ದೇಶದಲ್ಲೇ ದೊಡ್ಡ ನಿವಾಸಗಳ ಸ್ವರ್ಗ ಬೆಂಗಳೂರು

ಮನೆಗಳು ವಿಸ್ತಾರವಾಗಿದ್ದಷ್ಟೂ ಆರಾಮದಾಯಕವಾಗಿರುತ್ತವೆ. ಆದರೆ ಇತ್ತೀಚಿನ ದಿನಗಳಲ್ಲಿ ಬಿಲ್ಡರ್‌ಗಳು ಮನೆ ವಿಸ್ತೀರ್ಣವನ್ನು ಕಡಿಮೆ ಮಾಡುತ್ತಿರುವ ಟ್ರೆಂಡ್‌ ದೇಶದೆಲ್ಲೆಡೆ ಕಂಡು ಬರುತ್ತಿದೆ. ಆದರೆ ಇದಕ್ಕೆ ಬೆಂಗಳೂರು ಅಪವಾದ. ಇಲ್ಲಿ ಮನೆಗಳು ವಿಸ್ತಾರವಾಗಿಯೇ ಉಳಿದಿವೆ.

ಬಜೆಟ್‌ ಸ್ನೇಹಿ
ಬೆಂಗಳೂರಿಗೆ ವಲಸೆ ಬರುವವರ ಸಂಖ್ಯೆ ದಿನೇ ದಿನೇ ಹೆಚ್ಚುತ್ತಿದೆ. ಇದರಿಂದ ಮನೆಯ ಬೇಡಿಕೆಯೂ ಗಣನೀಯ ಏರಿಕೆ ಕಾಣುತ್ತಿದೆ. ಇದರಿಂದ ನಗರ ಎಲ್ಲಾ ದಿಕ್ಕುಗಳಲ್ಲಿ ಬೆಳೆಯುತ್ತಿದೆ. ಹೀಗಾಗಿ ಇಲ್ಲಿ ಮನೆಯ ವಿಸ್ತೀರ್ಣವನ್ನು ಬಿಲ್ಡರ್‌ಗಳು ಕಡಿಮೆ ಮಾಡುತ್ತಿಲ್ಲ. ಇನ್ನೊಂದು ಪ್ರಮುಖ ಅಂಶವೆಂದರೆ ಉಳಿದ ನಗರಗಳಿಗೆ ಹೋಲಿಸಿದರೆ ವಿಸ್ತಾರವಾಗಿದ್ದರೂ ಇಲ್ಲಿನ ಅಪಾರ್ಟ್‌ಮೆಂಟ್‌ಗಳು ಬಜೆಟ್‌ ಫ್ರೆಂಡ್ಲಿ ಆಗಿವೆ.

ನಮ್ಮ ಹಲವು ಗ್ರಾಹಕರು ಅಫರ್ಡೆಬಲ್‌, ಉತ್ತಮ ಪ್ರದೇಶ ಜತೆಗೆ ವಿಸ್ತಾರವಾದ ಮನೆ ಬೇಕೆಂದು ಬೇಡಿಕೆ ಮುಂದಿಡುತ್ತಿದ್ದಾರೆ. ನಗರ ಪ್ರದೇಶದಿಂದ ಸ್ವಲ್ಪ ದೂರ ಪ್ರಯಾಣವಾದರೂ ಅವರಿಗೆ ಚಿಂತೆ ಇರುವುದಿಲ್ಲ. ಈ ಹಿನ್ನೆಲೆಯಲ್ಲಿ ಗ್ರಾಹಕರಿಗೆ ಬೇಕಾದ ಮನೆಯನ್ನು ಒದಗಿಸುವುದು ಬಿಲ್ಡರ್‌ಗೆ ಅನಿವಾರ್ಯ ಮತ್ತು ಕರ್ತವ್ಯ ಆಗಿರುತ್ತದೆ ಎಂದು ಅನರಾಕ್‌ ಪ್ರಾಪರ್ಟಿ ಕನ್ಸಲ್ಟೆಂಟ್‌ನ ಅನೂಜ್‌ ಪುರಿ ವಿವರಿಸಿದರು.

