ಚಿಕ್ಕ ಮನೆಯ ನ್ಯೂನತೆ ನಿವಾರಣೆಗೆ ಚೊಕ್ಕ ವ್ಯವಸ್ಥೆ

ಮನೆಯಲ್ಲಿ ಜಾಗ ಕಡಿಮೆಯಿದ್ದರೆ ಅಂದರೆ ಸ್ಡುಡಿಯೋ ಅಪಾರ್ಟ್‌ಮೆಂಟ್‌ ಆಗಿದ್ದರೆ ಪೀಠೋಪಕರಣ ಸೇರಿದಂತೆ ಆಕ್ಸೆಸರಿಗಳನ್ನು ಸುಲಭವಾಗಿ ತುಂಬಬಹುದು ಎಂಬ ಗ್ರಹಿಕೆ ಸಾಮಾನ್ಯವಾಗಿದೆ. ಆದರೆ ಹೀಗೆ ಮಾಡಿದರೆ ಜಾಗ ಮತ್ತಷ್ಟು ಇಕ್ಕಟ್ಟಾಗಬಹುದು. ಹಾಗಾಗಿ ಎಷ್ಟು ಬೇಕೋ ಅಷ್ಟನ್ನು ಮಾತ್ರ ತುಂಬಬೇಕು. ಜೊತೆಗೆ ಅನಿವಾರ್ಯತೆ ಮತ್ತು ಅವಶ್ಯಕತೆಗಳು ಹಲವು ಇರುವುದರಿಂದ ಇಂತಹ ಚಿಕ್ಕ ಮನೆಗಳ ಅಲಂಕಾರವೂ ಕೂಡ ತುಂಬಾ ಕಷ್ಟವಾಗುತ್ತದೆ.

ಸ್ಟುಡಿಯೋ ಮನೆ: ಸ್ಟುಡಿಯೋ ಅಪಾರ್ಟ್‌ಮೆಂಟ್‌ ಎಂದರೆ ಒಂದು ಕೊಠಡಿಯೇ ಸರ್ವವೂ ಆಗಿರುವ ಮನೆ. ಲೀವಿಂಗ್‌ ರೂಂ, ಕಿಚನ್‌, ಬೆಡ್‌ರೂಂ ಹೀಗೆ ಬಹು ಕೆಲಸಗಳು ಎಲ್ಲವೂ ಇರುವ ಒಂದೇ ಕೊಠಡಿಯಲ್ಲಿ ಆಗಬೇಕಾಗುತ್ತದೆ. ಇದಕ್ಕೆ ಅಟಾಚ್ಡ್‌ ಬಾತ್‌ ರೂಂ ಕೂಡ ಇರುತ್ತದೆ. ಚಿಕ್ಕದಾಗಿದ್ದರೂ ಇದನ್ನು ವ್ಯವಸ್ಥಿತವಾಗಿಟ್ಟರೆ, ಆರಾಮವಾಗಿ ಟೆಲಿವಿಷನ್‌ ನೋಡುತ್ತಾ ಇದೇ ಮನೆಯಲ್ಲಿ ಎಂಜಾಯ್‌ ಮಾಡಬಹುದು. ಬುಕ್‌ ಶೆಲ್ಫ್‌ ಅಳವಡಿಸಿ ಕೈ ಚಾಚುವಾಗಲೇ ಪುಸ್ತಕ ಸಿಗುವಂತೆ ಮಾಡಿಕೊಳ್ಳಬಹುದು. ಇಂತಹ ಮನೆಗಳಲ್ಲಿ ಸಾಮಾನ್ಯವಾಗಿ ಏಕಾಂಗಿ ಜೀವನ ನಡೆಸುವವರು ವಾಸಿಸುತ್ತಾರೆ. ಇದರ ವಿಸ್ತೀರ್ಣ ಸರಾಸರಿ 400ರಿಂದ 500 ಚದರ ಅಡಿ ಇರುತ್ತದೆ.

