*ಎಸ್.ಪಿ.ವಿಜಯಲಕ್ಷ್ಮಿ
ಹಿಮವಂತನ ಅಧಿಪತ್ಯ, ಸೂರ್ಯನ ಹುಸಿ ಮುನಿಸು, ಈ ಎಲ್ಲ ಪ್ರಕ್ರಿಯೆಯಲ್ಲಿ ಭೂಮಿ ನಸುನಾಚಿ ಫಳಫಳ ಧವಳ ಸೌಂದರ್ಯದಿಂದ ಬೆಳಗಿ ಬೀಗಿಬಿಡುವ ಜರ್ಮನಿಯ ಬ್ರೌನೆಕ್ ಪರ್ವತದ ಹಿಮ ವೈಭವ ಪ್ರವಾಸಿಗರ ಮನಸೂರೆಗೊಳ್ಳುತ್ತದೆ. ಬೆಳ್ಳನೆಯ ಮುತ್ತು ಕೋಟಿ ಕೋಟಿ ಲೆಕ್ಕದಲ್ಲಿ ಸುರಿದಂತೆ, ಚಿತ್ತಾರದ ಚಕ್ರಗಳಂತೆ, ಲೇಸಿನ ನವಿರು ನೇಯ್ಗೆಯಂತೆ, ಉಪ್ಪು-ಸಕ್ಕರೆಯ ಹುಡಿಯಂತೆ ಹಿಮ ಒಂದೇ ಸಮ ಸುರಿದು ಆಗಸವೇ ಭೂಮಿಯಲ್ಲಿ ಒಂದಾಗುತ್ತಿದೆಯಾ ಎನ್ನುವ ಭ್ರಮೆ ಹುಟ್ಟಿಸುತ್ತದೆ. ಜರ್ಮನಿಯ ಮ್ಯೂನಿಕ್ನ ಲೆಂಗ್ರಿಸ್ ಎಂಬ ಪುಟ್ಟ ಟೌನಿನಲ್ಲಿ ಬ್ರೌನೆಕ್ ಪರ್ವತ ಶ್ರೇಣಿಗಳು ಕಂಡು ಬರುತ್ತವೆ.
ಆಕರ್ಷಣೆ: ಲೆಂಗ್ರಿಸ್ನ ಬ್ರೌನೆಕ್ ಪರ್ವತ ಸ್ಕೀಯಿಂಗ್ ಕ್ರೀಡೆಗೆ ಹೆಸರುವಾಸಿ. ಇಲ್ಲಿ ದಟ್ಟವಾಗಿ ಹಿಮ ಸುರಿಯುತ್ತದೆ. ಇಲ್ಲಿನ ಹಿಮಪಾತ ಕಾಣುವಷ್ಟು ಸುಂದರವಲ್ಲ, ಅನುಭವಿಸುವುದು. ಸಿದ್ಧತೆಯಿಲ್ಲದಿದ್ದರೆ ಏನು ಬೇಕಾದರೂ ಪ್ರಾಣಾಪಾಯವಾಗಬಹುದು. ರಾಶಿರಾಶಿ ಹಿಮದಲ್ಲಿ ಮುಳುಗಿದ್ದ ಭೂಮಿಯ ಮೇಲೆ ಹೆಜ್ಜೆಯಿಟ್ಟು ಸಾಗುವುದೇ ಪ್ರಯಾಸವೆನಿಸುತ್ತದೆ. ಪ್ರತಿ ಹೆಜ್ಜೆಗೂ ಸವಾಲುಗಳು ಎದುರಾಗುತ್ತವೆ. ಮಕ್ಕಳಿಂದ ಮುದುಕರವರೆಗೂ ಈ ಸುರಿವ ಹಿಮದಲ್ಲಿ ಸ್ಕೀಯಿಂಗ್ ಮಾಡುವ, ಟಿ ಆಕಾರದ ಡ್ರಾಗ್ಲಿಫ್ಟ್, ಛೇರ್ಲಿಫ್ಟ್, ಟಾಪ್ಲಿಫ್ಟ್ ಎಂಬ ಮರದಹಲಗೆಯ ಮೇಲೆ ಕೂತು ಎಂಟುನೂರು ಅಡಿಯ ಪರ್ವತಕ್ಕೇರುವ ಥ್ರಿಲ್ ಅನುಭವಿಸುತ್ತಾರೆ.
