ವಾರ್ಡ್‌ರೋಬ್‌ ಕೂಡ ಈಗ ಮಾಡರ್ನ್

ಆಧುನಿಕತೆ ವಾರ್ಡ್‌ರೋಬ್‌ಗೂ ಕಾಲಿಟ್ಟಿದೆ. ಹೊಸ ರೂಪದೊಂದಿಗೆ ವಾಕ್‌-ಇನ್‌ ಕ್ಲೋಸೆಟ್‌ ಹೆಸರಿನಲ್ಲಿ ಬಂದಿದೆ. ಅತ್ತಿತ್ತ ಅಡ್ಡಾಡುತ್ತಾ ಮನಸ್ಸಿಗೆ ಒಪ್ಪಿದ ಉಡುಪನ್ನು ತೆಗೆದುಕೊಳ್ಳಲು ಸಾಧ್ಯವಾಗುವಂತ ವಾರ್ಡ್‌ ವಿನ್ಯಾಸ ಎಂದು ಇದನ್ನು ವಿಸ್ತೃತ ರೂಪದಲ್ಲಿ ಹೇಳಬಹುದು. ಅಂತಹ ಹೊಸ ವಾರ್ಡ್‌ರೋಬ್‌ ಬಗ್ಗೆ ಒಂದಿಷ್ಟು ವಿವರ ಇಲ್ಲಿದೆ.

ಒಳಾಂಗಣ ವಿನ್ಯಾಸದ ಟ್ರೆಂಡ್‌ ಸದಾ ಬದಲಾಗುತ್ತಲೇ ಇರುತ್ತದೆ. ಅಂದ, ಆರಾಮ ಇದರ ಮೂಲ ಮಂತ್ರ. ಮನೆಯ ಒಳಾಂಗಣದ ಇತ್ತೀಚಿನ ಹೊಸ ಟ್ರೆಂಡ್‌ ಅಂದರೆ ವಾಕ್‌-ಇನ್‌ ಕ್ಲೋಸೆಟ್‌. ಸಾಂಪ್ರದಾಯಿಕ ವಾರ್ಡ್‌ರೋಬ್‌ಗಿಂತ ಕಡಿಮೆ ಜಾಗ ಆಕ್ರಮಿಸಿಕೊಳ್ಳುವುದರ ಜೊತೆಗೆ ನೋಡಲು ಆಕರ್ಷಕವಾಗಿರುವುದು ಹಾಗೂ ಪರಿಣಾಮಕಾರಿಯಾಗಿ ಬಟ್ಟೆ ಬರೆಗಳನ್ನು ಇಡಲು ಸಾಧ್ಯವಾಗುವುದು ಇದಕ್ಕೆ ಮುಖ್ಯ ಕಾರಣ.

ನೆರವು ಹಲವು: ಡ್ರಾಯರ್‌, ಶೆಲ್ಫ್‌ಗಳು, ಶೂ ರಾರ‍ಯಕ್‌, ಬೆಲೆ ಬಾಳುವ ವಸ್ತುಗಳನ್ನು ಕಾದಿರಿಸಲು ಸಾಕಷ್ಟು ಜಾಗ ಇದರಲ್ಲಿರುವುದೇ ಈ ವಿನ್ಯಾಸ ಹೆಚ್ಚು ಜನ ಮನ್ನಣೆ ಪಡೆಯಲು ಕಾರಣ. ಹ್ಯಾಂಡ್‌ ಬ್ಯಾಗ್‌ನಲ್ಲಿರುವ ಎಲ್ಲಾ ವಸ್ತುಗಳು, ಬೆಲ್ಟ್‌, ಕ್ಯಾಪ್‌, ಜ್ಯುವೆಲ್ಲರಿ, ಪಾದರಕ್ಷೆ ಹೀಗೆ ಎಲ್ಲವನ್ನೂ ಒಂದೇ ಜಾಗದಲ್ಲಿಡುವಂತೆ ಮಾಡುವಲ್ಲಿ ವಾಕ-ಇನ್‌ ಕ್ಲೋಸೆಟ್‌ ನೆರವಾಗುತ್ತದೆ.