ಪೀಠೋಪಕರಣಕ್ಕೆ ಪ್ಲಾನ್‌: ಮೊದಲನೇದಾಗಿ ಇಷ್ಟು ಚಿಕ್ಕದಾಗಿರುವ ಮನೆಯಲ್ಲಿ ಎಷ್ಟು ಫರ್ನಿಚರ್‌ ಹಾಕಬೇಕು ಎಂಬುದನ್ನು ನಿರ್ಧರಿಸಬೇಕು. ದೊಡ್ಡ ಬುಕ್‌ ಕೇಸ್‌, ವಿಸ್ತಾರವಾದ ಸೋಫಾ ಅಥವಾ ಡೈನಿಂಗ್‌ ಟೇಬಲ್‌ ಬೇಡವೇ ಬೇಡ. ಅಂದರೆ, ಇರುವ ಜಾಗದ ವಿಸ್ತಾರಕ್ಕೆ ಅದು ಹೊಂದಿಕೊಳ್ಳುವ ಗಾತ್ರವನ್ನು ಹೊಂದಿರಬೇಕು. ಇದರ ಜೊತೆಗೆ ಒಂದೊಂದು ಫರ್ನಿಚರ್‌ ಕೆಲಸಕ್ಕೆ ಬರುವಂತಿರಬೇಕು. ಸ್ಟೋರೇಜ್‌ನ್ನು ತುಂಬಾ ಜಾಣ್ಮೆಯಿಂದ ಪ್ಲಾನ್‌ ಮಾಡಬೇಕು.

ಈ ಮೂಲಕ ಚಿಕ್ಕ ಜಾಗದಲ್ಲೇ ಸ್ಟೋರೇಜ್‌ಗೂ ಅವಕಾಶ ಇರಬೇಕು. ಹಾಗೆಂದು ಜಾಗ ಇಕ್ಕಟ್ಟಾಗಿರಬಾರದು. ಮೊದಲನೇದಾಗಿ ಏನೆಲ್ಲಾ ಸಂಗ್ರಹಸಬೇಕು ಎಂಬುದರ ಪಟ್ಟಿ ತಯಾರಿಸಿ. ಅಂದರೆ ಬಟ್ಟೆ, ಪುಸ್ತಕ, ಅಡುಗೆ ಸಾಮಗ್ರಿಗಳಿಗೆ ಇದರಲ್ಲಿ ಮೊದಲ ಸ್ಥಾನ ಇರಲಿ. ಬಾತ್‌ ರೂಂಗೆ ಸಮೀಪದಲ್ಲಿ ಬಿಲ್ಟ್‌ ಇನ್‌ ಕಬೋರ್ಡ್‌ ಇರಲಿ. ಇಂತಹ ಕಬೋರ್ಡ್‌ ಸ್ವಲ್ಪ ಆಳವಾಗಿರುವಂತೆ ನೋಡಿಕೊಳ್ಳುವ ಮೂಲಕ ಪುಸ್ತಕವನ್ನು ಕೂಡ ಅದರಲ್ಲಿ ಇಡಲು ಸಾಧ್ಯವಾಗುತ್ತದೆ.

ಹಲವು ಅಂಶಗಳು: ಹೊಸ ಯಾವುದಾದರೂ ವಸ್ತುಗಳನ್ನು ಖರೀದಿಸುವುದಿದ್ದರೆ ಅವುಗಳಿಂದ ಹಲವು ಕೆಲಸಗಳು ಆಗುವಂತಿರಬೇಕು. ಉದಾಹರಣೆಗೆ ಸ್ಟೋರೇಜ್‌ಗೆ ಅವಕಾಶವಿರುವ ಸೆಂಟರ್‌ ಟೇಬಲ್‌ ಇತ್ಯಾದಿಗಳನ್ನು ತೆಗೆದುಕೊಳ್ಳಿ. ಎದುರುಗಡೆ ಸಾಧ್ಯವಾದಷ್ಟು ಲೋ-ಫ್ಲೋರ್‌ ಫರ್ನೀಚರ್‌ ಇರಲಿ. ಒಂದೆರಡು ಮ್ಯಾಟ್ರೆಸ್‌ ಇದ್ದರೆ ಕುಳಿತುಕೊಳ್ಳಲು ಆಗುತ್ತದೆ, ಮಲಗಲು ಕೂಡ ಆರಾಮವಾಗಿರುತ್ತದೆ. ಸ್ಟೂಲ್‌ನ್ನು ಎಂಡ್‌ ಟೇಬಲ್‌ ಆಗಿ ಕೂಡ ಬಳಸಬಹುದು. ಟ್ರಂಕ್‌ ಖರೀದಿಸಿ ಅದರಲ್ಲಿ ಬಟ್ಟೆ, ಬ್ಲಾಂಕೆಟ್‌ ಇಡಬಹುದು. ಇದನ್ನು ಕಾಫಿ ಟೇಬಲ್‌ನಂತೆ ಬಳಸಬಹುದು.

