ಗೋವಾ ಬೀಚ್‌ನಲ್ಲಿ ಇನ್ನು ಮುಂದೆ ಮದ್ಯ ಕುಡಿಯುವಂತಿಲ್ಲ

ಗೋವಾ ಪಾರ್ಟಿ ಪ್ರಿಯರ ಸ್ವರ್ಗ. ಬೀಚ್‌ನಲ್ಲಿ ಮದ್ಯದ ಲಹರಿಯಲ್ಲಿ ವಿಹರಿಸಲೆಂದೇ ಗೋವಾ ಪ್ರಯಾಣ ಮಾಡುವವರಿಗೇನು ಕಮ್ಮಿಯಿಲ್ಲ. ಇನ್ನು ಮುಂದೆ ಈ ಸಂತೋಷಕ್ಕೆ ಬ್ರೇಕ್ ಬೀಳಲಿದೆ.

ಆಗಸ್ಟ್ 15ರ ಬಳಿಕ ಗೋವಾದಲ್ಲಿ ಸಾರ್ವಜನಿಕವಾಗಿ ಕುಡಿಯುವವರಿಗೆ ದೊಡ್ಡ ಮೊತ್ತದ ದಂಡ ಬೀಳಲಿದೆ ಎಂದು ಮುಖ್ಯಮಂತ್ರಿ ಪರಿಕ್ಕರ್‌ ಹೇಳಿದ್ದಾರೆ. ಪ್ಲಾಸ್ಟಿಕ್ ಬ್ಯಾಗ್ ಕೊಂಡೊಯ್ಯುವವರಿಗೂ ದಂಡ ಬೀಳಲಿದೆ.

ಪೂಜೆಯ ಹೆಸರಿನಲ್ಲಿ ಮಾಂಡೋವಿ ನದಿಗೆ ಹೂ ಜತೆಗೆ ಪ್ಲಾಸ್ಟಿಕ್‌ ಎಸೆದು ನದಿ ನೀರನ್ನು ಹಾಳು ಮಾಡುತ್ತಿದ್ದಾರೆ.ಅದರಲ್ಲೂ ಅರ್ಧದಷ್ಟೂ ಹೂಗಳನ್ನು ಫುಟ್‌ಪಾತ್‌ ಮೇಲೆ ಎಸೆದಿರುತ್ತಾರೆ. ಪ್ರತೀದಿನ ಸ್ವಚ್ಛ ಮಾಡಿದರೂ ಮಾರನೆಯ ದಿನ ಅದೇ ರೀತಿ ಕಸದ ರಾಶಿ ತುಂಬಿರುತ್ತದೆ. ಹೀಗಾಗುವುದನ್ನು ತಡೆಯುವ ಉದ್ದೇಶದಿಂದ ಪ್ಲಾಸ್ಟಿಕ್‌ ನಿಷೇಧಿಸಲಾಗಿದೆ.

'ಕೆಲವರು ಬೀಚ್‌ನಲ್ಲಿ ಕುಡಿದು ಅಸಭ್ಯವಾಗಿ ವರ್ತಿಸುತ್ತಾರೆ. ಇದರಿಂದ ಇತರ ಪ್ರವಾಸಿಗರಿಗೂ ಹಾಗೂ ಸ್ಥಳೀಯರಿಗೆ ತೊಂದರೆ ಉಂಟಾಗುತ್ತಿತ್ತು' ಎಂದು ಹೇಳಿದ ಅಲ್ಲಿಯ ಸ್ಥಳೀಯರೊಬ್ಬರು ಮದ್ಯ ನಿಷೇಧ ಮಾಡಿರುವುದು ಒಳ್ಳೆಯದಾಯ್ತು ಎಂಬ ಅಭಿಪ್ರಾಯ ವ್ಯಕ್ತ ಪಡಿಸಿದ್ದಾರೆ.