ವಾಕ್‌-ಇನ್‌ ಕ್ಲೋಸೆಟ್‌ನ ಸಾಮಾನ್ಯ ಲಕ್ಷಣಗಳೆಂದರೆ ಸೂಕ್ತ ಡ್ರಾಯರ್‌, ಶೆಲ್ಫ್‌ಗಳು, ಎತ್ತರದಲ್ಲಿರುವ ಇಸ್ತ್ರಿ ಮಾಡುವ ಬೋರ್ಡ್‌, ಬಟ್ಟೆಯನ್ನು ತೂಗಿ ಹಾಕಲು ಸಾಕಷ್ಟು ಹ್ಯಾಂಗಿಂಗ್‌ ರಾಡ್‌, ಕಬೋರ್ಡ್‌, ಬೆಲ್ಟ್‌ ಟೈ ರಾರ‍ಯಕ್‌ ಮೊದಲಾದವುಗಳು. ಇನ್ನು ಫ್ಲೋಟಿಂಗ್‌ ಶೆಲ್ಫ್‌ಗಳು ಅಥವಾ ಬಿಲ್ಟ್‌ ಇನ್‌ ಕ್ಯುಬಿಕಲ್‌ ಕೂಡ ಇದರಲ್ಲಿರುತ್ತದೆ. ಈ ಮೂಲಕ ಸುಲಭವಾಗಿ ಬಟ್ಟೆಗಳನ್ನು ವ್ಯವಸ್ಥಿತವಾಗಿ ಜೋಡಿಸಿ ಇಡಲು ಸಾಧ್ಯವಾಗುತ್ತದೆ. ಇನ್ನು ಸುಂದರವಾದ ವಾಕ್‌-ಇನ್‌ಗಳಲ್ಲಿ ಗಾಜಿನ ಮುಂಭಾಗ ಇರುವ ಡ್ರಾಯರ್‌, ಸಿ-ಥ್ರೂ ವಯರ್‌ ಬಿನ್‌, ಸೀಟಿಂಗ್‌, ಶಟ್ಟರ್‌ ನಾಬ್‌ ಮೊದಲಾದವುಗಳು ಇರುತ್ತವೆ.

ಬೆಳಕಿನ ವ್ಯವಸ್ಥೆ: ವಾಕ್‌-ಇನ್‌ನ ಮತ್ತೊಂದು ಪ್ರಮುಖ ಅವಶ್ಯಕತೆಯೆಂದರೆ ಸೂಕ್ತ ಬೆಳಕಿನ ವ್ಯವಸ್ಥೆ. ಇದರ ಪ್ರತಿ ವಾರ್ಡ್‌ರೋಬ್‌ ಕೂಡ ಪ್ರತ್ಯೇಕ ಬಾಗಿಲು ಹೊಂದಿರುತ್ತದೆ. ಹೀಗಾಗಿ ಮರದ ಬಳಕೆ ಕಡಿಮೆ ಮಾಡಿ ಅಲ್ಲಿ ಚೆನ್ನಾಗಿ ಬೆಳಕು ಬರುವಂತೆ ಮಾಡಬೇಕು. ಇದಕ್ಕಾಗಿ ಕನ್ನಡಿಗಳ ಬಳಕೆ ಹೆಚ್ಚಿಸಬೇಕು. ಇವು ಬೆಳಕನ್ನು ಪ್ರತಿಫಲಿಸಿ ಇಡೀ ವಾಕ್‌-ಇನ್‌ ಇನ್ನಷ್ಟು ಬೆಳಗುವಂತೆ ಮಾಡುತ್ತದೆ. ಕೆಳಗಿನ ಡ್ರಾಯರ್‌ಗಳಿಗೆ ಬಾಗಿಲಿನ ಅಗತ್ಯವಿರುವುದಿಲ್ಲ. ಹೀಗಾಗಿ ಅವುಗಳು ತೆರೆದಿರುವಂತೆ ವಿನ್ಯಾಸಗೊಳಿಸಿದರೆ ಬೆಳಕಿನ ಕೊರತೆ ಎದುರಾಗುವುದಿಲ್ಲ. ಕಾಸ್ಮೆಟಿಕ್‌, ಹೇರ್‌ ಡ್ರೈಯರ್‌, ಕರ್ಲರ್‌ ಸೇರಿದಂತೆ ಇತರ ಪ್ರಸಾದನ ಸಾಮಗ್ರಿಗಳನ್ನು ಇಡಲು ಸಾಕಷ್ಟು ಜಾಗ ಮತ್ತು ವ್ಯವಸ್ಥೆ ಇರುವಂತೆ ನೋಡಿಕೊಳ್ಳಬೇಕು.

