ಬೆಂಗಳೂರಿನ ಸಮೀಪ ಒಂದು ದಿನದ ಟ್ರೆಕ್ಕಿಂಗ್‌ಗೆ ಸೂಕ್ತ ತಾಣಗಳಿವು

ನೀವು ಟ್ರೆಕ್ಕಿಂಗ್‌ ಪ್ರಿಯರಾಗಿದ್ದರೆ ಬೆಂಗಳೂರಿನ ಸುತ್ತ-ಮುತ್ತ ಹಲವಾರು ಸುಂದರ ಟ್ರೆಕ್ಕಿಂಗ್‌ ತಾಣಗಳಿವೆ. ಈ ಸ್ಥಳಗಳಿಗೆ ಹೋಗಿ ಬರಲು ಒಂದು ದಿನ ಸಾಕಾಗಿರುವುದರಿಂದ ವೀಕೆಂಡ್‌ ಟ್ರಿಪ್‌ಗೆ ಸೂಕ್ತ ತಾಣಗಳಾಗಿವೆ.

ಬೆಂಗಳೂರಿನ ಸುತ್ತ-ಮುತ್ತ ಇರುವ ಆಕರ್ಷಕ ಟ್ರಕ್ಕಿಂಗ್ ತಾಣಗಳು

1. ಸಾವನದುರ್ಗಾ ಬೆಟ್ಟ
ಏಕ ಶಿಲೆಯಿಂದ ನಿರ್ಮಿತವಾದ ಬೆಟ್ಟಗಳಲ್ಲಿ ಏಷ್ಯಾದಲ್ಲಿಯೇ ಅತ್ಯಂತ ಎತ್ತರದ ಬೆಟ್ಟ ಎಂಬ ಹೆಗ್ಗಳಿಕೆ ಈ ಬೆಟ್ಟಕ್ಕಿದೆ. ಸಾವನದುರ್ಗ ಕರಿ ಗುಡ್ಡ-ಬಿಳಿ ಗುಡ್ಡ ಎಂಬ ಹೆಸರಿನ ಎರಡು ಬೆಟ್ಟಗಳಿಂದ ರೂಪಿತವಾಗಿದೆ. ಬೆಂಗಳೂರಿನಿಂದ 48 ಕಿ.ಮೀ ದೂರದಲ್ಲಿರುವ ಈ ಬೆಟ್ಟ ಒಂದು ಯಾತ್ರಾ ಸ್ಥಳವೂ ಹೌದು. ಈ ಬೆಟ್ಟದಲ್ಲಿ ಸಾವಂಡಿ ವೀರಭದ್ರೇಶ್ವರ ಸ್ವಾಮಿ ದೇವಾಲಯ ಹಾಗೂ ನರಸಿಂಹ ಸ್ವಾಮಿ ದೇವಾಲಯಗಳಿವೆ.

ಕರಿಗುಡ್ಡಕ್ಕಿಂತ ಬಿಳಿ ಗುಡ್ಡವನ್ನು ಏರುವುದು ಸುಲಭ. ಅಡ್ವೆಂಚರ್‌ (ಸಾಹಸ ಪ್ರವೃತ್ತಿ) ಇಷ್ಟ ಪಡುವವರಿಗೆ ಕರಿಗುಡ್ಡ ಟ್ರೆಕ್ಕಿಂಗ್ ತೃಪ್ತಿ ತರುತ್ತದೆ. ರಾತ್ರಿ ಟ್ರೆಕ್ಕಿಂಗ್‌ ಮಾಡಿ ಹಾಗೂ ಬೆಳಗ್ಗಿನ ಸೂರ್ಯೋದಯ ನೋಡಿ ಮರಳಿದರೆ ಈ ಟ್ರೆಕ್ಕಿಂಗ್‌ ಅನುಭವ ನಿಮಗೆ ಸಾಕಷ್ಟು ಖುಷಿ ನೀಡುವುದು.

2. ರಾಮನಗರ
ಬೆಂಗಳೂರಿನ ಸುತ್ತ-ಮುತ್ತವಿರುವ ಪ್ರಸಿದ್ದ ಟ್ರೆಕ್ಕಿಂಗ್‌ ತಾಣಗಳಲ್ಲಿ ರಾಮನಗರ ಕೂಡ ಒಂದು. ಇಲ್ಲಿ ಟ್ರೆಕ್ಕಿಂಗ್‌ಗೆ ಏಳು ಬೆಟ್ಟಗಳಿವೆ. ರಾಕ್‌ ಕ್ಲೈಬಿಂಗ್‌ ಇಲ್ಲಿಯ ಪ್ರಮುಖ ಆಕರ್ಷಣೆಗಳಲ್ಲಿ ಒಂದು. ಜನಪದ ಲೋಕ ಹಾಗೂ ಕಣ್ವ ಜಲಾಶಯಗಳು ಈ ಸ್ಥಳದ ಆಕರ್ಷಣೆಯನ್ನು ಹೆಚ್ಚಿಸಿವೆ.
ದೂರ: ಬೆಂಗಳೂರಿನಿಂದ 55 ಕಿ.ಮೀ
ಎತ್ತರ:3000 ಅಡಿ

3. ನಂದಿ ಬೆಟ್ಟ
ಅತೀ ಹೆಚ್ಚು ಪ್ರವಾಸಿಗರನ್ನು ಸೆಳೆಯುತ್ತಿರುವ ಬೆಟ್ಟಗಳಲ್ಲೊಂದು ನಂದಿಬೆಟ್ಟ. ಟ್ರೆಕ್ಕಿಂಗ್‌ ಹಾಗೂ ಹೈಕಿಂಗ್‌ಗೆ ಸೂಕ್ತವಾದ ತಾಣ ಇದಾಗಿದೆ.
ದೂರ: ಬೆಂಗಳೂರಿನಿಂದ 60 ಕಿ. ಮೀ ದೂರದಲ್ಲಿದೆ.
ಟ್ರಕ್ಕಿಂಗ್: ಅಷ್ಟೇನು ಕಷ್ಟಕರವಲ್ಲ
ಎತ್ತರ: 4850 ಅಡಿ ಎತ್ತರ
ಟ್ರೆಕ್ಕಿಂಗ್‌ಗೆ ಸೂಕ್ತ ಸಮಯ: ಇಲ್ಲಿಯ ಸೂರ್ಯೋದಯ ನೋಡುವುದು ಚೆಂದ, ಆದ್ದರಿಂದ ಬೆಳಗ್ಗಿನ ಜಾವ ಟ್ರೆಕ್ಕಿಂಗ್‌ಗೆ ಸೂಕ್ತವಾದ ಸಮಯ.