ಪ್ರವಾಸದಿಂದ ಹೊಸ ಎನರ್ಜಿ

ಪ್ರವಾಸದಿಂದ ಹೊಸ ಎನರ್ಜಿ


ಪ್ರವಾಸವೆಂದರೆ ನನಗಿಷ್ಟ. ಅದರಲ್ಲೂ ವೈಲ್ಡ್‌ಲೈಫ್‌ ಟೂರ್‌ ಅಂದರೆ ಬಹಳ ಪ್ರಿಯ. ಎಲ್ಲೋ ಎರಡು ದಿನ ಸಮಯ ಸಿಕ್ಕರೆ ಅಥವಾ ವಾರಾಂತ್ಯಗಳಲ್ಲಿ ಯಾವುದಾದರೂ ಕಾಡಿಗೆ ಹೋಗಿಬಿಡುತ್ತೇನೆ. ಕಾಡುಗಳಲ್ಲಿ ಸಫಾರಿಗೆ ಹೋಗುತ್ತೇನೆ. ಅಲ್ಲಿನ ಹುಲಿ, ಸಿಂಹ ಇತ್ಯಾದಿ ಕಾಡುಪ್ರಾಣಿಗಳನ್ನು ನೋಡುವುದು ಇಲ್ಲವಾದರೆ ರಾತ್ರಿಹೊತ್ತು ಅವುಗಳ ಸದ್ದು ಕೇಳಿಸಿಕೊಳ್ಳುವುದು ಅಂದರೆ ನನಗಿಷ್ಟ. ಕಾಡಿನಲ್ಲಿನ ಮೌನವೂ ಬಹುಚಂದ. ನಾಗರಹೊಳೆ, ಮಧುಮಲೈಯಂತಹ ನಮ್ಮ ಸ್ಥಳೀಯ ಕಾಡುಗಳಲ್ಲಿಯೂ ಸುತ್ತಾಡುತ್ತೇನೆ.

ವಿವಿಧ ದೇಶ, ಸ್ಥಳಗಳ ಸುತ್ತಾಟವಂತೂ ನನಗೆ ವಿಶೇಷ ಎನರ್ಜಿ ಕೊಡುತ್ತದೆ. ನನ್ನ ವೃತ್ತಿಯ ನಿಮಿತ್ತ ಪ್ರವಾಸಗಳು ಸಹಜವೇ ಆಗಿವೆ. ಅವುಗಳ ಜತೆಗೆ ವೈಯಕ್ತಿಕ ಆಸಕ್ತಿಯಿಂದಲೂ ಹೋಗುತ್ತೇನೆ. ಪೂರ್ವ ಏಷ್ಯಾದಲ್ಲಿ ಬಾಲಿ ನನಗೆ ಬಹಳ ಇಷ್ಟವಾಯಿತು. ಅಲ್ಲಿನ ಜನರು ಭಾರತೀಯರನ್ನು ಬಹಳ ಗೌರವಿಸುತ್ತಾರೆ. ಇದಲ್ಲದೆ ಭೂತಾನ್‌, ಯೂರೋಪ್‌ನಲ್ಲಿ ಪ್ಯಾರಿಸ್‌, ಇಟಲಿಗಳು ಇಷ್ಟವಾದವು.

