ವಿದ್ಯುತ್ ಕಡಿತಕ್ಕೆ ಸೋಲಾರ್ ಪರಿಹಾರ

ಬೇಸಗೆ ಬಂದರೆ ಲೋಡ್‌ ಶೆಡ್ಡಿಂಗ್‌. ಇದು ಎಲ್ಲೆಡೆ ಕಂಡು ಬರುವ ಸಮಸ್ಯೆ. ಜತೆಗೆ ವಿದ್ಯುತ್‌ ಬಿಲ್‌ ಕೂಡ ದುಬಾರಿ. ಇದಕ್ಕೆ ಪರ್ಯಾಯವೆಂದರೆ ನಮ್ಮ ಮನೆಯಲ್ಲಿ ನಾವೇ ವಿದ್ಯುತ್‌ ಉತ್ಪಾದಿಸಿಕೊಳ್ಳುವುದು.

ಅಪಾರ್ಟ್‌ಮೆಂಟ್‌ ಖರೀದಿದಾರರು ಇತ್ತೀಚಿಗೆ ಸೌರ ವಿದ್ಯುತ್‌ ಇದೆಯಾ ಎಂದು ಬಿಲ್ಡರ್‌ಗಳಲ್ಲಿ ವಿಚಾರಿಸುತ್ತಿದ್ದಾರೆ. ಬಿಲ್ಡರ್‌ಗಳು ಅದು ಕೂಡ ಮನೆಯಲ್ಲಿ ನೀಡುವ ಸೌಲಭ್ಯಗಳಲ್ಲಿ ಒಂದು ಎಂದು ಹೇಳುತ್ತಾರೆ. ಹಾಗಾದರೆ ಸೌರ ವಿದ್ಯುತ್‌ ಬಗ್ಗೆ ಯಾಕೆ ಇಷ್ಟು ಆಸ್ಥೆ ಎಂಬ ಪ್ರಶ್ನೆ ಸಹಜವಾಗಿಯೇ ಉದ್ಭವಿಸುತ್ತದೆ. ಒಂದು ಬಾರಿಯ ಹೂಡಿಕೆಯಿಂದ ಆಗುವ ಸಾಕಷ್ಟು ಲಾಭವೇ ಸೋಲಾರ್‌ ವಿದ್ಯುತ್‌ನತ್ತ ಹೆಚ್ಚು ಒಲವು ಹರಿಯಲು ಕಾರಣ.

ನಿರಂತರ ವಿದ್ಯುತ್‌
ಸೌರ ವಿದ್ಯುತ್‌ನಿಂದಾಗಿ ರಾಜ್ಯ ವಿದ್ಯುತ್‌ ನಿಗಮಕ್ಕೆ ಅವಲಂಬಿತವಾಗುವ ಪ್ರಮಾಣದಲ್ಲಿ ಸಾಕಷ್ಟು ಕಡಿಮೆಯಾಗಿರುವ ಬೆಂಗಳೂರಿನ ಎಲ್ಲೆಡೆ ಕಂಡು ಬರುತ್ತಿದೆ. ಏರ್‌ ಕಂಡೀಷನರ್‌, ಮಿಕ್ಸರ್‌, ವಾಶಿಂಗ್‌ ಮೆಶಿನ್‌, ಡಿಶ್‌ ವಾಶರ್‌ ಸೇರಿದಂತೆ ಜೀವನಶೈಲಿಯಲ್ಲಿ ಅಳವಡಿಸಿಕೊಂಡಿರುವ ಎಲ್ಲಾ ಗ್ಯಾಜೆಟ್‌ಗಳನ್ನು ಸೌರ ವಿದ್ಯುತ್‌ನಿಂದಲೇ ಚಾಲೂ ಮಾಡಲು ಸಾಧ್ಯವಿದೆ.

ಸೌರ ವಿದ್ಯುತ್‌ ಫಲಕ
ಅಪಾರ್ಟ್‌ಸಂಕೀರ್ಣವಾಗಲಿ, ಸ್ವತಂತ್ರ ಮನೆಯಾಗಲಿ ನೈಸರ್ಗಿಕ ಬೆಳಕಿಗಾಗಿ ನೇರವಾಗಿ ಸೂರ್ಯನ ಬೆಳಕು ಬೀಳಬೇಕಾದ ಕೇಂದ್ರ ಭಾಗವನ್ನು ಇಟ್ಟರೆ ಇಡೀ ಛಾವಣಿಯ ಟೆರೇಸ್‌ನಲ್ಲಿ ಸೋಲಾರ್‌ ಫಲಕಗಳನ್ನು ಅಳವಡಿಸಬಹುದು. ಇದರಿಂದ ಇಡೀ ನಿವಾಸಿಗರ ವಿದ್ಯುತ್‌ ಅವಶ್ಯಕತೆಯನ್ನು ಪೂರೈಸುತ್ತದೆ. ಫೋಟೋವೊಲ್ಟಿಕ್‌ ಸೆಲ್‌ಗಳು, ಇನ್‌ವರ್ಟರ್‌ಗಳು ದಿನ ಪೂರ್ತಿ ಉತ್ಪಾದನೆಯಾದ ವಿದ್ಯುತ್‌ನ್ನು ಸಂಗ್ರಹಿಸಿಡುತ್ತದೆ. ಇದರ ಫಲವಾಗಿ ಇಲ್ಲಿ ನಿರಂತರ ವಿದ್ಯುತ್‌ ಇದೆ. ಆದರೆ ವಿದ್ಯುತ್‌ ಬಿಲ್‌ ಮಾತ್ರ ಪಾವತಿ ಮಾಡಬೇಕಾಗಿಲ್ಲ.

ಸಾಮಾನ್ಯವಾಗಿ ಮಧ್ಯಾಹ್ನದ ಬಳಿಕ ವಿದ್ಯುತ್‌ ಬೇಡಿಕೆ ಕಡಿಮೆಯಿರುತ್ತದೆ. ಆಗ ಆನ್‌ಗ್ರಿಡ್‌ ಇನ್‌ವರ್ಟರ್‌ ಉತ್ಪಾದಿಸುವ ವಿದ್ಯುತ್‌ನ್ನು ಚಾರ್ಜಿಂಗ್‌ ಬ್ಯಾಟರಿಗಳಲ್ಲಿ ಸಂಗ್ರಹಿಸಬಹುದಾಗಿದೆ. ಇನ್ನು ನೀರಿನ ಪಂಪ್‌ನ್ನು ಬೆಳಗ್ಗೆ 11 ಗಂಟೆಯಿಂದ ಸಂಜೆ 4 ಗಂಟೆಯೊಳಗೆ ಚಾಲೂ ಮಾಡಿದರೆ ಅದರಿಂದಲೂ ವಿದ್ಯುತ್‌ ಸಂಗ್ರಹವನ್ನು ಕಾಪಾಡಲು ಸಾಧ್ಯ. ಇನ್ನು ಇನ್ವರ್ಟರ್‌ ಮತ್ತು ಬ್ಯಾಟರಿಗೆ 10 ವರ್ಷಗಳ ಕಾಲ ನಿರ್ವಣೆಯನ್ನು ಉಚಿತವಾಗಿ ಹಲವು ಸಂಸ್ಥೆಗಳು ಮಾಡುತ್ತವೆ.