500 ಮತ್ತು 1000 ರೂ. ನೋಟು ಚಲಾವಣೆ ರದ್ಧತಿಯಾದ ಕೂಡಲೇ ನೈಜ ಪ್ರಾಪರ್ಟಿ ಗ್ರಾಹಕರಲ್ಲಿ ಒಂದಿಷ್ಟು ಆತಂಕವಾಗಿದೆ. ಖರೀದಿಯ ನಿರ್ಧಾರವನ್ನು ಮುಂದೂಡುವುದು ಇಲ್ಲವೇ ಕೈಬಿಡುವುದು ಮಾಡಬೇಕೇ ಎಂಬ ಗೊಂದಲವನ್ನು ಅವರನ್ನು ಕಾಡುತ್ತಿದೆ. ಈ ಹಿನ್ನೆಲೆಯಲ್ಲಿ ನೋಟು ರದ್ಧತಿಯಿಂದಾಗುವ ಆರು ಪರಿಣಾಮಗಳ ಬಗ್ಗೆ ಇಲ್ಲಿ ವಿವರ ನೀಡಲಾಗಿದೆ.
ನೋಟು ರದ್ಧತಿಯ ಬಳಿಕ ಹತ್ತು ಹಲವು ವದಂತಿಗಳು ಹಬ್ಬುತ್ತಿವೆ. ಇದಕ್ಕೆ ರಿಯಲ್ ಎಸ್ಟೇಟ್ ಕ್ಷೇತ್ರವೂ ಹೊರತಲ್ಲ. ಹೀಗಾಗಿ ಪ್ರಾಪರ್ಟಿ ಖರೀದಿ ಆಕಾಂಕ್ಷಿಗಳು ತಮ್ಮ ನಿರ್ಧಾರವನ್ನು ಮುಂದೂಡಬೇಕೇ ಎಂಬ ಗೊಂದಲಕ್ಕೆ ಸಿಲುಕ್ಕಿದ್ದಾರೆ. ಇದಕ್ಕೆ ತಜ್ಞರ ಉತ್ತರ ಬೇಡ ಎಂಬುದೇ ಆಗಿದೆ. ಇದು ಮನೆ ಹುಡುಕಲು, ನಿಮಗೆ ಹೊಂದುವ ಬೆಲೆಯನ್ನು ಪಡೆಯಲು ಮತ್ತು ಗೃಹ ಸಾಲದ ಮೇಲಿನ ಬಡ್ಡಿ ದರ ಕಡಿಮೆಯಾಗುವ ಸಮಯ. ಹೀಗಾಗಿ ನಿಮ್ಮ ಪ್ರಾಪರ್ಟಿ ಪರಿಶೀಲನೆ ಕಾರ್ಯತಂತ್ರ ಹೇಗಿರಬೇಕು ಎಂಬುದನ್ನು ಇಲ್ಲಿ ನೀಡಲಾಗಿದೆ.
ಪರಿಶೀಲನೆ ಆರಂಭ
ಮೊದಲನೇದಾಗಿ ಸರಕಾರದ ನೀತಿ ಮತ್ತು ಅದರ ಪರಿಣಾಮ ಇನ್ನಷ್ಟೇ ಸ್ಪಷ್ಟವಾಗಬೇಕಿದೆ. ಆದಾಗ್ಯೂ, ಸರಕಾರದ ಉದ್ದೇಶದ ಬಗ್ಗೆ ಸ್ಪಷ್ಟನೆ ಸಿಕ್ಕಿದೆ. ಸ್ವಂತ ವಾಸ್ತವ್ಯ ಹೂಡುವವರಿಗೆ ಯಾವುದೇ ಸಮಸ್ಯೆ ನೋಟು ರದ್ಧತಿಯಿಂದ ಆಗುವುದೇ ಇಲ್ಲ. ಆದ್ದರಿಂದ ರಿಟೇಲ್ ಖರೀದಿದಾರರಿಗೆ ಲಾಭ ಆಗಲಿದೆ ಎಂಬುದರಲ್ಲಿ ಸಂದೇಹವಿಲ್ಲ. ಒಂದೊಮ್ಮೆ ನೀವು ಯಾವ ಮನೆ ಎಂದು ಪರಿಶೀಲನೆ ಮಾಡಿ ಸಿದ್ಧರಾಗಿದ್ದು, ಮನೆ ಆಯ್ಕೆಯ ಬಗ್ಗೆಯೂ ಅಂತಿಮ ತೀರ್ಮಾನ ತೆಗೆದುಕೊಂಡಿದ್ದರೆ ಮುಂದುವರಿಯುವುದು ಸೂಕ್ತ ಎಂದು ತಜ್ಞರು ಹೇಳುತ್ತಾರೆ.
