ ಹಿಡಿದಿರುವ ಪಾತ್ರೆಗಳಿಗೆ ನಿಂಬೆಹಣ್ಣಿನ ಸಿಪ್ಪೆಯನ್ನು ಹಾಕಿ ನೀರು ಬೆರೆಸಿ ಚೆನ್ನಾಗಿ ಕುದಿಸಿ. ಅನಂತರ ತೊಳೆಯಿರಿ. ಪಾತ್ರೆಯಲ್ಲಿನ ಕಲೆಗಳು ಸಂಪೂರ್ಣವಾಗಿ ಮಾಯವಾಗುತ್ತದೆ.