ಸರಿಯಾದ ಜಾಗ: ಇನ್ನು ಎಷ್ಟು ಜಾಗವಿದೆ ಎಂಬುದನ್ನು ನೋಡಿಕೊಂಡೇ ಗ್ಯಾಜೆಟ್‌ ಖರೀದಿ ಕೂಡ ಮಾಡಬೇಕು. ಉದಾಹರಣೆಗೆ ಚಿಕ್ಕ ಅಂಡರ್‌ ಕೌಂಟರ್‌ ಫ್ರಿಜ್‌ ಇದ್ದರೆ ಸಾಕಾಗುತ್ತದೆ. ಮ್ಯೂಸಿಕ್‌ ಸಿಸ್ಟಂನ್ನು ವಾಲ್‌ ಶೆಲ್ಫ್‌ನಲ್ಲಿ ಇಡಬಹುದು. ಅದನ್ನು ಟೆಲಿವಿಷನ್‌ ಮೇಲೆ ಅಳವಡಿಸಿಕೊಳ್ಳಿ. ಇಕ್ಕಟ್ಟಾಗುವುದನ್ನು ತಪ್ಪಿಸಲು ಗೋಡೆಯನ್ನು ಎಷ್ಟು ಸಾಧ್ಯವೋ ಅಷ್ಟು ಬಳಕೆ ಮಾಡಿಕೊಳ್ಳಬೇಕು. ವಾಲ್‌ ಮೌಂಟ್‌ ಫೋನ್‌ ಹೋಲ್ಡರ್‌, ಹೋಲ್ಡರ್‌, ಬುಕ್‌ ಶೆಲ್ಫ್‌, ಕ್ರೂಕರಿ ಕಬೋರ್ಡ್‌ ಮಾಡಿಕೊಂಡರೆ ಅಷ್ಟರ ಮಟ್ಟಿಗೆ ನೆಲದಲ್ಲಿ ಅದು ಜಾಗ ಆಕ್ರಮಿಸಿಕೊಳ್ಳುವುದು ಕಡಿಮೆಯಾಗುತ್ತದೆ. ಈ ರೀತಿಯಲ್ಲಿ ನೆಲದಲ್ಲಿ ಜಾಗ ಸಾಕಷ್ಟು ಉಳಿದಿರುವಂತೆ ನೋಡಿಕೊಳ್ಳಿ.

ಕ್ಯಾಶುವಲ್‌ ಲುಕ್‌: ಕಯರ್‌ ಮ್ಯಾಟ್‌ ಅಥವಾ ಕಾಟನ್‌ ಮ್ಯಾಟ್‌ಗಳು ಇಡೀ ಮನೆಗೆ ಹೊಸತನವನ್ನು ನೀಡಲು ನೆರವಾಗುತ್ತದೆ. ಅದರಲ್ಲೂ ಮುಖ್ಯವಾಗಿ ಗೆಳೆಯರು ನಿಯಮಿತವಾಗಿ ಭೇಟಿ ನೀಡುತ್ತಿದ್ದರೆ ಇದು ಇರಬೇಕು. ಪಾರ್ಟಿಶನ್‌ಗೆ ಕೂಡ ವಿನೂತನ ಮಾದರಿಯನ್ನು ಅನುಸರಿಸಿ. ಪೇಪರ್‌, ವುಡ್‌ ಸ್ಕ್ರೀನ್‌, ಡ್ರಾಪ್‌ಗಳನ್ನು ಬಳಸಿ ಮಲಗುವ ಜಾಗವನ್ನು ಪ್ರತ್ಯೇಕವಾಗಿಸಿ. ಇದಲ್ಲದೆ ಫರ್ನಿಚರ್‌ ಅಥವಾ ಪಾಟೆಡ್‌ ಪ್ಲಾಂಟ್‌ಗಳ ಮೂಲಕ ಕೂಡ ಪಾರ್ಟಿಶನ್‌ ಮಾಡಿಕೊಳ್ಳಬಹುದು. ಇನ್ನು ಕೊಠಡಿಗೆ ಒಂದೇ ಬಣ್ಣ ಇದ್ದರೆ, ಹಲವು ಬಣ್ಣಗಳಿಂದಾಗಿ ಇಕ್ಕಟ್ಟು ಹೆಚ್ಚಾದಂತೆ ಕಾಣುವುದು ತಪ್ಪುತ್ತದೆ.