ಸರ್ವಧರ್ಮದ ಪ್ರತೀಕ ಬೆಳಗಾವಿ ಕೋಟೆ

ಬೆಳಗಾವಿಯ ಪ್ರವಾಸಿಯ ತಾಣಗಳೊಂದು ಬೆಳಗಾವಿ ಕೋಟೆ. ಇದನ್ನು ಬೆಳಗಾಂ ಕೋಟೆಯೆಂದೂ ಕರೆಯುತ್ತಾರೆ. ರಟ್ಟಾ ಸಾಮ್ರಾಜ್ಯದ ಬಿಚಿರಾಜ 1204ರಲ್ಲಿ ಈ ಕೋಟೆಯನ್ನು ಕಟ್ಟಿಸಿದರು.

ಬ್ರಿಟಿಷರು ಭಾರತವನ್ನು ವಶಪಡಿಸಿಕೊಳ್ಳುವ ಮುನ್ನ ರಾಷ್ಟ್ರಕೂಟರು, ವಿಜಯ ನಗರ ಸಾಮ್ರಾಜ್ಯದ ಅರಸರು, ಮರಾಠರು ಹೀಗೆ ಅನೇಕ ರಾಜವಂಶಸ್ಥರು ಈ ಕೋಟೆಯನ್ನು ವಶಪಡಿಸಿ ಆಳಿರುವ ಕೋಟೆ ಇದಾಗಿದೆ.

ಕೆಂಪು ಕಲ್ಲಿನಿಂದ ನಿರ್ಮಿತವಾಗಿರುವ ಈ ಕೋಟೆ ನೋಡಲು ಭವ್ಯವಾಗಿದ್ದು, 32 ಅಡಿ ಎತ್ತರದಲ್ಲಿ ಈ ಕೋಟೆಯನ್ನು ನಿರ್ಮಿಸಲಾಗಿದೆ.

ಕೋಟೆಯ ಪ್ರಮುಖ ಆಕರ್ಷಣೆ
*ಕೋಟೆಯ ವಾಸ್ತುಶಿಲ್ಪ
ಕಲ್ಲು-ಮಣ್ಣು ಬಳಸಿ ನಿರ್ಮಿಸಲಾಗಿರುವ ಈ ಕೋಟೆ ಹಿಂದೂ, ಜೈನ್‌, ಇಸ್ಲಾಮಿಕ್‌ ವಾಸ್ತುಶಿಲ್ಪದಿಂದ ಕೂಡಿದೆ. ಆದ್ದರಿಂದ ಈ ಕೋಟೆಯನ್ನು ಸರ್ವಧರ್ಮದ ಪ್ರತಿರೂಪವೆಂದೇ ಹೇಳಬಹುದು. ಕೋಟೆಯ ಒಳಗೆ 2 ಹಿಂದೂ ಹಾಗೂ 2 ಜೈನ ದೇವಾಲಯಗಳಿವೆ ಹಾಗೂ 2 ಮಸೀದಿಗಳಿವೆ.

ಹಿಂದೂ ದೇವಾಲಯಗಳು
ದುರ್ಗಾಮಾತೆಯ ದೇವಾಲಯ, ಗಣಪತಿ ದೇವಾಲಯ

ಜೈನ ದೇವಾಲಯಗಳು
ಕಮಲ ಹಾಗೂ ಚಿಕ್ಕ ಬಸದಿ ದೇವಾಲಯಗಳನ್ನು ಚಾಲುಕ್ಯರ ವಾಸ್ತುಶಿಲ್ಪ ಶೈಲಿಯಲ್ಲಿ ನಿರ್ಮಿಸಲಾಗಿದ್ದು ನೋಡಲು ತುಂಬಾ ಸುಂದರವಾಗಿವೆ.

ಮಸೀದಿಗಳು
ಇಲ್ಲಿರುವ ಎರಡು ಮಸೀದಿಗಳನ್ನು ಸಫಾ ಮಸೀದಿ ಮತ್ತು ಜಾಮೀಯಾ ಮಸೀದಿ ಎಂದು ಕರೆಯಲಾಗುವುದು. ಮಸೀದಿಯ ಸ್ತಂಭಗಳು ನಗರಿ ಮತ್ತು ಪರ್ಷಿಯನ್‌ ಶೈಲಿಗಳ ಸಮ್ಮಿಲನದಲ್ಲಿ ಸೊಗಸಾದ ಶಾಸನಗಳನ್ನು ಹೊಂದಿವೆ.

ಈ ಆಕರ್ಷಕ ಕೋಟೆಯನ್ನು ನೋಡ ಬಯಸುವುದಾದರೆ ಬೆಳಗ್ಗೆ 8 ಗಂಟೆಯಿಂದ ಸಂಜೆ 6.30ವರೆಗೆ ಅವಕಾಶವಿದೆ.

ಈ ಕೋಟೆಯ ಸಮೀಪ ವೀರಸೌಧ, ಕಪಿಲೇಶ್ವರ ದೇವಾಲಯ, ಸ್ವಾಮಿ ವಿವೇಕಾನಂದ ಆಶ್ರಮ, ಕಮಲ ಬಸದಿಗಳಿದ್ದು, ಕೋಟೆ ನೋಡಿ ಈ ಸ್ಥಳಗಳಿಗೆ ಭೇಟಿ ನೀಡಬಹುದಾಗಿದೆ.