ಆ್ಯಪ್ ನೆರವು
ಪ್ರಾಪರ್ಟಿ ಖರೀದಿಯನ್ನು ಸದ್ಯದ ಮಟ್ಟಿಗೆ ತಡೆ ಹಿಡಿದಿದ್ದೀರಿ. ಅದಕ್ಕೆ ಕಾರಣವೆಂದರೆ ಖಚಿತವಾಗಿಯೂ ಬೆಲೆ ಇಳಿಕೆಯಾಗುತ್ತದೆ ಎಂಬುದಾಗಿರುತ್ತದೆ ಎಂದಿಟ್ಟುಕೊಳ್ಳೋಣ. ಆಗ ನೀವು ಖರೀದಿಸಲು ಬಯಸುವ ನಿಮ್ಮ ಆಯ್ಕೆಯ ಪ್ರಾಪರ್ಟಿಯನ್ನು ಪಟ್ಟಿ ಮಾಡಿಕೊಳ್ಳಿ. ಇದಕ್ಕಾಗಿ ಮ್ಯಾಜಿಕ್ಬ್ರಿಕ್ಸ್ ಡಾಟ್ ಕಾಂನಲ್ಲಿ ಪರಿಶೀಲನೆ ನಡೆಸಿ. ಇದರಲ್ಲಿರುವ ಪ್ರೈಸ್ ಅಲರ್ಟ್ನ್ನು ಸ್ಮಾರ್ಟ್ಫೋನ್ಗೆ ಅಳವಡಿಸಿಕೊಳ್ಳಿ. ಇದು ಶೇರು ಮಾರುಕಟ್ಟೆಯಲ್ಲಿ ಶೇರುಗಳ ಬೆಲೆಯ ಬಗ್ಗೆ ಅಲರ್ಟ್ ಮಾಡುವಂತೆ ಪ್ರಾಪರ್ಟಿ ಬೆಲೆಯ ಬಗ್ಗೆಯೂ ಮಾಹಿತಿ ನೀಡುತ್ತದೆ. ಅಂದರೆ ನೀವು ಎಷ್ಟು ಬೆಲೆಯಿದ್ದರೆ ಖರೀದಿ ಮಾಡುತ್ತೀರಿ ಎಂಬುದನ್ನು ಇದಕ್ಕೆ ಫೀಡ್ ಮಾಡಿದರೆ ಮ್ಯಾಜಿಕ್ಬ್ರಿಕ್ಸ್ ಡಾಟ್ ಕಾಂ, ಆ ಬೆಲೆಯನ್ನು ತಲುಪಿದ ಕೂಡಲೇ ನಿಮ್ಮನ್ನು ಅಲರ್ಟ್ ಮಾಡುತ್ತದೆ.
ಗೃಹ ಸಾಲ
ಇನ್ನು ಗೃಹ ಸಾಲದ ಬಡ್ಡಿ ದರವು ಕೂಡ ಮಹತ್ವದ ಪಾತ್ರ ವಹಿಸುತ್ತದೆ. ಗೃಹ ಸಾಲ ಸಾಮಾನ್ಯವಾಗಿ 15ರಿಂದ 20 ವರ್ಷ ಅವಧಿಯದ್ದಾಗಿದ್ದು, ಬಡ್ಡಿಯಲ್ಲಿ 25 ಪೈಸೆ ಕಡಿಮೆಯಾದರೂ ದೀರ್ಘಾವಧಿಯಲ್ಲಿ ಐದರಿಂದ ಆರು ಲಕ್ಷ ರೂ. ಬಡ್ಡಿ ಉಳಿತಾಯವಾಗುತ್ತದೆ. ಆದ್ದರಿಂದ ಗೃಹ ಸಾಲದ ಬಡ್ಡಿ ಇಳಿಕೆಯಾಗುವವರೆಗೆ ಕಾದು ಬಳಿಕ ಮನೆ ಖರೀದಿಸಬೇಕು ಎಂದಿದ್ದರೂ, ಈಗಲೇ ಪರಿಶಾಲನೆ ನಡೆಸುವುದು ಅತ್ಯಗತ್ಯ (ಬಾಕ್ಸ್ ಬಡ್ಡಿ ದರ ನೀಡಲಾಗಿದೆ). ಯಾವ ಬ್ಯಾಂಕ್ ಬಡ್ಡಿ ನಿಮ್ಮ ನಿರೀಕ್ಷೆಯ ಮಟ್ಟದಲ್ಲಿದೆಯೋ ಆ ಬ್ಯಾಂಕ್ ಜೊತೆಗೆ ಚೌಕಾಸಿ ಆರಂಭಿಸಿ. ಸದ್ಯದ ಮಟ್ಟಿಗೆ ಬ್ಯಾಂಕುಗಳಿಗೆ ಹಣ ದೊಡ್ಡ ಪ್ರಮಾಣದಲ್ಲಿ ಹರಿದು ಬಂದಿದೆ. ಒಮ್ಮೆ ಪರಿಸ್ಥಿತಿ ಪೂರ್ಣ ಹತೋಟಿಗೆ ಬಂದರೆ ಖಚಿತವಾಗಿಯೂ ಬಡ್ಡಿ ಇಳಿಕೆ ಮಾಡುತ್ತವೆ.
