ಅಡುಗೆ ಮಾಡಿ ಬಡಿಸುವ ಖುಷಿ

ಅಡುಗೆ ಮಾಡಿ ಬಡಿಸುವ ಖುಷಿ


ನೃತ್ಯದ ಹೊರತಾಗಿ ನನ್ನ ಪ್ರಮುಖ ಪ್ಯಾಷನ್‌ ಅಂದರೆ ಅಡುಗೆ ಮಾಡೋದು. ರುಚಿರುಚಿಯಾಗಿ ಅಡುಗೆ ಮಾಡಿ ಎಲ್ಲರಿಗೂ ತಿನ್ನಿಸುವುದೆಂದರೆ ನನಗೆ ಬಹಳ ಇಷ್ಟ. ಮನೆಯವರಿಗೆ, ನನ್ನ ವಿದ್ಯಾರ್ಥಿಗಳಿಗೆಲ್ಲ ಹೀಗೆ ಅಡುಗೆ ಮಾಡಿ ಉಣಬಡಿಸುತ್ತಿರುತ್ತೇನೆ. ಇದಕ್ಕಾಗಿಯೇ ಮನೆಗೆ ಬಂದವರು ನನ್ನನ್ನು 'ಅನ್ನಪೂರ್ಣೇಶ್ವರಿ' ಅನ್ನೋದೂ ಉಂಟು. ನನ್ನದು ದಕ್ಷಿಣ ಭಾರತೀಯ ಅಡುಗೆ. ಅದರಲ್ಲೂ ನಾನು ಮೂಲತಃ ಮೂಡುಬಿದಿರೆಯವಳಾದ ಕಾರಣ ಉಡುಪಿ ಕಡೆಯ ಸಾಂಪ್ರದಾಯಿಕ ಶೈಲಿಯದು. ಹುಳಿ, ಸಾರು, ಅನ್ನ, ಕೋಸಂಬರಿ, ಪಲ್ಯ, ಪಾಯಸ, ಪತ್ರೊಡೆ ಇವೆಲ್ಲ ನನಗಿಷ್ಟ.

ಇದಲ್ಲದೆ ಮನೆಯಲ್ಲಿ ಎರಡು ನಾಯಿಗಳನ್ನು ಸಾಕಿದ್ದೇನೆ. ಬಾಂಡ್‌ ಮತ್ತು ರಿಚ್ಚಿ ಎಂಬ ಹೆಸರಿನ ಈ ಎರಡೂ ನಂಬಿಕೆಯ ನಾಯಿಗಳೆಂದರೆ ನನಗೆ ಭಾಳ ಇಷ್ಟ. ಬಿಡುವು ಸಿಕ್ಕಾಗ ಅವುಗಳ ಜತೆ ಆಟವಾಡುತ್ತೇನೆ.

ನನ್ನ ಮೊಮ್ಮಗ ಐದು ವರ್ಷದ ಸಿದ್ಧಾಂತ್‌ ಆಸ್ಪ್ರೇಲಿಯಾದಲ್ಲಿದ್ದಾನೆ. ಅವನ ಜತೆ ಮಾತಾಡುವುದೂ ಬಹಳ ರಿಲ್ಯಾಕ್ಸೇಷನ್‌ ಕೊಡುತ್ತದೆ. ಸಮಯ ಸಿಕ್ಕಾಗಲೆಲ್ಲ ಸ್ಕೈಪ್‌ನಲ್ಲಿ ಅವನೊಂದಿಗೆ ಹರಟುತ್ತೇನೆ.

ನಾನು ಪ್ರತಿದಿನ ಯೋಗ ಕ್ಲಾಸ್‌ ಮಾಡುತ್ತೇನೆ. ಇದು ನನ್ನ ಫಿಟ್ನೆಸ್‌ಗೆ ಪೂರಕವೂ ಹೌದು. ಯೋಗ, ಭರತನಾಟ್ಯ, ಸಂಗೀತ ಇವೆಲ್ಲವನ್ನೂ ನಾನು ಬಹಳ ಇಷ್ಟಪಡುತ್ತೇನೆ. ಇದಲ್ಲದೆ ಫೋಟೋಗ್ರಫಿ, ಸುಡೊಕು ಬಿಡಿಸೋದು ಇತ್ಯಾದಿ ಹವ್ಯಾಸಗಳೂ ಇವೆ.

ಗಿಡಗಳ ಜತೆಗಿರುವುದೆಂದರೆ ನನಗೆ ಬಹಳ ಪ್ರೀತಿ. ಹೀಗಾಗಿ ದಿನದ ಸ್ವಲ್ಪ ಹೊತ್ತು ಗಾರ್ಡನಿಂಗ್‌ ಮಾಡುವುದು ನನ್ನ ಇಷ್ಟದ ಹವ್ಯಾಸ. ನಮ್ಮ ಮನೆಯ ಅಂಗಳದಲ್ಲಿಯೇ ಗಾರ್ಡನ್‌ ಮಾಡಿಕೊಂಡಿದ್ದೇನೆ. ಅಲ್ಲಿ ಹೂಗಿಡಗಳನ್ನು ಬೆಳೆಸಿದ್ದೇನೆ. ನಮ್ಮ ತೋಟವೂ ಒಂದಿದೆ, ಅಲ್ಲಿ ಬಗೆಬಗೆಯ ಹಣ್ಣುಗಳ ಮರಗಳನ್ನೂ ಬೆಳೆಸಿದ್ದೇವೆ. ಅಲ್ಲಿಗೆ ಹೋದರೆ ನನಗೆ ಬಹಳ ನೆಮ್ಮದಿಯೆನಿಸುತ್ತದೆ. ನವಿಲುಗಳ ಕೂಗು, ಹಕ್ಕಿಗಳ ಚಿಲಿಪಿಲಿ, ಹಸಿರು ಹೊದ್ದ ಪರಿಸರದಲ್ಲಿರುವುದೆಂದರೆ ತುಂಬಾ ಇಷ್ಟ.

ಡಾ.ವಸುಂಧರಾ ದೊರೆಸ್ವಾಮಿ, ಭರತನಾಟ್ಯ ಕಲಾವಿದೆ