ಗಣನೀಯ ಇಳಿಕೆ
ಅನರಾಕ್‌ ಅಧ್ಯಯನದ ಪ್ರಕಾರ, 2014-18ರ ಅವಧಿಯಲ್ಲಿ ದೇಶದ ಪ್ರಮುಖ ಏಳು ನಗರಗಳಲ್ಲಿ ಮನೆಗಳ ವಿಸ್ತೀರ್ಣ ಸರಾಸರಿ ಶೇ. 17ರಷ್ಟು ಕಡಿಮೆಯಾಗಿದೆ. ಇದರಲ್ಲಿ ಮುಂಬಯಿ ಮೊದಲ ಸ್ಥಾನದಲ್ಲಿದ್ದು, ಅಲ್ಲಿ 2014ರಲ್ಲಿ ಮನೆಯ ಸರಾಸರಿ ವಿಸ್ತೀರ್ಣ 960 ಚದರ ಅಡಿಯಿದ್ದರೆ ಈಗ ಅದು 700 ಚದರ ಅಡಿಗೆ ಇಳಿದಿದೆ. ಅಂದರೆ ಶೇ. 27ರಷ್ಟು ಕಡಿಮೆಯಾಗಿದೆ. ಆದರೆ ಬೆಂಗಳೂರಿನಲ್ಲಿ ವಿಸ್ತೀರ್ಣ ಕನಿಷ್ಠ ಪ್ರಮಾಣದಲ್ಲಿ ಇಳಿಕೆಯಾಗಿದೆ. ಇಲ್ಲಿ 2014ರಲ್ಲಿ 1856 ಚದರ ಅಡಿ ಇದ್ದ ಮನೆಯ ವಿಸ್ತೀರ್ಣ ಈಗ 1,291 ಚದರ ಅಡಿಗಳಿಗಷ್ಟೇ ಇಳಿದಿದೆ ಎಂದು ರಿಯಲ್‌ ಎಸ್ಟೇಟ್‌ ಸಂಶೋಧನಾ ಸಂಸ್ಥೆಯೊಂದರ ವ್ಯವಸ್ಥಾಪಕ ನಿರ್ದೇಶಕ ಗೋರಕ್‌ ಜುಂಜುನ್‌ವಾಲಾ ಹೇಳಿದರು.

ಸರಾಸರಿ ವಿಸ್ತೀರ್ಣಬೆಂಗಳೂರಿನ ಹಲವು ಪ್ರದೇಶಗಳಲ್ಲಿ ನಡೆಸಿದ ಸಮೀಕ್ಷೆಯಲ್ಲಿ ಇಲ್ಲಿನ ಮನೆಗಳು ಸಾಕಷ್ಟು ವಿಸ್ತೀರ್ಣವಾಗಿರುವುದು ತಿಳಿದು ಬಂದಿದೆ. ಪ್ರಮುಖ ಐಟಿ ಕೇಂದ್ರ ವೈಟ್‌ಫೀಲ್ಡ್‌ನಲ್ಲಿ ಅಪಾರ್ಟ್‌ಮೆಂಟ್‌ ವಿಸ್ತೀರ್ಣ ಸರಾಸರಿ 1,100ರಿಂದ 1,500 ಚದರ ಅಡಿಗಳಾಗಿವೆ. ಬೆಂಗಳೂರು ಉತ್ತರದಲ್ಲಿ ಕೂಡ 1,100ರಿಂದ 1,500 ಚದರ ಅಡಿ ಇದೆ. ಹೊರ ವರ್ತುಲ ರಸ್ತೆ ಮತ್ತು ಸರ್ಜಾಪುರದಲ್ಲಿ 1,200ರಿಂದ 1,550 ಚದರ ಅಡಿ ವಿಸ್ತೀರ್ಣವನ್ನು ಮನೆಗಳು ಹೊಂದಿವೆ. ತುಮಕೂರು ರಸ್ತೆಯಲ್ಲಿ ಮನೆಗಳ ಸರಾಸರಿ ವಿಸ್ತೀರ್ಣ 1,100ರಿಂದ 1,200 ಅಡಿಗಳಿದ್ದರೆ, ಹೊಸೂರು ರಸ್ತೆಯಲ್ಲಿ ಇದು 1,300ರಿಂದ 1,550 ಚದರ ಅಡಿಗಳಾಗಿವೆ.