ಡೌನ್ ಪೇಮೆಂಟ್
ಮಾರ್ಜಿನ್ ಮನಿಗೆ ಬೇಕಾದ ಹಣವನ್ನು ನೀವೇ ಹೊಂದಿಸಿಕೊಳ್ಳಬೇಕಾಗುತ್ತದೆ. ಇದು ಸುಮಾರು ಒಟ್ಟು ಮೌಲ್ಯದ ಶೇ. 20ರಷ್ಟಿರುತ್ತದೆ. ಇದಕ್ಕಾಗಿ ಮೊದಲೇ ಉಳಿತಾಯ ಮಾಡಿ ಸಿದ್ಧತೆ ಮಾಡಿಕೊಂಡಿದ್ದರೆ ಆಗ ಯಾವುದೇ ಸಮಸ್ಯೆ ಇರುವುದಿಲ್ಲ. ಬ್ಯಾಂಕುಗಳು ಶೇ. 80ರಿಂದ ಶೇ. 90ರಷ್ಟು ಮಾತ್ರ ಸಾಲ ನೀಡುತ್ತವೆ ಎಂಬುದು ನೆನಪಿರಲಿ.
ಬಾಡಿಗೆ ಆದಾಯ
ಒಂದು ವೇಳೆ ಹೂಡಿಕೆ ಉದ್ದೇಶದಿಂದ ಮನೆ ಖರೀದಿ ಮಾಡಿದ್ದರೆ, ಅದರಿಂದ ಬಾಡಿಗೆ ಬಂದರೆ ಮಾತ್ರ ನಿಮ್ಮ ಖರೀದಿ ಸಾರ್ಥಕ ಎನ್ನಬಹುದು. ಆದ್ದರಿಂದ ಯಾವ ಪ್ರದೇಶದಲ್ಲಿ ಮನೆ ಖರೀದಿ ಮಾಡುತ್ತೀರಿ ಅಲ್ಲಿ ಎಷ್ಟು ಬಾಡಿಗೆ ಆದಾಯ ಬರಬಹುದು ಎಂಬುದನ್ನು ಅಧ್ಯಯನ ಮಾಡಿಯೇ ಮುಂದುವರಿಯಬೇಕು.
ಗೃಹ ಸಾಲದ ಮೇಲಿನ ಬಡ್ಡಿ
ಪ್ರಮುಖ ಬ್ಯಾಂಕುಗಳ ಗೃಹ ಸಾಲದ ಮೇಲಿನ ಬಡ್ಡಿ ದರವನ್ನು ಇಲ್ಲಿ ನೀಡಲಾಗಿದೆ.
ಬ್ಯಾಂಕು ಹೆಸರು ಬಡ್ಡಿ ದರ (ಶೇ)
ಎಸ್ಬಿಐ 9.15
ಇಂಡಿಯಾ ಬುಲ್ಸ್ 9.15
ಎಚ್ಡಿಎಫ್ಸಿ 9.15
ಆ್ಯಕ್ಸಿಸ್ ಬ್ಯಾಂಕ್ 9.15
ಐಸಿಐಸಿಐ 9.20
ಕೊಟಕ್ ಮಹೀಂದ್ರಾ 9.25
ಸಿಟಿ ಬ್ಯಾಂಕ್ 9.30
ಸ್ಟ್ಯಾಂಡರ್ಡ್ ಚಾರ್ಟರ್ಡ್ 9.25
ಡಿಎಚ್ಎಫ್ಎಲ್ 9.35
ಎಚ್ಎಸ್ಬಿಸಿ 9.35
ಐಡಿಬಿಐ 9.45
ಯುಬಿಐ 9.55
ಕೆನರಾ ಬ್ಯಾಂಕ್ 9.55
ಯೆಸ್ ಬ್ಯಾಂಕ್ 9.60
ಬ್ಯಾಂಕ್ ಆಫ್ ಇಂಡಿಯಾ 9.70