ಮಳೆಗಾಲದಲ್ಲೊಂದು ಚಿಕ್ಕಮಗಳೂರು ಟ್ರಿಪ್‌

ಮಾನ್ಸೂನ್‌ನಲ್ಲಿ ಒಂದು ಚಿಕ್ಕ ವೀಕೆಂಡ್‌ ಟ್ರಿಪ್‌ ಬಯಸುವುದಾದರೆ ಕಾಫಿನಾಡು ಚಿಕ್ಕಮಗಳೂರಿಗೆ ಭೇಟಿ ನೀಡಬಹುದು. ಸುತ್ತಲೂ ಬೆಟ್ಟಗಳಿಂದ ಆವೃತವಾಗಿರುವ ಈ ನಾಡಿಗೆ ಇಲ್ಲಿಯ ಮುಳ್ಳಯ್ಯಗಿರಿ ಬೆಟ್ಟ ಚಿಕ್ಕಮಗಳೂರಿನ ಸೌಂದರ್ಯಕ್ಕೆ ಮುಕುಟವಿದ್ದಂತೆ.

ಹಿರೆಕೊಳಲೆ ಕೆರೆ, ದತ್ತಪೀಠ, ಮುಳ್ಳಯ್ಯನಗಿರಿ, ಬೆಳವಾಡಿ, ಭದ್ರಾ ವನ್ಯಧಾಮ, ಕೆಮ್ಮನಗುಂಡಿ, ಮಾಣಿಕ್ಯಧಾರ ಜಲಪಾತ ಮುಂತಾದವುಗಳು ಇಲ್ಲಿಯ ಪ್ರಮುಖ ಪ್ರವಾಸಿ ಆಕರ್ಷಣೆಯ ಕೇಂದ್ರ ಬಿಂದುಗಳಾಗಿವೆ.

ಟ್ರೆಕ್ಕಿಂಗ್‌ಗೆ ಹೆಸರುವಾಸಿಯಾಗಿರುವ ಚಿಕ್ಕಮಗಳೂರು ಮಾನ್ಸೂನ್‌ನಲ್ಲಿ ಪ್ರಕೃತಿಯ ಸೊಬಗಿನಿಂದ ನೋಡುಗರನ್ನು ಮೈಮರೆಯುವಂತೆ ಮಾಡುವುದು. ಜಿಟಿಜಿಟಿ ಮಳೆ ಬೀಳುತ್ತಿರುವಾಗ ಧುಮ್ಮಿಕ್ಕುವ ಜಲಪಾತಗಳು, ತುಂಬಿ ಹರಿಯುತ್ತಿರುವ ಕೆರೆಗಳು, ಹಚ್ಚ-ಹಸಿರಿನ ಪ್ರಕೃತಿ ಸೊಬಗು ಮನಸ್ಸು ಹಾಗೂ ದೇಹಕ್ಕೆ ನವೋತ್ಸಾಹ ತುಂಬುವುದು.

ಧೋ ಎಂದು ಸುರಿಯುವ ಮಳೆಗಿಂತ ಜಿಟಿ-ಜಿಟಿ ಸುರಿಯುವ ಮಳೆಯಲ್ಲಿ ಸುತ್ತಾಡಲು ತುಂಬಾ ಮಜವೆನಿಸುವುದು. ಈಗ ಮುಳ್ಳಯ್ಯನಗಿರಿ ಬೆಟ್ಟಕ್ಕೆ ಹೋದರಂತೂ ಸ್ವರ್ಗ ಲೋಕವೆಂದರೆ ಹೀಗಿರಬಹುದೆಂದು ಅನಿಸದೆ ಇರಲ್ಲ, ಮಂಜಿನಿಂದ ಆವೃತವಾಗಿರುವ ಆ ಬೆಟ್ಟ ನೋಡಲು ಅಷ್ಟೊಂದು ಮನ ಮೋಹಕವಾಗಿರುತ್ತದೆ.

ಇಲ್ಲಿಗೆ ಮಳೆಗಾಲದದ ಟ್ರಿಪ್‌ಗೆ ಬೈಕ್‌ಗಿಂತ ಕಾರಿನ ಪ್ರಯಾಣ ಸೂಕ್ತ.