ಬೆರ್ಗ್ಬಾನ್ ಇದು ಇಲ್ಲಿನ ಹಿಮವತ್ಪರ್ವತಕ್ಕೆ ಅಳವಡಿಸಿರೋ ಗೊಂಡೋಲಾ ಕೇಬಲ್ ಕಾರ್ಗಳು. ಬಾಯರ್ನ್ ಟಿಕೆಟ್ ಒಮ್ಮೆ ಖರೀದಿಸಿದರೆ ಬೆಳಗ್ಗೆಯಿಂದ ರಾತ್ರಿವರೆಗೂ ಈ ರಾಜ್ಯದ ಎಲ್ಲೆಡೆ ಬೇಕಾದರೂ ಬಸ್, ರೈಲುಗಳಲ್ಲಿ ಸಂಚಾರ ಮಾಡಬಹುದು. ಕೇಬಲ್ ಕಾರಿನಲ್ಲಿ ಕುಳಿತು ಪ್ರಯಾಣಿಸುವಾಗ ಕಾಣುವ ದೃಶ್ಯ ನಯನ ಮನೋಹರ. ಹಿಮಗಾಲದಲ್ಲಿ ಹಿಮಮಯವಾಗಿ ಅಲ್ಲಲ್ಲಿ ನಿತ್ಯಹರಿದ್ವರ್ಣ ವೃಕ್ಷ ಗಳು ಕಂಡರೆ, ಉಳಿದ ಕಾಲದಲ್ಲಿ ಇಳಿಜಾರಿನ ಹುಲ್ಲುಗಾವಲು, ಓಡಾಡುವ ಹಸುಗಳು, ಕುರಿಗಳು, ದಟ್ಟಮರಗಳು, ನೀಲಾಕಾಶ, ಚಿತ್ರದಲ್ಲಿದ್ದಂಥ ಮರದಮನೆಗಳು ನಿಜಕ್ಕೂ ಮರುಳುಗೊಳಿಸುವ ಪಟದಂತೆ.
ತುತ್ತತುದಿಯಲ್ಲಿಳಿದು ಕೆಫೆಟೇರಿಯಾದ ಬಾಲ್ಕನಿಗೆ ಬಂದರೆ ಕೆಳಗಿನ ಹಿಮಕಣಿವೆಯಲ್ಲಿ ಎಲ್ಲೆಲ್ಲಿ ನೋಡಿದರೂ ಸ್ಕೀಯರ್ಸ್...! ಈ ಇಳಿಜಾರಿನಲ್ಲಿ ಮಕ್ಕಳು ಲೀಲಾಜಾಲವಾಗಿ ಮಟ್ಟಸನೆಲದಲ್ಲಿ ಓಡುವಂತೆ ಇಳಿಯುವ ಪರಿ ವಿಸ್ಮಯ. ಮ್ಯೂನಿಕ್, ಸಾಲ್ಸ್ಬುರ್ಗ್, ಇನ್ಸ್ಬ್ರುಕ್ಗೆ ಹತ್ತಿರವಿರುವ ಲೆಂಗ್ರಿಸ್ಗೆ ಹಿಮಕ್ರೀಡೆಗಳು, ಪ್ಯಾರಾ ಗ್ಲೈಡಿಂಗ್, ಹೈಕಿಂಗ್ಗೆ ಬರುವ ಪ್ರವಾಸಿಗರು ಉಳಿದಂತೆ, ಈ ಸುಂದರ ಟೌನಿನಲ್ಲಿ ಸುಮ್ಮನೆ ಅಡ್ಡಾಡಿ ಕಾಲಕಳೆಯಲೆಂದೇ ಬರುತ್ತಾರೆ. ಈ ಲೆಂಗ್ರಿಸ್ಸ್ ಎಂಬ ಟೌನಿನ ಹಿಮವೈಭವ ಸಾಟಿಯಿಲ್ಲದ್ದು.
ಹೋಗುವುದು ಹೇಗೆ?: ಬೆಂಗಳೂರಿನಿಂದ ಜರ್ಮನಿಯ ಸ್ಟಗರ್ಟ್ ನಗರಕ್ಕೆ ನೇರ ವಿಮಾನವಿದೆ. ಇದು 8 ಗಂಟೆಯ ಪ್ರಯಾಣ. ಅಲ್ಲಿಂದ ಮ್ಯೂನಿಕ್ ಒಂದು ಗಂಟೆಯ ವಿಮಾನಯಾನ. ಇಲ್ಲವಾದರೆ ಬೆಂಗಳೂರಿನಿಂದ ಮಸ್ಕಟ್, ದುಬೈ ಮುಖಾಂತರ ಮ್ಯೂನಿಕ್ ತಲುಪಬಹುದು. ಮ್ಯೂನಿಕ್ನಿಂದ ಲೆಂಗ್ರಿಸ್ ಟೌನ್ ಎರಡು ಗಂಟೆಯ ರಸ್ತೆಯಾನ. ಕಾರು, ಬಸ್, ರೈಲಿನಲ್ಲಿ ಹೋಗಬಹುದು. ಲೆಂಗ್ರಿಸ್ನಲ್ಲಿ ಇಳಿದ ಮೇಲೆ ಬ್ರೌನೆಕ್ ಪರ್ವತಕ್ಕೆ ಅಲ್ಲಿಯ ಬಸ್ಗಳೇ ಇರುತ್ತವೆ. ಇದರಲ್ಲೇ ಹೋಗಬೇಕು. ಇವು ಅರ್ಧಗಂಟೆಗೊಂದರಂತೆ ಲೆಂಗ್ರಿಸ್ಗೂ ಪರ್ವತಕ್ಕೂ ಓಡಾಡುತ್ತವೆ.