ವಿದೇಶಗಳಿಗೆ ಹೋದಾಗ ಅಲ್ಲಿನ ಮ್ಯೂಸಿಯಮ್‌ಗಳು, ವಾಸ್ತುಶಿಲ್ಪ ಇತ್ಯಾದಿಗಳನ್ನು ಗಮನಿಸಿ ನೋಡುತ್ತೇನೆ. ಪ್ಯಾರಾ ಸೈಲಿಂಗ್‌, ರಿವರ್‌ ರಾರ‍ಯಫ್ಟಿಂಗ್‌ನಂತಹ ಸಾಹಸ ಕ್ರೀಡೆಗಳಲ್ಲಿ ಪಾಲ್ಗೊಳ್ಳುತ್ತೇನೆ ಕೂಡ. ಸ್ಥಳೀಯವಾದ ಆಹಾರವಿಶೇಷಗಳ ರುಚಿ ನೋಡುವುದೂ ನನಗೆ ಪ್ರಿಯ. ವೆಜೆಟೇರಿಯನ್‌ ಆಗಿರುವ ನನಗೆ ಆಫ್ರಿಕಾದಲ್ಲಿ ವೆಜ್‌ ಫುಡ್‌ ಹೆಚ್ಚಾಗಿ ಸಿಕ್ಕಾಗ ಅಚ್ಚರಿಯೇ ಆಯಿತು. ಇದಲ್ಲದೆ ಸಣ್ಣಸಣ್ಣ ಹಳ್ಳಿಗಳಿಗೆ ಹೋಗುವುದು, ಅಲ್ಲಿನ ಸ್ಥಳೀಯ ಆಹಾರ, ಸಂಸ್ಕೃತಿಗಳನ್ನು ತಿಳಿದುಕೊಳ್ಳುವುದರ ಬಗ್ಗೆ ನನಗೆ ಬಹಳ ಆಸಕ್ತಿ. ಇದಲ್ಲದೆ ಎಲ್ಲೇ ಹೋಗಲಿ, ಅಲ್ಲಿನ ಜನರ ಬಟ್ಟೆಬರೆ, ಅಲ್ಲಿನ ಕರಕುಶಲ ಕಲೆಯನ್ನು ಗಮನಿಸುತ್ತೇನೆ. ಇದು ನನ್ನ ವೃತ್ತಿಯ ಭಾಗವೇ ಆಗಿದ್ದರೂ ಇದರಲ್ಲಿ ನನಗೆ ಸಹಜ ಆಸಕ್ತಿ ಮೊದಲಿನಿಂದಲೂ ಇದೆ.

ಐತಿಹಾಸಿಕವಾಗಿ ಪ್ರಮುಖವೆನಿಸುವ ಸ್ಥಳಗಳನ್ನು ನೋಡುವ ಕುತೂಹಲ ಸದಾ ನನ್ನಲ್ಲಿದೆ. ಚಿತ್ರದುರ್ಗದ ಕೋಟೆ, ಎಲ್ಲೋರಾದ ಕಲಾವೃತ ಗುಹೆಗಳು ಇತ್ಯಾದಿಗಳು ನಮ್ಮ ಬಹು ಶ್ರೀಮಂತ ಸಾಂಸ್ಕೃತಿಕ ಪರಂಪರೆಯನ್ನು ಸಾರುತ್ತವೆ.

ಪುಸ್ತಕಗಳನ್ನೋದುವುದು ನನ್ನ ಇನ್ನೊಂದು ಇಷ್ಟದ ಹವ್ಯಾಸ. ಆತ್ಮಕಥನಗಳು ಅಥವಾ ಇನ್ನಾವುದೇ ವಿಶಿಷ್ಟ ವಸ್ತುವುಳ್ಳ ಕೃತಿಗಳನ್ನು ಓದುತ್ತೇನೆ. ಸದ್ಯ, ಓಂ ಸ್ವಾಮಿ ಅವರ 'ದ ಏನ್ಶೆಂಟ್‌ ಸೈನ್ಸ್‌ ಆಫ್‌ ಮಂತ್ರಾಸ್‌' ಕೃತಿಯನ್ನು ಓದುತ್ತಿದ್ದೇನೆ.

ನಾನು ಸಿನಿಮಾಗಳನ್ನು ನೋಡುವುದು ಕಡಿಮೆ. ನೋಡಿದರೂ ನನ್ನ ಮಕ್ಕಳು ನೋಡುವ ಚಿತ್ರಗಳನ್ನು ನೋಡುವುದೇ ಹೆಚ್ಚು. ಅಂತಾರಾಷ್ಟ್ರೀಯ ಪ್ರಶಸ್ತಿ ವಿಜೇತ ಚಿತ್ರಗಳನ್ನು, ವಿವಿಧ ರಾಷ್ಟ್ರಗಳ ಚಿತ್ರಗಳನ್ನು ನೋಡುವುದು ನನಗಿಷ್ಟ.

ದೀಪಿಕಾ ಗೋವಿಂದ್