ಮೊದಲು ತೀರ್ಮಾನ: ಇನ್ನು ವಾಕ್‌-ಇನ್‌ ಎಷ್ಟು ದೊಡ್ಡದಿರಬೇಕು, ಎಷ್ಟು ಎತ್ತರವಿರಬೇಕು ಎಂಬುದನ್ನು ಮೊದಲೇ ತೀರ್ಮಾನಿಸಬೇಕು. ಸಾಮಾನ್ಯವಾಗಿ ಏಳು ಅಡಿಗಳಿಗಿಂತ ಹೆಚ್ಚು ಎತ್ತರವಿದ್ದರೆ ಅದರಿಂದ ವಸ್ತುಗಳನ್ನು ತೆಗೆಯಲು ಕಷ್ಟವಾಗುತ್ತದೆ. ಬೆಡ್‌ ರೂಮ್‌ನೊಳಗೆ ವಾಕ್‌-ಇನ್‌ ಇದ್ದರೆ ಚೆನ್ನ. ಇಲ್ಲವಾದರೆ ಸ್ಟೇರ್‌ಕೇಸ್‌ ಕೆಳಗಡೆ ಇರುವ ಸ್ಥಳಾವಕಾಶವನ್ನು ಕೂಡ ಸದ್ಭಳಕೆ ಮಾಡಿಕೊಳ್ಳಬಹುದು. ಆದರೂ ಬಾತ್‌ ರೂಮ್‌ಗೆ ಹೊಂದಿಕೊಂಡಿರುವ ಮಾಸ್ಟರ್‌ ಬೆಡ್‌ ರೂಮ್‌ ವಾಕ್‌-ಇನ್‌ಗೆ ಉತ್ತಮ ಪ್ರದೇಶ ಎಂದೇ ಹೇಳಬಹುದು. ಇದನ್ನು ಕೊಠಡಿಯಿಂದ ಪ್ರತ್ಯೇಕಗೊಳಿಸಲು ಬಾಗಿಲು ಇರಬಾರದು. ಈ ಮೂಲಕ ಬೆಡ್‌ ರೂಮ್‌ ಜೊತೆಗೆ ಅಡೆತಡೆಯಿಲ್ಲದೆ ಅದು ಹೊಂದಿಕೊಳ್ಳುವಂತಿರಬೇಕು.

ಗೊಂದಲ ಬೇಡ: ಇನ್ನು ಇಲ್ಲಿಡುವ ಉಡುಗೆಗಳ ಬಟ್ಟೆಗಳ ಬಣ್ಣದ ಬಗ್ಗೆಯೂ ಗೊಂದಲ ಉಂಟಾಗಬಾರದು. ಅದಕ್ಕಾಗಿ ಸೂಕ್ತ ಲೈಟಿಂಗ್‌ ವ್ಯವಸ್ಥೆ ಮಾಡಬೇಕು. ಕನ್ನಡಿಗಳ ಬಳಕೆ ಹೆಚ್ಚಿರಬೇಕು. ಕ್ಲೋಸೆಟ್‌ ಒಳಗೆ ಇರುವ ಉಡುಗೆಗಳ ಬಣ್ಣವು ಕೂಡ ಸುಲಭವಾಗಿ ಗುರುತಾಗುವಂತೆ ಬೆಳಕು ಅಲ್ಲಿ ತುಂಬಿರಬೇಕು. ಸೆಂಟರ್‌ ಸೀಲಿಂಗ್‌ ಲೈಟ್‌ನ ಜೊತೆಗೆ ಶಟರ್‌ ಓಪನ್‌ ಆದ ತಕ್ಷಣ ಸ್ವಯಂ ಚಾಲಿತವಾಗಿ ಬೆಳಗುವ ಲೈಟಿಂಗ್‌ ವ್ಯವಸ್ಥೆ ಮಾಡಬೇಕು. ಒಟ್ಟಿನಲ್ಲಿ ವಾರ್ಡ್‌ರೋಬ್‌ ಎಂಬ ಉಡುಗೆಗಳನ್ನು ತುಂಬಿಡುವ ಉಗ್ರಾಣ, ಈಗ ಹೊಸ ರೂಪದಲ್ಲಿ ವಾಕ್‌-ಇನ್‌ ಕ್ಲೋಸೆಟ್‌ ರೂಪದಲ್ಲಿ ಕಾಣಿಸಿಕೊಂಡಿದೆ. ಅನುಕೂಲ ಹಾಗೂ ಕಾರ್ಯ ನಿರ್ವಹಣೆ ಎರಡಲ್ಲೂ ಇದು ಮನೆ ಮಾಲೀಕರ ಮನ ಗೆಲ್ಲುತ್ತಿದೆ.