ಆನೆ ಕ್ಯಾಂಪ್‌ ದುಬಾರೆಯಲ್ಲಿ ರ‍್ಯಾಫ್ಟಿಂಗ್ ಅನುಭವ

ಕೊಡಗಿನ ಪ್ರಮುಖ ಆಕರ್ಷಕ ತಾಣಗಳಲ್ಲೊಂದು ದುಬಾರೆ. ಎಲಿಪೆಂಟ್‌/ಆನೆ ಕ್ಯಾಂಪ್ ಎಂದೇ ಪ್ರಸಿದ್ಧ. ದಿನದಲ್ಲಿ ನೂರಾರು ಸಂಖ್ಯೆಯಲ್ಲಿ ಪ್ರವಾಸಿಗರು ಇಲ್ಲಿಗೆ ಭೇಟಿ ನೀಡುತ್ತಾ ಇರುತ್ತಾರೆ.

ಇಲ್ಲಿ ಪ್ರವಾಸಿಗರನ್ನು ಸೆಳೆಯುತ್ತಿರುವ ಪ್ರಮುಖ ಅಂಶವೆಂದರೆ ಬೋಟಿಂಗ್, ಜಂಗಲ್‌ ಲಾಡ್ಜ್‌ ಹಾಗೂ ರಿವರ್‌ ರ‍್ಯಾಫ್ಟಿಂಗ್‌.
ಸುತ್ತ ಹಚ್ಚ ಹಸಿರಿನ ನಡುವೆ ಹರಿಯುತ್ತಿರುವ ಕಾವೇರಿ, ಇತ್ತ ಕಡೆಯಿಂದ ಆ ಕಡೆಗೆ ಬೋಟ್‌ನಲ್ಲಿ ಹೋದರೆ ಸಿಗುವ ಹತ್ತಾರು ಸಾಕಾನೆಗಳು ಇವುಗಳಿಗಿಂತ ಮಿಗಿಲಾಗಿ ರಿವರ್‌ ರ‍್ಯಾಫ್ಟಿಂಗ್ ಇಲ್ಲಿಯ ಪ್ರಮುಖ ಆಕರ್ಷಣೆಯಾಗಿದೆ.

ದುಬಾರೆಯಿಂದ ತೆಪ್ಪದಕಂಡಿಯವರೆಗೆ (7ಕಿ.ಮೀ) ರ‍್ಯಾಪ್ಟಿಂಗ್‌ ಹೋಗುವ ಅನುಭವ ಸಕತ್ ಥ್ರಿಲ್‌ ಆಗಿರುತ್ತದೆ. ತರಬೇತಿಯನ್ನು ಪಡೆದಿರುವ ರ‍್ಯಾಫ್ಟಿಂಗ್ ಎಕ್ಸ್‌ಪರ್ಟ್ ನಿಮ್ಮನ್ನು ಸುರಕ್ಷಿತವಾಗಿ ಕೊಂಡೊಯ್ಯುತ್ತಾರೆ. ತೆಪ್ಪದಕಂಡಿಯಿಂದ ನಿಮ್ಮನ್ನು ಪುನಃ ಕರದುಕೊಂಡು ಹೋಗಲು ಲೋಕಲ್‌ ಜೀಪ್‌ನ ವ್ಯವಸ್ಥೆ ಇರುತ್ತದೆ(ಇದು ಪ್ಯಾಕೇಜ್‌ನಲ್ಲಿಯೇ ಬರುವುದರಿಂದ ಪ್ರತ್ಯೇಕವಾಗಿ ಜೀಪ್‌ಗೆ ಬಾಡಿಗೆ ನೀಡುವಂತಿಲ್ಲ).

ರ‍್ಯಾಫ್ಟಿಂಗ್ ಬಳಿಕ ಫ್ರೆಶ್ ಆಗಲು ವ್ಯವಸ್ಥೆಯಿದ್ದು, ದೇವಾಲಯಕ್ಕೆ ಹೋಗ ಬಯಸುವುದಾದರೆ ದುಬಾರೆ ಬಳಿಯೇ ಪ್ರಸಿದ್ಧ ನಂಜುಡೇಶ್ವರ ದೇವಾಲಯವಿದೆ.

ಅಲ್ಲಿಂದ ಕುಶಾಲನಗರ ಕಡೆಗೆ ಮರಳುವಾಗ ಗುಡ್ಡೆಹೊಸೂರು ಸಮೀಪದಲ್ಲಿ ಆಫ್‌ ರೋಡ್‌ ರೈಡಿಂಗ್ ಇದ್ದು ಅದರ ಅನುಭವ ಕೂಡ ಪಡೆಯಬಹುದಾಗಿದೆ.

ದೂರ: ಈ ಆನೆ ಕ್ಯಾಂಪ್‌ಗೆ ಸಿದ್ಧಾಪುರ ಅಥವಾ ಕುಶಾಲನಗರ ಎರಡೂ ಕಡೆಯಿಂದಲೂ ಬರಬಹುದು, ಈ ಎರಡು ಸ್ಥಳಕ್ಕೆ ಹೋಗುವ ಮಧ್ಯದಲ್ಲಿ ದುಬಾರೆ ಸಿಗುತ್ತದೆ.
ಅಂತರ: ಕುಶಾಲನಗರದಿಂದ 16 ಕಿ. ಮೀ, ಸಿದ್ಧಾಪುರದಿಂದಲೂ 16 ಕಿ. ಮೀ
ಸಮಯ: 20 ನಿಮಿಷ